Skip to content

Skip to secondary menu

Skip to table of contents

Molimau a Ieova

Faa-Samoa

Ala Mai!  |  Nu. 3 2017

 PE NA TEʻI LAVA UA IAI?

Le Fulufulu o le Sea Otter

Le Fulufulu o le Sea Otter

O LE tele o manu e nonofo latalata i vai mālūlū, e iai le gaʻo mafiafia i o latou tino lea e fesoasoani ina ia māfanafana ai. Ae e faalagolago le sea otter i lona fulufulu mafiafia ina ia maua ai le māfanafana.

Ia Mātau: O le fulufulu o le sea otter e sili atu ona māfiafia i lo o le fulufulu o se isi lava manu, ma e pe ā ma le tasi le miliona lauulu ninii e maua i se vaega e tasi le inisi faatafafā (155,000 lauulu ninii i le tasi senitimita faatafafā) o le tino o lenei manu. A o aau le sea otter, e taofia le ʻea i le va o lona fulufulu ma le paʻu o lona tino. E fesoasoani lenā ʻea e māfanafana ai, ma taofia ai le vai mālūlū mai i le paʻi saʻo i le paʻu o le manu, ma aveesea ai le māfanafana o lona tino.

E talitonu saienitisi e iai se lesona e maua mai i le fulufulu o le sea otter. Na latou faia ni suʻesuʻega i le tele o ofu māfanafana e lē faia mai i fulufulu o manu, ma faatusatusa le eseesega o le uumi o lauulu ninii ma le va o ia lauulu ninii. Ua mautinoa mai i nei suʻesuʻega “o le mafiafia ma le uumi o lauulu ninii nei, o le sili foʻi lenā ona mago ma lē susū ai le ofu.” I nisi faaupuga, pe ana faapea e faia ofu māfanafana mai i le fulufulu o le sea otter, o le ofu māfanafana la lenā e pito sili ona lelei.

E faamoemoe tagata suʻesuʻe o a latou suʻesuʻega e iʻu ai i le alualu i luma o le poto faaonapōnei, i le faia o ofu e taofia le susū mai i le paʻi atu i le tino o le tagata. Atonu e tomānatu nisi, pe e lē sili atu la i tagata e masani ona maulu i vai mālūlū ona oofu i ofu maulu e faia mai i fulufulu, lea e taitutusa ma le fulufulu o le sea otter?

O le ā sou manatu? Pe na teʻi lava ua iai le fulufulu o le sea otter lea e na te maua ai le māfanafana? Pe na foafoaina?