Skip to content

Skip to secondary menu

Skip to table of contents

Molimau a Ieova

Faa-Samoa

ALA MAI! NU. 4 2016

 MATAUPU AUTU | AUALA E PULEA AI AU MASANIGA

3. Ia Maumauaʻi

3. Ia Maumauaʻi

Ua taʻua e se tasi tagata atamai, e 21 aso e manaʻomia ina ia faatumau ai se masaniga fou. Ae ua iloa mai i suʻesuʻega, o nisi tagata e itiiti ifo le taimi e manaʻomia, ae o isi e tele atu le taimi e manaʻomia ina ia faia ai ni suiga tāua. Pe e avea lenā manatu ma itu e te lotovaivai ai?

Seʻi mafaufau i le tulaga lenei: Seʻi faapea ua e manaʻo e atiaʻe se masaniga o le faamalositino faatolu i le vaiaso.

  • I le vaiaso muamua, ua ausia lou sini.

  • I le vaiaso lona lua, ua misi le aso e tasi.

  • I le vaiaso lona tolu, ua toe ausia lou sini.

  • I le vaiaso lona fā, toeitiiti uma le vaiaso e te leʻi faamalositino.

  • I le vaiaso lona lima, ua toe ausia lou sini ma ua faaauau ai lava i vaiaso taʻitasi.

E lima vaiaso na faaalu ina ia faatumau ai lau masaniga fou. E foliga mai o se taimi umi, ae e ausia loa lou sini o le a e fiafia ona ua e atiaʻe se masaniga fou lelei.

MATAUPU SILISILI O LE TUSI PAIA: “E faafitu ona paʻū o lē e amiotonu ma o le a toe tulaʻi o ia.”Faataoto 24:16.

O loo faalaeiau mai le Tusi Paia ia maumauaʻi. O le mea e sili ona tāua o taimi e te toe tulaʻi ai ma faaauau, ae e lē o taimi e te paʻū pe lē taulau ai.

O le mea e sili ona tāua o taimi e te toe tulaʻi ai ma faaauau, ae e lē o taimi e te paʻū pe lē taulau ai

MEA E MAFAI ONA E FAIA

  • Aua neʻi manatu afai ua e lē taulau o lona uiga o le a e lē taulau ai pea. Ia faatalitalia e iai taimi e te lē taulau ai a o taumafai e ausia lou sini.

  • Ia taulaʻi atu i taimi na saʻo ai mea. O se faataʻitaʻiga, pe afai o e taumafai e faaleleia le auala e te fesootaʻi ai i lau fanau, ia fesili ifo: ʻO fea le taimi mulimuli na ou fia avaavau ai i laʻu fanau ae ou te leʻi faia faapea? O le ā laʻu mea na fai? E faapefea ona ou toe faia faapea?’ O fesili faapena e fesoasoani e te faia ai pea mea na e taulau ai, nai lo o le mafaufau i mea na e lē taulau ai.

Pe e te fia iloa pe faapefea i mataupu silisili o le Tusi Paia ona fesoasoani iā te oe i isi vala o le olaga, e pei o le feagai ai ma popolega, atiaʻe se aiga fiafia, ma le mauaina o le fiafia moni? Ia talanoa atu i se Molimau a Ieova pe tagaʻi i la matou Upega tafaʻilagi o le jw.org/sm.

Faitau Atili

TALA LELEI MAI I LE ATUA!

E Faapefea Ona Aogā iā i Tatou Mataupu Silisili o le Tusi Paia?

Na taʻua e Iesu le māfuaaga e tatou te manaʻomia ai taʻitaʻiga, faapea mataupu silisili e lua e sili ona tāua.