Skip to content

Skip to secondary menu

Skip to table of contents

Molimau a Ieova

Faa-Samoa

Ala Mai!  |  Nu. 4 2017

 FESOASOANI MO LE AIGA | FAAIPOIPOGA

Pe a Ō Ese le Fanau Mai i le Aiga

Pe a Ō Ese le Fanau Mai i le Aiga

LE LUʻI

E masani ona fesagaʻia e ulugalii luʻi e sili ona faigatā, i le taimi e matutua ai le fanau ma ō ese ai mai i le aiga. O le taimi lenā e ono oo ai iā i laʻua ni faalogona e pei e lē masani le tasi i le isi. Na tusi M. Gary Neuman, o se tagata tomai i mataupu tau i le aiga e faapea: “Ou te fautua i le toʻatele e lē o iloa le auala e toe faamalosia ai faiā ma a latou paaga. Auā a ō ese le fanau e itiiti mea e talanoa pe fefaasoaaʻi ai [mātua].” *

Pe e faapena lau faaipoipoga? Pe afai o lea, e mafai ona toe faaleleia la oulua faiā. Ae seʻi iloilo muamua nisi vala atonu ua māfua ai ona lē toe māfana le lua faiā ma lau paaga faaipoipo.

LE POGAI

Mo le tele o tausaga, na faamuamua le tausiga o le fanau. Ona o ni faanaunauga lelei ua faamuamua ai e le toʻatele o mātua manaʻoga o a latou fanau, nai lo o manaʻoga o a latou faaipoipoga. O le iʻuga, ua masani ai i o latou tiute o ni tamā ma ni tinā ae ua lē toe iai ni fesootaʻiga o ni tane ma ni avā, ma e faatoʻā manino mai lenei tulaga pe a ō ese le fanau. Na taʻua e se avā e 59 tausaga: “A o iai le ma fanau, sa matou faifaimea faatasi.” Ae ina ua ō ese le fanau, na ia taʻutino mulimuli ane “ua ese mea e fiafia i ai le tagata ia.” I se tasi taimi na ia faapea atu i lana tane, “Ua faalavelave le isi i fuafuaga a le isi.”

O nisi ulugalii e leʻi nofosauni mo lenei vala fou o le olaga. Ua taʻua i le tusi Empty Nesting: “O le toʻatele o ulugalii e tai pei lava ua faatoʻā faaipoipo.” O le tele o ulugalii e fai lava le mea e fiafia ai le tagata ia, ona o le lagona e itiiti mea e fiafia faatasi ai, e tai pei lava o ni tagata e na ona tau ina nonofo faatasi i se fale ae e lē o se ulugalii faaipoipo.

O le itu e lelei ai, e mafai ona e ʻalofia lamatiaga ma olioli i aogā o lenei vala fou o le olaga. E mafai ona fesoasoani le Tusi Paia i lenei vala. Seʻi o tatou tilofaʻia pe faapefea.

 MEA E MAFAI ONA E FAIA

Ia taumafai malosi e talia le suiga. Ua faapea mai le Tusi Paia e faatatau i fanau ua matutua: ʻE tuua e le tane lona tamā ma lona tinā.’ (Kenese 2:24) O le faanaunauga o mātua o le toleniina lea o a latou fanau mo lenei vala o le olaga, ma fesoasoani iā i latou e atiaʻe tomai e manaʻomia e avea ai o ni tagata matutua. O le mafaufau i lenā manatu, o le a mitamita ai mātua pe a oo i le taimi e ō ese ai le fanau mai i le aiga.​—Mataupu silisili o le Tusi Paia: Mareko 10:7.

O le mea moni, e avea pea oulua ma mātua. Peitaʻi, i le taimi lenei ua avea oulua o ni faufautua nai lo o ni pule. O lenei vala fou o le olaga ua mafai ai ona faamalosia pea le sootaga ma la oulua fanau, ae i le taimi e tasi e faamuamua lava le lua mafutaga. *​—Mataupu silisili o le Tusi Paia: Mataio 19:6.

Ia faailoa atu ou faalogona. Talanoa atu i lau paaga faaipoipo ma faailoa atu le auala ua aafia ai oe ona o lenei suiga, ona nofosauni lea e faalogo pe a faamatala mai e lau paaga ona faalogona. Ia onosaʻi ma taumafai e malamalama. Atonu e umi se taimi e lua te taumafai ai e faamalosia la oulua faiā o se tane ma se avā, ae e aogā na taumafaiga.​—Mataupu silisili o le Tusi Paia: 1 Korinito 13:4.

Ia saʻili ni mea fou e te lua faia faatasi. Talanoa i ni o oulua sini po o mea foʻi e te lua mananaʻo e fai faatasi o se ulugalii. O le tausia aʻe o le fanau, ua mafai ai ona maua le tele o le atamai aogā. Aiseā la e lē faaaogā ai lenā atamai e fesoasoani atu ai i isi?​—Mataupu silisili o le Tusi Paia: Iopu 12:12.

Ia faailoa atu pea le alofa o le tasi i le isi. Mafaufau i uiga na tosina ai le tasi i le isi. Ia toe mafaufau i le tele o taimi na lua fiafia ai faapea foʻi faafitauli na mafai ona lua foʻia. Pe a faia faapea, e mafai ona avea lenei vala fou o le olaga o se mea lelei. O le mea moni, o le taumafai e galulue faatasi e iloa ai itu e faaleleia atili ai le faaipoipoga, ma toe faaolaola ai le alofa lea na tosina ai le tasi i le isi i le amataga.

^ pala. 4 Mai i le tusi Emotional Infidelity.

^ pala. 12 Pe afai o loo oulua tausia aʻe pea la oulua fanau, ia manatua o oulua o le “tino e tasi.” (Mareko 10:8) Pe a malosi le faiā a mātua, e lagona e le fanau le malupuipuia.

Faitau Atili

E MAFAI ONA FIAFIA LOU AIGA

Ia Faamaoni le Tasi i le Isi

Pe e iai nisi mea e aofia i le faamaoni i le faaipoipoga e ese mai i le ʻalofia o le mulilua?