Skip to content

Skip to secondary menu

Skip to table of contents

Molimau a Ieova

Faa-Samoa

Ala Mai!  |  Nu. 5 2017

Mea e Tatau Ona E Iloa e Faatatau i le Faasaoina o le Malosiaga

Mea e Tatau Ona E Iloa e Faatatau i le Faasaoina o le Malosiaga

E TATOU te faalagolago i le malosiaga ina ia maua le ʻea māfanafana ma le ʻea mālūlū i o tatou fale, faagaoioi ai taavale, ma fai ai le tele o galuega masani i aso taʻitasi. Peitaʻi, o loo feagai tagata i le lalolagi atoa ma tulaga faigatā i le faasaoina o le malosiaga.

Na taʻua e Gary mai i Aferika i Saute o se faafitauli “le taugatā o le penisini.” E popole Jennifer mai i Filipaina i le mauaina o le malosiaga, talu ai “o se faafitauli masani le pē soo o le eletise.” Ua faapea mai Fernando mai i El Salvador, “e popole i le aafiaga i le siʻosiʻomaga.” I le tele o vaipanoa i le lalolagi, e faaleagaina le siʻosiʻomaga ona o mea e maua ai le malosiaga.

Ae e te ono fesili, ʻE faapefea ona ou feagai ma nei tulaga faigatā i le faasaoina o le malosiaga?’

E mafai e i tatou uma ona filifili e faaaogā tatau le malosiaga. E maua aogā mai i le faasaoina ma le faaaogāina o le malosiaga. Pe a itiiti le malosiaga e tatou te faaaogāina, o le a tele le tupe e sefe ai. E tatou te puipuia ai foʻi le siʻosiʻomaga, auā o le a lē tele naʻuā ni mea e maumau ai le malosiaga.

Seʻi o tatou iloilo ni vala se tolu atonu e mafai ona tatou faaaogā tatau ai le malosiaga: o tatou fale, auala o femalagaaʻiga ma gaoioiga masani i aso taʻitasi.

O TATOU FALE

Ia faaaogā tatau masini e maua ai le ʻea māfanafana ma le ʻea mālūlū. I se tasi o suʻesuʻega na faia i se atunuu i Europa, na iloa ai o le fetuunaʻi o le masini e faamāfanafana ai le fale i le lua tikeri e maulalo ifo, o le auala sili lea na mafai ona faasaoina ai le malosiaga i lenā tausaga. E lagolagoina foʻi e Derek mai i Kanata lenā manatu. Ua ia faapea mai, “E faasaoina e lo matou aiga le malosiaga pe a fai ni ofu māfanafana i vaitau mālūlū, nai lo o le ki faatau i luga o le masini e maua ai le ʻea māfanafana.”

E faatatau atu foʻi lenā manatu i tau māfanafana. E faaitiitia e Rodolfo mai i Filipaina lona faaaogāina o le masini e maua ai le ʻea mālūlū, e ala i le fetuunaʻi o le masini i se mālūlū talafeagai. O le ā le māfuaaga? Ua ia faapea mai, “E matou te sefeina tupe ma faasaoina foʻi le malosiaga.”

Ia tapuni faamalama ma faitotoʻa pe a ki le masini e faamāfanafana pe faamālūlū ai lou fale. * E mafai ona tatou faasaoina le malosiaga e ala i le tapunipuni o vaega o le fale, ina ia lē alu ese atu ai le ʻea mālūlū po o le ʻea māfanafana i fafo. O se faataʻitaʻiga, o le matala pea o le faitotoʻa i le vaitau mālūlū, o le a tele ai le malosiaga e manaʻomia ina ia māfanafana ai pea totonu o le fale.

E sili atu i lo o le tapuni o faamalama ma faitotoʻa, ua faia e isi tagata nisi auala e faasaoina ai le malosiaga, e pei o le faapipii i totonu o o latou fale o mea e faaitiitia ai le vevela po o le mālūlū (insulation), faapea faamalama e faasaoina ai le malosiaga.

Ia faaaogā matāuila e faasaoina ai le tele o le malosiaga. Ua faapea mai Jennifer lea na taʻua muamua, “Nai lo o le faaaogāina o matāuila e alu ai  le tele o le eletise, na matou faaaogā ituaiga o matāuila fou lea e faasaoina ai le eletise.” E ui e taugatā nei matāuila fou i le taimi muamua e faatau ai, ae e tele le malosiaga e faasaoina ai ma telē le tupe o le a sefe ai mo se taimi umi.

