Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! SETEMA 2015

 PE NA TEʻI LAVA UA IAI?

O Meaola Ninii e ʻAina le Suāuu

O Meaola Ninii e ʻAina le Suāuu

I LE 2010, e toetoe lima miliona kalone (800 miliona Lita) o suāuu e leʻi faamamāina na masaa i le Fagaloa o Mekisikō, ina ua pā ma magoto ifo i le sami se masini e vili ai le suāuu mai i le manava o le eleele. Peitaʻi, e na o ni nai masina ae amata ona mou atu le tele o le suāuu na faaleagaina ai le sami. Na faapefea ona tupu lenā mea?

Ia Mātau: Na iloa mai i suʻesuʻega a saienitisi, e iai ni meaola ninii i le sami e mafai ona ʻaina mea ninii o loo faia aʻe ai le suāuu. O le polofesa o Terry Hazen, o se saienitisi e suʻesuʻeina meaola ninii, na ia faamatala nei meaola ninii i le sami o ni “meaola o loo saʻili mo suāuu.” O nei meaola ninii sa iai sa latou vaega i le faamamāina ese o le suāuu lea na taʻua i le amataga na masaa i le Fagaloa o Mekisikō.

Ua faapea mai se lipoti a le BBC e tusa ai o lea mataupu: ʻE lē o se mea e faateʻia ai le maua i le sami o nei meaola ninii o loo galala mo le suāuu, auā o loo puna aʻe le suāuu mai i le ilititai, ma maua ai le suāuu i le sami’ mo le faitau piliona o tausaga.

E moni o loo aogā taumafaiga a tagata ina ia faamamā ese le suāuu. Peitaʻi o taumafaiga sili ma fitā a tagata, e ono iʻu ai ina faateteleina le faafitauli. O vailaau o loo faaaogā e tagata e faaleagaina ai le faagasologa o mea o le natura lea e mafai ona faamamāina le suāuu. E lē gata i lea, o na vailaau e oona ma e iai ona aafiaga tumau i le siʻosiʻomaga. Peitaʻi, o mea o le natura e faamamāina le suāuu, e aofia ai ma meaola ninii ia e ʻaina le suāuu, e mafai ai e le sami ona faamamāina ia lava e aunoa ma ni aafiaga leaga mai i vailaau oona. *

O le ā sou manatu? Pe na teʻi lava ua iai meaola ninii i le sami e ʻaina le suāuu? Pe na foafoaina?

^ pala. 6 E lē o mafai ona iloa i le taimi nei po o ā ni aafiaga tumau i meaola o le sami, ona o le faalavelave na tupu i le Fagaloa o Mekisikō.