Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NU. 4 2016

 MATAUPU AUTŪ

Auala e Pulea ai Au Masaniga

Auala e Pulea ai Au Masaniga
  • E TATAGI le uati a Aokuso o loo fia moe pea. Ae ua nofo vave i luga ma fai ona ofu toleni ia na sauni i le pō a o leʻi moe, ma alu loa e tamoʻe mo se taimi puupuu. O lana masani lea e faatolu i le vaiaso mai i le tausaga ua mavae.

  • Faatoʻā uma lava le misa a Lori ma lona toʻalua. Ua ita ma lē fiafia, ua televave atu i le umukuka, ma aumai le pepa sukalati ma ʻai uma, e pei ona ia masani ai i taimi uma e ita ai.

O le ā se mea e tutusa ai Aokuso ma Lori? E tusa po o la iloaina pe leai, ae ua aafia i laʻua uma i se aafiaga sili, o a laʻua masaniga.

Ae faapefea oe? Po o iai ni masaniga lelei o e manaʻo e atiaʻe i lou olaga? Atonu o lou sini ia faamalositino e lē aunoa, ia lava le moe, pe ia fesootaʻi pea ma ē e pele iā te oe.

I le isi itu, atonu o loo e manaʻo e taofia se masaniga leaga, e pei o le ulaula, soona ʻai i meaʻai e lē maua ai se malosi, po o le faaalu foʻi o le tele o le taimi i le Initaneti.

O le mea moni, e lē faigofie ona foʻia se masaniga leaga. E masani ona faatusa se masaniga leaga, e pei o se moega māfanafana i se aso mālūlū, e faigofie ona oso ai i luga ae e faigatā ona alu ese mai ai!

E mafai la faapefea ona e pulea au masaniga ma avea o ni mea e aogā iā te oe nai lo o le faaleagaina ai? Seʻi iloilo auala e tolu o loo mulimuli mai, e faavae mai i mataupu silisili o le Tusi Paia.