Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! SETEMA 2015

 LE MANATU O LE TUSI PAIA

Mativa

Mativa

E faitau miliona tagata i le lalolagi aoao o loo ola matitiva, e ui lava i taumafaiga fitā ina ia foʻia lenei faafitauli.

E mafai faapefea i se tagata mativa ona maua le fiafia?

TALA A TAGATA

O le toʻatele o tagata e manatu e maua le fiafia ma le faamalieina e ala i le tele o meafaitino, ma o le taulau manuia moni e faalagolago i le tele o tupe a se tagata o loo iai. O tagata e matitiva e lē lelei pe e lē auai foʻi i ni aʻoaʻoga, e lē lelei ona tausia o latou soifua mālōlōina ma maua isi aogā, ma o le iʻuga e latou te lē maua se olaga fiafia ma faamalieina.

LE MANATU O LE TUSI PAIA

Ua aʻoaʻoina i le Tusi Paia o le fiafia moni e faalagolago i le lelei o le tulaga faaleagaga o se tasi, ma le iai o se faiā lelei ma Lē na foafoaina mea, ae e lē o le tulaga tau tamaoaiga. Ua taʻua i le Mataio 5:3: “E fiafia o ē e naunau i mea faaleagaga.” O ē e naunau i o latou manaʻoga faaleagaga, e tusa po o le ā lo latou tulaga tau tamaoaiga, ae e latou te saʻili le finagalo o le Atua i mataupu eseese, ma aʻoaʻoina upu moni o le Tusi Paia ia e aumaia ai faamāfanafanaga moni ma le filemu o le mafaufau. O le auala lea e maua ai le fiafia moni.

O i latou e malamalama ma mulimuli i fautuaga a le Tusi Paia, ua latou iloa lelei le auala e feagai ai ma le tulaga mativa. O se faaaʻoaʻoga, e fesoasoani fautuaga a le Tusi Paia i tagata e ʻalofia ai masaniga leaga, e pei o le ulaula tapaa ma le inu tele i le ʻava malosi. O nei masaniga e maʻimau ai tupe, ma e tele ina iʻu ai i le manaʻomia o ni togafitiga faafomaʻi e taugatā.—Faataoto 20:1; 2 Korinito 7:1.

Ua lapataʻi mai foʻi le Tusi Paia e faatatau i aafiaga mataʻutia o le matapeʻapeʻa ma le manaʻo tele i meafaitino. (Mareko 4:19; Efeso 5:3) O nei fautuaga e fesoasoani i se tasi e ʻalofia ai le faamaʻimau o tupe i taaloga faitupe, pe atiaʻe se faanaunauga o le “manaʻo tele i tupe,” auā ua taʻua i le Tusi Paia “o le pogai lea o mea leaga eseese uma.” (1 Timoteo 6:10) Ua lapataʻi mai le Luka 12:15: “E lē ola se tasi i le tele o ana mea ua iā te ia.” Pe a faafaigofie, e lē maua se ola i le tele o ni tupe. Ae o le ola e ōgatusa ai ma fautuaga atamai a le Tusi Paia, o le a faaaogā tatau ai o tatou olaga ma iʻu ai ina maua le fiafia moni.

A o tauivi ē o loo ola i ni tulaga matitiva ina ia saʻili ni meaʻai, lavalava ma fale, e mafai ona latou maua le fiafia moni e ala i le atiaʻe o le lotomalie, taulaʻi atu o latou olaga i le faafiafiaina o Lē na faia i latou, ma ola e tusa ai ma lona finagalo. Ua latou iloa le moni o le folafolaga o loo i le Faataoto 10:22: “O le faamanuiaga a Ieova, e faatamaoaiga ai ma e na te lē faaopoopo i ai se tigā.”

MAU AUTŪ: “E fiafia o ē e naunau i mea faaleagaga.”Mataio 5:3.

 Po o le a iai se taimi e faaiʻuina ai le mativa?

LE MANATU O LE TUSI PAIA

E lē o taulau galuega fesoasoani a tagata ina ia foʻia le mativa. Peitaʻi, i le taimi talafeagai, o le a taulaʻi atu le Atua i le pogai autū o le faafitauli, o faanaunauga manatu faapito o tagata ma faigāmalo ina ia faamalie o latou lava manaʻoga. (Failauga 8:9) O le a suia e le Atua faigāmalo faaletagata ia o loo pulea e tagata e manatu faapito. E aunoa ma se faailoga tagata, o le a saunia mai e lona Malo i le lagi so o se mea mo tagata uma o le a ola i le lalolagi. Ua folafola mai ma le mautinoa i le Tusi Paia o le a tausia ma le agalelei e le Tupu o le Malo o le Atua, manaʻoga o ē e matitiva. “O le a latou fausia fale ma nonofo ai; e latou te totō foʻi togāvine ma latou aai i ona fua. . . . O le a matuā fiafia uma oʻu tagata ua filifilia i galuega a o latou lima.”—Salamo 72:12-14.

O le a avea le lalolagi ma parataiso moni e iai fale ma meaʻai mo tagata uma, ma e lē toe iai se mativa. Ua folafola mai e le Atua i le Tusi Paia: ʻO le a fausia e ona tagata fale ma nonofo ai; e latou te totō foʻi togāvine ma latou aai i ona fua. O le a matuā fiafia uma oʻu tagata ua filifilia i galuega a o latou lima.’ (Isaia 65:21, 22) Nai lo o le toe tau saʻilia o mea e ola ai, o le a olioli tagata uma i se “faigaʻai o mea taumafa e sili ona lelei,” ma isi mea lelei e saunia mai e Ieova.—Isaia 25:6.

AISEĀ E TĀUA AI?

O le manatunatu i le folafolaga a le Atua e faatatau i se lalolagi e lē toe iai le mativa, ua faamautinoa mai ai i ē o loo ola i ni tulaga pagatia, o loo manatu mai le Atua ma ua lata mai le taimi e faaiʻuina ai tulaga faigatā o loo feagai ma i latou. Pe a taulaʻi atu se tasi i lenā faamoemoe, o le a ia maua ai le malosi e onosaia ai tulaga faigatā i aso nei.

MAU AUTŪ: “E laveaʻi e ia le tagata mativa o loo tagi mai mo se fesoasoani . . . E tigā alofa o ia i lē ua faatauvaa ma lē ua mativa, e faaola foʻi e ia o ē ua matitiva.”Salamo 72:12, 13.

Faitau Atili

O le ā le Malo o le Atua?

O ai le Tupu o le Malo o le Atua, ma o ā mea o le a faataunuuina e lenā Malo?

Aiseā ua Lē Taofia ai e le Atua Mea Leaga ma Mafatiaga?

Na faapefea ona amata mai le leaga, ma aiseā ua lē taofia ai e le Atua? Pe e iai se taimi o le a aveesea ai mafatiaga?

E Faapefea Ona Aogā iā i Tatou Mataupu Silisili o le Tusi Paia?

Na taʻua e Iesu le māfuaaga e tatou te manaʻomia ai taʻitaʻiga, faapea mataupu silisili e lua e sili ona tāua.