Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NU. 4 2016

Le Manatu o le Tusi Paia i Faiga Faatauatane ma Tauafafine

Le Manatu o le Tusi Paia i Faiga Faatauatane ma Tauafafine

E LĒ o talia lava i le tele o atunuu faaipoipoga i le itupā e tasi. Peitaʻi, i le 2015, na faailoa mai ai e le Faamasinoga Maualuga i Amerika, le aloaʻia faaletulafono o faaipoipoga i le itupā e tasi i le atunuu atoa. Mulimuli ane e tele saʻiliʻiliga na faia e tagata i le Initaneti i lenei mataupu. O se tasi o fesili sa tele ina lāgā, “O le ā le manatu o le Tusi Paia i faaipoipoga i le itupā e tasi?”

E lē o iai se faamatalaga patino a le Tusi Paia e faatatau i aiā tatau e tusa ai o faaipoipoga i le itupā e tasi. Ae o le fesili e sili ona tāua, O le ā le manatu o le Tusi Paia e faatatau i faiga faatauatane ma tauafafine?

E toʻatele tagata e mafaufau ua latou iloa le tali, e aunoa ma le suʻesuʻeina totoʻa o le Tusi Paia. Peitaʻi e feteenaʻi a latou tali! Ua faapea mai nisi o loo manino e inosia i le Tusi Paia faiga faatauatane ma tauafafine. Ae ua faapea mai isi o le poloaʻiga i le Tusi Paia ia “alofa atu i lou tuaoi,” e lagolagoina ai so o se faiga taufeusuaʻiga.—Roma 13:9.

O LE Ā LE MANATU O LE TUSI PAIA?

O fea o faamatalaga nei e te faapea mai e saʻo?

  1. E taʻusalaina i le Tusi Paia faiga faatauatane ma tauafafine.

  2. E faataga i le Tusi Paia faiga faatauatane ma tauafafine.

  3. O loo uunaʻia i le Tusi Paia le ʻinoʻino po o le faailogatagata i ē e tauatane ma tauafafine.

TALI:

  1. SAʻO. Ua taʻua i le 1 Korinito 6:9, 10: “O tane e momoe ma isi tane . . . e lē fai mo latou tofi le malo o le Atua.” E faatatau foʻi lenei manatu i tamaʻitaʻi ma fafine.—Roma 1:26.

  2. SESĒ. Ua aʻoaʻoina i le Tusi Paia e na o se tane ma se fafine ua faaipoipo e tatau ona faia feusuaʻiga.—Kenese 1:27, 28; Faataoto 5:18, 19.

  3. SESĒ. E ui lava e taʻusalaina i le Tusi Paia faiga faatauatane ma tauafafine, ae e lē o faalaeiauina ai le faailogatagata, faiga faasolitulafono, po o so se auala lē lelei lava e faia i ē e tauatane ma tauafafine.—Roma 12:18. [1]

 O le ā le Talitonuga o Molimau a Ieova?

E talitonu Molimau a Ieova o taʻiala tau amio a le Tusi Paia, o le auala aupito i sili lea ona lelei e ola ai, ma ua latou filifili e tausisi i na taʻiala. (Isaia 48:17) [2] O lea e teena ai e Molimau a Ieova amioga lē mamā uma taufeusuaʻiga, e aofia ai faiga faatauatane ma le tauafafine. (1 Korinito 6:18) [3] O le ituaiga olaga lenā ua filifilia e Molimau a Ieova, ma o la latou lava lenā filifiliga saʻoloto.

E taumafai Molimau a Ieova e mulimuli i le Tulafono Faaauro, e ala i le feutagaʻi ma isi i le auala e latou te mananaʻo e feutagaʻi mai ai isi iā i latou

I le taimi e tasi, e taumafai Molimau a Ieova e “tausisi i le filemu ma tagata uma.” (Eperu 12:14) E latou te teena faiga faatauatane ma tauafafine, ae e latou te lē faamalosia isi ia talitonu i o latou manatu, e latou te lē faia foʻi ni soligatulafono e faaalia ai le ʻinoʻino i tagata e faia ia faiga, pe fiafia pe a faalogo i ni faiga solitulafono na faia iā i latou. E taumafai Molimau a Ieova e mulimuli i le Tulafono Faaauro, e ala i le feutagaʻi ma isi i le auala e latou te mananaʻo e feutagaʻi mai ai isi iā i latou.—Mataio 7:12.

