Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NU. 4 2016

Faleʻie lapotopoto e taʻua o yurts i le vanu o Tash Rabat

 ATUNUU MA TAGATA

Se Asiasiga i Kyrgyzstan

Se Asiasiga i Kyrgyzstan

O KYRGYZSTAN e siʻomia e mauga maualuluga e lilofia i aisa, e tu i Asia Tutotonu ma e tuaoi ma Kazakhstan, Uzbekistan, Tajikistan, ma Saina. E toetoe o le 90 pasene o le atunuu o mauga. O Kyrgyzstan e iai le mauga e sili ona maualuga mai i le faaputuga o mauga e taʻua o Tian Shan, lea e 24,406 futu (7,439 mita) lona maualuga aʻe mai i le fogātai. Pe tusa o le 4 pasene o le laufanua o le atunuu e vaomatua. O lea, o Kyrgyzstan o se tasi lea o vaega o le lalolagi e tele ai le laau e taʻua o le walnut, lea e tupu tele ma e pei o se pinati lona fua.

O loo aʻoaʻo atu e Molimau a Ieova le Tusi Paia i le faitau afe o tagata i Kyrgyzstan

E lauiloa tagata Kyrgyz i le agaga talimālō ma le faaaloalo. I Kyrgyzstan, e ao ona faaaogā le upu faaaloalo mo le “oe” pe a faasino atu i se tagata matua, ma faaavanoa atu i ai lou nofoa e alaala ai i auala o femalagaaʻiga i nofoaga faitele, ma e nofo foʻi lenā tagata i le vaega e sili ona aloaʻia o se laulau.

E masani lava e toʻatolu pe sili atu ni tamaiti o se aiga. O le atalii laʻitiiti e nonofo ma mātua, e tusa po  ua uma ona faaipoipo, ma e na te tausia i laʻua seʻia oo ina matutua.

E aʻoaʻoina fanau teine a o lāiti i tomai aogā e manaʻomia ina ia avea ai ma avā lelei. E atoa ane le 15 i le 17 tausaga o se teine talavou, ua saunia lelei o ia e faia galuega i le fale. E masani ona saunia ni mea e avatu e le teine faaipoipo i le tama faaipoipo. O nei mea atonu e aofia ai so o se ituaiga ʻie moega, so o se ituaiga ofu, ma se kapeta e lalaga. E totogi atu e le tama faaipoipo se tupe ma ni manu i le teine faaipoipo.

I aso faapitoa ma maliu, e fasi ai se mamoe po o se solofanua. E pena i ni vaega ma ua tuumatamaga tagata e ave i ai vaega taʻitasi. E faasoa e fua i le matua ma le tulaga o le tagata, ma e tofu le tagata ma si ona inati; ae o le faaaloalo e laualuga lava i la latou aganuu. Pe a uma, ona tufa loa lea o la latou meaʻai faaleaganuu e taʻua o le beshbarmak. E tausami e faaaogā ai lima.

Le meafaifaaili lauiloa o le komuz