AUALA O FEMALAGAAʻIGA

Pe afai e mafai ia faaaogā auala o femalagaaʻiga. Ua faapea mai Andrew mai i Peretania, “Ou te faaaogā le nofoaafi po o le uilavilivae e alu ai i le galuega pe a talafeagai.” Ua faamanatu mai e le tusi Energy: What Everyone Needs to Know, “A itiiti mai e tolu taimi e sili atu ai le penisini e alu i taavale nai lo o pasi ma nofoaafi, e malaga atu ai i vaipanoa e lata mai.”

Ia fuafua lelei au faigāmalaga. O le fuafua mamao e ono fesoasoani iā te oe e faaitiitia ai le tele o le taimi e te faimalaga ai, faaitiitia ai le malosiaga e faaaogā, ae i le taimi e tasi e faasaoina ai le taimi ma tupe.

E paketi lelei e Jethro mai i Filipaina se tupe e faaalu i masina taʻitasi mo le penisini o lana taavale. Ua ia faamatala, “O le faia faapea e mafai ona ou fuafua lelei ai aʻu faigāmalaga.”

GAOIOIGA MASANI I ASO TAʻITASI

Ia faaitiitia le vai vevela e te faaaogāina. Na taʻua i se tasi o suʻesuʻega, “I se fua faatatau e 1.3% o le malosiaga o loo faaaogā i aai o Ausetalia e alu i le faavevelaina o le vai pe e 27% le malosiaga e faaaogā i fale o aiga taʻitasi.”

Talu ai e faaaogā le malosiaga e faavevela ai le vai, o le faaitiitia la o le vai vevela e faaaogā e faasaoina ai le malosiaga. Ona o lenā manatu ua faapea mai ai Victor mai i Aferika i Saute: “E matou te taumafai e faaitiitia le vai vevela e faaaogā pe a matou taeele.” Ua faapea mai se saienitisi e igoa iā Steven Kenway, “E tolu aogā o le faaitiitia o le vai vevela e faaaogā. E faasaoina ai le vai ma le malosiaga, e faaitiitia ai galuega a le kamupani e faasoaina le vai ma le malosiaga, ma e faasaoina ai tupe e faaalu e aiga.”

Ia tapē. E aofia ai molī, mea e faaaogā ai le eletise, ma isi masini e pei o televise ma komepiuta. E tusa lava pe e tapē nei mea, ae o le tele o na mea o loo faaaogāina pea le malosiaga ona o loo tuua e aunoa ma le tapēina o le eletise (standby mode). Ua fautuaina e nisi o tagata atamamai ina ia seʻi ese le uaea mai i le palaka, pe e faaaogā se multi-plug e iai se ki e tapē ai le eletise ina ia faasaoina ai le tele o le malosiaga. O le mea lenā e masani ona faia e Fernando lea na taʻua muamua. Ua ia faapea mai, “Ou te tapēina molī ma seʻi ese uaea mai i palaka o ni masini ou te lē faaaogāina.”

Atonu e itiiti se mea e mafai ona tatou faia e pulea ai le tau o le malosiaga, pe e faaitiitia ai foʻi aafiaga i le siʻosiʻomaga, ae e mafai ona tatou filifili e faaaogā tatau le malosiaga. O loo taumafai tagata i le lalolagi e saʻili ni auala e faia ai faapea. O le mea moni, o le faasaoina o le malosiaga e ono manaʻomia ai le fuafua mamao ma le tele o taumafaiga, ae e iai aogā. Ua faapea mai Valeria mai Mekisikō, “Ou te sefeina tupe, ma ou te puipuia le siʻosiʻomaga.”

^ pala. 10 Ia mulimuli lelei i faatonuga e aumai mo le faaaogāina o masini e maua ai le ʻea māfanafana ma le ʻea mālūlū. O se faataʻitaʻiga, o nisi masini e iai faatonuga patino i le auala e faaaogā ai, lea atonu e manaʻomia ona tatala pea se faitotoʻa po o se faamalama ina ia maua ai pea se ʻea fou.

Faitau Atili

O Ā AʻOAʻOGA MONI A LE TUSI PAIA

O le ā le Finagalo o le Atua mo le Lalolagi?

Po o le a faataunuuina le finagalo o le Atua mo se lalolagi parataiso? Pe afai o le a faataunuuina, o afea?