Pe e Lagolagoina i le Tusi Paia le Faailogatagata?

O isi ua faapea mai e lagolagoina i le Tusi Paia le faailogatagata i ē e tauatane ma tauafafine, ma o ē e mulimuli i taʻiala tau amio a le Tusi Paia e faailogatagata. Ua latou faapea mai, ʻE leʻi fetuutuunaʻi mafaufau o tagata i le taimi na tusia ai le Tusi Paia. Ae i aso nei ua tatou talia tagata uma po o le ā lava le tupuaga, atunuu, po o faiga tau feusuaʻiga e mananaʻo i ai.’ E latou te manatu o le teena o ē e tauatane ma tauafafine, e tutusa lenā ma le teena o tagata e ese o latou lanu. Pe e saʻo lenā faatusatusaga? E leai. Aiseā?

Talu ai e eseese le teena o amioga faatauatane ma tauafafine, ma le teena o tagata e tauatane ma tauafafine. Ua taʻua i le Tusi Paia e tatau i Kerisiano ona faaaloalo i ituaiga uma o tagata. (1 Peteru 2:17) [4] Peitaʻi e lē uiga atu lenā manatu e tatau ona talia e Kerisiano ituaiga uma o amioga.

Seʻi manatu i se faatusatusaga: Seʻi faapea e te manatu i le ulaula e leaga ma matuā ʻinoʻino i ai. Ae faapefea pe afai o se tasi e te lua faigaluega e ulaula? Po o le a avea oe ma sē e lē fetuutuunaʻi ona e ese lou manatu e faatatau i le ulaula? Po o le a faapea ai e te faailogatagata iā te ia ona e te lē ulaula? Afai e tauanau oe e lē e te lua faigaluega e sui lou manatu i le ulaula, po ua lē avea ai o ia ma sē e lē fetuutuunaʻi ma faailogatagata?

Ua filifili Molimau a Ieova e ola e tusa ai ma taʻiala tau amio a le Tusi Paia. E latou te lē taliaina gaoioiga e taʻusalaina i le Tusi Paia. Ae e latou te lē faifai pe faileagaina tagata e ese a latou faiga mai iā i latou.

Po ua Faasāsā Naʻuā le Tusi Paia?

Ae faapefea tagata e iai o latou faanaunauga tauatane ma tauafafine? Pe na fananau mai ma na faanaunauga? Pe afai o le tulaga lenā, po ua faasāsā naʻuā pe a faapea atu e sesē ona latou gaoioi e tusa ai ma o latou tuʻinanauga?

E leai se faamatalaga i le Tusi Paia e faapea na fananau mai nisi e tauatane ma tauafafine, e ui o loo taʻua ai o nisi tagata e iai ni uiga ua matuā mauaa iā i latou. Peitaʻi, ua taʻua i le Tusi Paia pe afai e tatou te mananaʻo e faafiafia le Atua, e tatau ona matuā teena amioga e aofia ai faiga faatauatane ma tauafafine.—2 Korinito 10:4, 5.

Ua faapea mai nisi ua faasāsā naʻuā le Tusi Paia. Peitaʻi o o latou manatu e faavae mai i le manatu e faapea, e tatau ona tatou gaoioi e tusa ma o tatou tuʻinanauga. Pe faapea mai foʻi e tāua tele tuʻinanauga i feusuaʻiga, e lē tatau la ona taofiofia ma e lē mafai lava ona pulea. Peitaʻi, ua faamamaluina i le Tusi Paia tagata e faapea e mafai ona latou teena na tuʻinanauga. I le lē pei o meaola, e mafai ona filifili tagata e lē gaoioi e tusa ma o latou tuʻinanauga.—Kolose 3:5. [5]

 Seʻi manatu i se faatusatusaga: Ua fai mai nisi tagata atamamai, o uiga e pei o le ita, e ono tuufaasolo mai i mātua. E leai se faamatalaga patino a le Tusi Paia o le ita e tuufaasolo mai i mātua, ae o loo faapea mai o nisi tagata e “itaitagofie” ma “ita leaga.” (Faataoto 22:24; 29:22) Peitaʻi ua taʻua foʻi i le Tusi Paia: “Inā tuu ia le ita ma soia le lotoa.”—Salamo 37:8; Efeso 4:31.

