Skip to content

Skip to secondary menu

Skip to table of contents

Molimau a Ieova

Faa-Samoa

Ala Mai!  |  Nu. 5 2016

 MEA O TUTUPU I LE LALOLAGI

Tala Mai i Atunuu i Amerika

Tala Mai i Atunuu i Amerika

Ua faaalia i tala mai i atunuu i le itu i sisifo o le lalolagi le aogā pea o taʻiala o le Tusi Paia.

Faaitiitia le Popole—Faaitiitia le Siakiina o Imeli

E tusa ai ma se suʻesuʻega na faia i Vancouver i Kanata, e faaitiitia le popole o tagata pe afai e na o le faatolu ona siaki a latou imeli i le aso, nai lo o le siakiina i le tele e mafai ai. Ua faapea mai Kostadin Kushlev lea na taʻitaʻia le suʻesuʻega: “E faigatā ona teena e tagata le faaosoosoga o le siakiina o imeli, peitaʻi o le ʻalofia o lea faaosoosoga e faaitiitia ai le popole.”

MAFAUFAU I AI: Ua tatou ola i “aso e sili ona faigatā,” pe e lē tatau ai la ona tatou saʻilia auala e faaitiitia ai le popole?2 Timoteo 3:1.

Toe Faaleleia Mai le Soona Fagotaina o Ogāsami

“E tusa ai ma faamaumauga, ua siitia le numera o le figota o le conch, ula ma le aofaʻiga o iʻa i totonu o ogāsami faasao” i Belize ma isi vaipanoa o le atu Karipiane, o se lipoti lenā i le Wildlife Conservation Society (WCS). Ua toe faaopoopo mai: “A itiiti mai e 1-6 tausaga le umi e toe faaleleia ai tulaga faaleagaina i totonu o ogāsami faasao, peitaʻi ina ia toe faaleleia atoatoa . . . e manaʻomia ai le faitau sefulu o tausaga.” O Janet Gibson o le faatonu o se polokalame a le WCS. Ua ia faapea mai e faatatau i le atunuu o Belize: “E manino mai e lē mafai e ogāsami faasao ona fesoasoani i le faaleleia o faiga faiva i le atunuu faapea le siʻosiʻomaga.”

MAFAUFAU I AI: Pe e lē faaalia mai i faamaoniga maumaututū i le natura o mea le iai o Sē atamai na foafoaina mea?Salamo 104:24, 25.

Faiga Saua i Pasili

Ua lipotia mai e le ofisa fai faasalalauga o le Agência Brasil le faatupulaʻia o faiga sauā i Pasili. I le 2012, e silia i le 56,000 tagata na fasiotia, o le tausaga lea e aupito toʻatele tagata na fasiotia ua faamauina e le Ofisa o le Soifua Mālōlōina. O Luís Sapori e iai sona tomai faapitoa i le puipuiga o le lautele. E talitonu o ia o lenei faatelega, e atagia mai ai le paʻū maualalo o le tulaga tau amio. Ua ia faapea mai, o le taimi lava e lē faaaloalo ai tagata i tulafono o se vaipanoa, “ona amata loa lea ona latou faaaogā faiga sauā e faataunuu ai o latou manaʻoga.”

E TE SILAFIA? Na valoia i le Tusi Paia, e iai le taimi e “maalili” ai le alofa ma faatuputeleina ai le amioleaga.Mataio 24:3, 12.