Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NU. 4 2016

 LE MANATU O LE TUSI PAIA

Aulelei Faaletino

Aulelei Faaletino

Pe a paleni le vaaiga i le aulelei faaletino, o le a mafai ona iloa ai le eseesega o le fiafia ma le lē fiafia.

Aiseā e tatou te amanaʻia ai le aulelei?

E lē o mafai lava ona faamatalaina pe aiseā e amanaʻia ai e le mafaufau o le tagata le aulelei o se tasi ma le matagofie o se mea. E lē o faamatalaina i le Tusi Paia pe faapefea ona tupu lenei tulaga, peitaʻi o loo taʻua mai ai e māfua ona tatou mātauina le aulelei o se isi po o le matagofie o se mea, ona na faia i tatou e le Atua i lona faatusa. (Kenese 1:27; Failauga 3:11) Na ia faia foʻi le tino lavelave o le tagata ma tuu i ai ona vaega mataʻina eseese ma o latou aogā. O le pogai lenā na tusi ai se tusi pese anamua: “Ou te faaneenee atu iā te oe [Atua], auā ua e faia aʻu i se auala mataʻutia ma ofoofogia.”—Salamo 139:14.

Peitaʻi o aso nei ua masani ona lē paleni le vaaiga a tagata i le aulelei faaletino, o se tulaga ua faaauiluma e pisinisi e faia laʻei ma teuga, faapea faasalalauga lauiloa. E tusa ai ma le tusi Body Image, i ni suʻesuʻega na faia i aganuu a atunuu i Sisifo, “ua taʻua e faapea e tusa pe lelei uiga o se tagata, ae e faatoʻā aulelei lava pe a aulelei foliga vaaia.” Peitaʻi o lea vaaiga pū moomoo ua lē amanaʻia ai le mea e sili ona tāua, o le loto lea o le tagata.—1 Samuelu 16:7.

E tele aganuu e soona faatāua ai foliga vaaia ma le aulelei mai i le itu tau feusuaʻiga

E lē gata i le taulaʻi atu i le aulelei i le tino, ae ua faatupulaʻia foʻi le faatāua naʻuā o foliga faatosina, aemaise lava i tamaʻitaʻi. Ua taʻua i se lipoti a le American Psychological Association i le 2007 (APA): “E toetoe o ituaiga faasalalauga uma na iloiloina, ua matuā faamaonia mai ai le faatāua o foliga faatosina o tamaʻitaʻi.” Peitaʻi ua matuā uunaʻia i tatou i le Tusi Paia ia ʻalofia le taaʻina i na faanaunauga, ona o se māfuaaga lelei!—Kolose 3:5, 6.

“Aua foʻi neʻi faia a outou teuga e tusa ai ma le vaaiga a tagata . . . , ae o le tagata lilo i totonu, ia teu i le mea e lē pala o le agaga agamalu ma le filemu, o le mea tautele lava lea i le silafaga a le Atua.”1 Peteru 3:3, 4.

Aiseā e atamai ai ona iai se vaaiga paleni?

Ua faapea mai nisi e tusa ai ma le aulelei faaletino: “Pe afai e te aulelei, aua le nanāina!” Ua taʻua i se lipoti a le APA, i atunuu e taatele ai lenei manatu, e mafaufau teine talavou ma teineiti ua lata i na tausaga, o i latou ʻo le taulaʻiga o faanaunauga o isi, e vaavaai atu tagata iā i latou ma mātauina lo latou aulelei.’ E matuā lē lelei lava lenā manatu. I le lipoti a le APA, ua avea lenā tulaga o se popolega autū i le soifua mālōlōina ma  le auala e vaai ai i tagata, ona e ono iʻu ai i le “tele o aafiaga lē lelei i le itu tau faalogona.” E ono aofia ai le ʻpopole ma faalogona lē fiafia o le tagata iā te ia lava, lē lelei le ʻai, lē mautinoa iā te ia lava, ma uiga faanoanoa pe mafatia.’

“Inā faateʻa ese ia mai i lou loto o mea e te tigā ai, ma puipuia lou tino mai i mala; auā o lou talavou ma lou tauleʻaleʻa e faatauvaa ia.”Failauga 11:10.

O le ā le vaaiga e atagia mai ai se mafaufau lelei?

I le Tusi Paia e fesootaʻi le “mafaufau lelei” ma le onomea. (1 Timoteo 2:9) Seʻi manatu: O tagata e onomea e lē soona popole naʻuā i le aulelei o o latou foliga vaaia, ae e paleni la latou vaaiga e faatatau iā i latou lava. E latou te amanaʻia faalogona o isi, e faaaloalogia ma fiafia mai isi iā i latou, ae sili ai e latou te maua le finagalo malie o le Atua. (Mika 6:8) E latou te maua foʻi ni uō moni ma ni paaga faaipoipo lelei, o ē e lē tau ina mananaʻo i le māfana i le itu faaletino, ae ia maua se faaipoipoga e tumau ma fiafia.

O lea, e tele māfuaaga lelei ua apoapoaʻi mai ai le Tusi Paia iā i tatou ia taulaʻi i le tagata i totonu, “o le tagata lilo i totonu.” (1 Peteru 3:3, 4) O le aulelei i foliga vaaia e faifai muta, ae e lē mafai ona suia le tagata lilo po o uiga lelei o se tagata. E mafai ona faaleleia uiga lelei a o faasolo taimi! Ua taʻua i le Faataoto 16:31: “O le ulusinā o le pale matagofie lea pe a iai i le ala o le amiotonu.” O lea, o i latou uma e utagia le fautuaga sili ona aogā a le Tusi Paia, e tusa pe lāiti pe matutua, e lē gata o le a latou maua le aulelei tumau, ae e faamamaluina foʻi ma faamalieina.

“O le amio tauagafau e pepelo, e lē aogā foʻi le aulelei; a o le fafine e mataʻu iā Ieova, e viia lava o ia.” Faataoto 31:30.

Faitau i tali o nisi o fesili faale-Tusi Paia i le www.jw.org/sm

Faitau Atili

E Faapefea Ona Aogā iā i Tatou Mataupu Silisili o le Tusi Paia?

Na taʻua e Iesu le māfuaaga e tatou te manaʻomia ai taʻitaʻiga, faapea mataupu silisili e lua e sili ona tāua.