E toʻaitiiti i latou e lē ioe i lenei fautuaga pe faapea mai ua soona faasāsā mo ē o loo iai faanaunauga ita. O le mea moni, e oo lava i na tagata atamamai o ē e talitonu o le ita o se uiga e fanau mai ma se tasi, o loo taumafai malosi foʻi e fesoasoani i tagata ina ia pulea na faanaunauga.

O le tulaga foʻi lenā o loo faia e Molimau a Ieova i so o se amioga e feteenaʻi ma tapulaa a le Tusi Paia, e aofia ai feusuaʻiga i le va o se alii ma se tamaʻitaʻi e leʻi faaipoipo. O nei tulaga uma e faatatau i ai le fautuaga i le 1 Tesalonia 4:4, 5: “Ia taʻitasi outou ona iloa pulea o lona lava tino ina ia paia ma mamalu, ae e lē o le tuʻinanau o le manaʻo tele i feusuaʻiga.”

“Sa Faapena Foʻi Nisi o Outou”

E eseese uma talaaga ma olaga na ola ai i latou na mananaʻo e avea ma Kerisiano i le uluaʻi senituri, ma na faia e nisi ni suiga mataʻina i o latou olaga. O se faataʻitaʻiga, o loo taʻua i le Tusi Paia “ē e faitaaga, o ē e ifo i tupua, o ē e mulilulua, o tauatane, o tane e momoe ma isi tane,” ona faapea atili mai lea: “Sa faapena foʻi nisi o outou.”1 Korinito 6:9-11.

Ina ua faapea mai “sa faapena foʻi nisi o outou,” po o uiga atu le Tusi Paia o le a lē toe iai lava ni tuʻinanauga faapena i ē ua lē toe faia faiga faatauatane ma tauafafine? E lē o le tulaga lenā, auā ua lapataʻi mai foʻi le Tusi Paia: “Ia outou savavali pea i la le agaga, ona outou lē faia lea o tuʻinanauga o le tino.”—Kalatia 5:16.

Ia mātau, e lē o faapea mai le Tusi Paia o le a lē iai lava i se Kerisiano se tuʻinanauga lē talafeagai. Nai lo o lea, o loo faapea mai o le a filifili se Kerisiano e lē faatinoina lenā tuʻinanauga. Ua aʻoaʻoina Kerisiano ia pulea na tuʻinanauga, nai lo o le mafaufau pea i ai ma iʻu ai ina faatino.—Iakopo 1:14, 15. [6]

O lea, o loo faaeseese mai i le Tusi Paia tuʻinanauga ma gaoioiga. (Roma 7:16-25) O se tagata e iai ni tuʻinanauga faatauatane pe tauafafine, e mafai ona ia pulea mea e mafaufau i ai, e pei lava foʻi ona ia pulea so o se tuʻinanauga sesē, e aofia ai faanaunauga matapeʻapeʻa, ita, ma le mulilua.—1 Korinito 9:27; 2 Peteru 2:14, 15.

E ui e tausisi Molimau a Ieova i taʻiala tau amio o loo i le Tusi Paia, ae e latou te lē faamalosia atu o latou manatu i isi. E latou te lē taumafai foʻi e suia tulafono ia e puipuia aiā tatau a ē e ese le auala e ola ai mai iā i latou. O le feʻau o loo talaʻia e Molimau a Ieova o se feʻau lelei, ma e latou te naunau e faailoa atu i ē uma o le a faalogo mai.—Galuega 20:20.

^ 1. Roma 12:18: “Ia nonofo filemu ma tagata uma.”

^ 2. Isaia 48:17: “O aʻu o Ieova, lou Atua, o Lē o loo aʻoaʻo oe i mea e aogā iā te oe.”

^ 3. 1 Korinito 6:18: “Ia sosola ese i le faitaaga.”

^ 4. 1 Peteru 2:17: “Ia āva i ituaiga uma o tagata.”

^ 5. Kolose 3:5: “O le mea lea, ia fasiotia tuʻinanauga i o outou itutino, o le faitaaga, o amioga lē mamā, le tuʻinanau i feusuaʻiga.”

^ 6. Iakopo 1:14, 15: “Ua faaosoosoina tagata taʻitoʻatasi ona ua tosina ma maileia i ona lava tuʻinanau. Auā a tō le tuʻinanau, ona fanau mai ai lea o le agasala.”