Skip to content

Skip to secondary menu

Skip to table of contents

Molimau a Ieova

Faa-Samoa

Ala Mai!  |  Oketopa 2015

Pā puipui o Itchan Kala i Khiva

 ATUNUU MA TAGATA

Se Asiasiga i Uzbekistan

Se Asiasiga i Uzbekistan

TRANSOXANIA. O le Atunuu e i le Va o Vaitafe. Tartary. Turkistan. E tele igoa na faaigoa ai le vaega lea e aofia ai Uzbekistan i aso nei, po o le “Atunuu o Tagata Uzbek.” I le amataga o le senituri lona 15, na aogā tele aai o Uzbekistan i ē e faatauʻoa na uia le Silk Road, o se fetaulaʻiga o auala sa iai mai i Saina agaʻi i le Metitirani. I aso nei, ua tele ina faaaogā vavae i maketi o fale gaosi ofu o tagata Uzbek, ma e faatau ai foʻi kapeta e faia mai i vavae, vulu ma silika.

A o faagasolo tausaga, na taaʻina le aganuu a tagata Uzbek i le toʻatele o tagata. Sa savalia mauga ma toafa o Uzbekistan e nisi o tagata tau lauiloa ma a latou vaegaau. O nisi o i latou nei e aofia ai Alesana le Sili, o lē na feiloaʻi ma lana manamea o Roxane i inei; o Genghis Khan mai i Mongolia; ma Timur (po o Tamerlane), o se tasi o tagatānuu o le vaipanoa na pulea se tasi o emepaea e sili ona telē i le talafaasolopito.

Ofu faaleaganuu

I aso nei, e tele ina vaaia i Uzbekistan fale matagofie ma felanulanuaʻi e iai taualuga lapotopoto, ma o nei taualuga e  ufitia i maa omea lanu moana. O le tele o nei fale e faaaogā e fai ai aʻoga.

Le Silk Road. Na faaaogā lenei auala i aso anamua seʻia oo mai i le faaiʻuga o le senituri lona 15 T.A., ina ua tatala se alāvaa e agaʻi atu i Initia. O lenei auala sa faaaogā e tagata faatauʻoa, ma na ui atu i se vaega o le vaipanoa lea ua taʻua nei o Uzbekistan, ma na iai sona tāua i faiga tau fefaatauaʻiga.

Faiga o le kapeta mai i le silika

Le Vaituloto o le Aral Sea. O lenei vaituloto sa lona fā i vai tetelē i le lalolagi atoa. Peitaʻi, ua amata ona mou atu le vai, ona ua eli e tagata ni alāvai e faatafe atu ai le vai ina ia faaaogā i faatoʻaga. Ua galulue nei le atunuu o Uzbekistan ma atunuu i Asia Tutotonu e tau foʻia lenei faafitauli.

Fesuisuiaʻi le pi faitau a Uzbekistan. E tele gagana na tautatala ai tagata Uzbekistan. Ina ua faatoʻilalo lo latou vaipanoa e Isalama i le senituri lona valu, na amata loa ona latou tautatala i le faa-Arapi. Ae ina ua avea le atunuu ma vaega o le Soviet Union, na latou faaaogā muamua le pi faitau a Latina ma mulimuli ane faaaogā le pi faitau a Cyrillic i le faaiʻuga o le vaitausaga o le 1930. I le 1993, na faatū ai se tulafono na faaofi mai ai le faaaogāina o le pi faitau a Uzbek, lea na faavae mai i le pi faitau a Latina.

Fualaau ʻaina suamalie ua mamago o loo faatau i le maketi