Skip to content

Skip to secondary menu

Skip to table of contents

Molimau a Ieova

Faa-Samoa

Ala Mai!  |  Nu. 5 2017

Aai o Astana

 ATUNUU MA TAGATA

Se Asiasiga i Kazakhstan

Se Asiasiga i Kazakhstan

O LE olaga na masani ai tagata Kazakh o le nonofo o ni ē e maumausolo. E oo mai lava i aso nei, e iai tagata Kazakh e leoleoina lafumanu e ave a latou lafumanu i vaipanoa eseese e fua i le tau. Pe a oo i le tau māfanafana, e latou te ō i laufanua i vaega maugā lea e tele ai le vao e aai ai manu. Ae a oo i le vaitau mālūlū, ona latou ō ifo lea i laufanua maualalalo lea e māfanafana.

O isi tagata Kazakh e nonofo i aai e tele ai le tamaoaiga. Peitaʻi, o le tele o a latou aganuu, meaʻai, ma meataulima e atagia mai ai le olaga maumausolo na ola aʻe ai o latou tuaʻā. Ua tuufaasolo mai i tagata Kazakh le tofi o le ʻoa o le gagana i solo, pese, ma musika e tāina i a latou lava meafaifaaili.

 O le yurt, o le faleʻie masani lea o tagata maumausolo, ma ua avea o se faaaʻoaʻoga lelei o le lē faaleagaina e tagata o le siʻosiʻomaga. E sili atu ona fiafia tagata e leoleoina lafu mamoe i le yurt, ma e masani ona faaaogā e tagata Kazakh e nonofo i le aai mo faatasiga faapitoa. E avea foʻi ma fale lelei e nonofo ai turisi. I totonu o le yurt o loo faaalia ai tomai eseese o fafine Kazakh i le suʻisuʻi, lalaga, ma le faia o kapeta.

Totonu o se yurt

E tausia faapelepele foʻi e tagata Kazakh o ē nonofo i nuu maotua a latou solofanua. A itiiti mai e pe ā ma le 21 upu e ave i solofanua e tusa ma ona uiga eseese, ae sili atu ma le 30 taʻu ma faaupuga e faamatala ai lanu o le fulufulu o le solofanua. O se solofanua lelei, e sili ona taugatā ma o se meaalofa e matuā tāua. I nuu maotua, e amata ona aʻoaʻo tama ia iloa tiʻetiʻe solofanua mai lava a o lāiti.

O meaʻai faaleaganuu a tagata Kazakh e tatau lava ona iai se aano o se manu fasi ma e masani e lē feū. E aofia i vaiinu e fiafia i ai tagata Kazakh le koumiss, lea e faia mai i le suāsusu o le solofanua fafine ma e faapea e tele aogā e maua ai mo le soifua mālōlōina. O le isi vaiinu o le shubat lea e faia mai i le suāsusu o le kamela, e lē oona tele ma e totoo.

E talia e le ofisa o le lālā o Molimau a Ieova i Almaty tagata e asiasi atu, ma o loo tatalaina mo maimoaga.

Pe a oo i vaitau māfanafana e nofo le snow leopard lea e faigatā ona maua, i vaega maualuluga o mauga o Kazakhstan