Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NU. 6 2016

 FESOASOANI MO LE AIGA | FAAIPOIPOGA

Le Auala e Faaalia ai le Faaaloalo

Le Auala e Faaalia ai le Faaaloalo

LE LUʻI

Ua faapea mai le tane: “Ina ua ma faaipoipo, na eseese ma manatu ma laʻu avā i le auala e faaalia ai le faaaloalo. E lē faapea e saʻo pe sesē le isi auala, ae e matuā eseese lava o maʻua manatu e faatatau i le faaaloalo. E masani ona ou manatu sa tatau ona faaaloalo laʻu avā i le auala e talanoa mai ai iā te aʻu.”

Ua faapea mai le avā: “O se vaega o le aganuu na ou ola aʻe ai le talanoa leotele, le faaaogāina o foliga vaaia e faailoa ai faalogona, ma le faasalavei atu a o talanoa isi. E lē manatu i na tulaga o se lē faaaloalo. Peitaʻi e matuā tuufaafeagai lava ma le siʻomaga na ola aʻe ai laʻu tane.”

O le faaalia o le faaaloalo i totonu o le faaipoipoga, o se vala e tatau ona faaalia i taimi uma ae e lē mo na o sina taimi. E faapefea ona faaalia o loo e faaaloalo i lau paaga?

MEA E TATAU ONA E ILOA

E faatalitalia e tane le faaalia atu o le faaaloalo. Ua fautuaina i le Tusi Paia tane: “Ia taʻitasi outou ma alofa i lana lava avā e pei ona ia alofa iā te ia lava.” Ua taʻua atili i le Tusi Paia: “O le avā, ia matuā faaaloalo o ia i lana tane.” (Efeso 5:33) E ui e manaʻomia uma e avā ma tane ona lagona le alofa ma le faaaloalo, ae e gaoioi tane e tusa ai ma le faaaloalo e faaalia atu e avā. Ua faapea mai se tane e igoa iā Carlos *: “E manaʻomia e tane ona lagona e mafai ona latou taulimaina ni faigatā, foʻia faafitauli ma tausia le aiga.” Pe a faaalia e se avā le faaaloalo i lana tane mo ia taumafaiga, e lē gata e aogā i lana tane ae faapea foʻi iā te ia. Ua faapea mai se avā e igoa iā Corrine: “E atili ona alofa laʻu tane iā te aʻu pe a ou faaalia le faaaloalo iā te ia.”

E manaʻomia foʻi e avā le faaaloalo. E moni lenā faamatalaga auā e lē mafai ona alofa moni se tane i se avā e lē faaaloalo i ai. Ua faapea mai Tanielu: “E manaʻomia ona ou faaaloalogia manatu ma fautuaga a laʻu avā. E manaʻomia foʻi ona ou faaaloalo i ona faalogona. E lē avea loʻu lē malamalama i le māfuaaga e ese ai ona manatu i se mataupu, ma pogai ou te lē amanaʻia ai ona faalogona.”

Eseese manatu i le auala e faaalia ai le faaaloalo. E lē o faatāuaina lou manatu po o e faaalia le faaaloalo, ae o le manatu tāua po o lagona e lau paaga o loo e faaaloalo iā te ia. O le lesona lenā na aʻoaʻoina e le avā na taʻua i le amataga, i lalo o le ulutala “Le Luʻi.” Ua faapea mai o ia: “E tusa po ou te manatu na ou faaalia le faaaloalo, ae afai e manatu laʻu tane ou te leʻi faaaloalo, e manaʻomia la ona ou faia ni suiga.”

 MEA E MAFAI ONA E FAIA

  • Tusi i lalo ni uiga se tolu e te fiafia ai e faatatau i lau tane po o lau avā. O uiga lelei na e tusia e mafai ona avea ma faavae e atiaʻe ai le faaaloalo.

  • Ia faaalu se vaiaso e iloilo ai oe lava (ae lē o lau paaga) e tusa ai ma vala o loo taʻua i lalo.

O au faamatalaga. E tusa ai ma se suʻesuʻega e faatatau i ulugalii, ua taʻua ai “o ulugalii e fiafia ma mautū a latou faaipoipoga, e latou te faia ni faamatalaga lelei se lima mo manatu lē lelei taʻitasi e fai pe a taulima se faafitauli. I se faaeseesega, o ulugalii o le a tatala a latou faaipoipoga e itiiti ifo ma le tasi (0.8) se faamatalaga lelei e fai mo manatu lē lelei taʻitasi.” *Mataupu silisili o le Tusi Paia: Faataoto 12:18.

Ia fesili ifo: ʻPo ou te talanoa atu i laʻu paaga i se auala faaaloalo? E faafia ona ou faitio pe a faatusatusa i taimi ou te faamālō atu ai? O le ā le ituaiga leo ou te faaaogāina pe a avatu soʻu manatu po o saʻu faitioga?’ Pe e ioe lau paaga i au tali i na fesili?—Mataupu silisili o le Tusi Paia: Kolose 3:13.

Ia faataʻitaʻi: Ia fai ma ou sini le faamālō atu i lau tane po o lau avā i aso taʻitasi. Fautuaga: Ia toe tilofaʻia uiga lelei na e tusiaina. Ia fai ma masani le taʻu atu i lau paaga o ni vala e te fiafia ai e faatatau iā te ia.—Mataupu silisili o le Tusi Paia: 1 Korinito 8:1.

O au gaoioiga. Ua faapea mai se avā e igoa iā Alicia: “E tele loʻu taimi e alu i le faiga o feʻau i le fale, pe a faatāua la e laʻu tane aʻu taumafaiga e ala i le tuu o mea i le mea e tatau ona tuu ai, pe fufulu ipu na ia faaaogāina, ou te lagona ai le aogā o aʻu taumafaiga ma e tāua aʻu i la ma faaipoipoga.”

Ia fesili ifo: ʻPo o atagia atu i le auala o loo oʻu feutagaʻi ai ma laʻu paaga ou te faaaloalo iā te ia? Po o lava le taimi ou te faaaluina ma laʻu paaga ma uaʻi atu iā te ia?’ Pe e ioe lau paaga i au tali i na fesili?

Ia faataʻitaʻi: Ia tusi i lalo ni auala se tolu e te manaʻo e faaalia ai e lau paaga le faaaloalo. Ia tusi foʻi e lau paaga ni auala se tolu e manaʻo e te faaalia atu ai le faaaloalo iā te ia, ona fesuiaʻi lea o lua lisi ina ia mafai ona galue ai le tagata lava ia i na vala. Ia e taulaʻi atu i vala e manaʻomia ona e faaalia ai le faaaloalo. Afai e taulamua le tasi i le faia o le mea lelei, e mautinoa o le a faia foʻi faapea e le isi.

^ pala. 8 Ua suia nisi igoa i lenei mataupu.

^ pala. 14 Mai i le tusi Ten Lessons to Transform Your Marriage.

Faitau Atili

Faalagolago i le Atua mo se Faaipoipoga Fiafia

E lua ni fesili tāua e mafai ona fesoasoani iā te oe e faaleleia ai lau faaipoipoga.