Skip to content

Skip to secondary menu

Skip to table of contents

Molimau a Ieova

Faa-Samoa

Ala Mai!  |  Nu. 3 2016

O Meaʻai e Pata ai le Tino ma Meaʻai e Ono Teena e le Tino—O le ā le Eseesega?

O Meaʻai e Pata ai le Tino ma Meaʻai e Ono Teena e le Tino—O le ā le Eseesega?

Emily: “Ua tuu i lalo laʻu tui na ou ʻai ai ma ua amata ona lē lelei oʻu faalogona. Ua mageso loʻu gutu ma ua fula loʻu laulaufaiva. Ua amata ona niniva loʻu ulu ma ua tau puni laʻu mānava. Ua pata oʻu lima ma loʻu ua. Sa ou taumafai i se auala e foʻia ai loʻu popole peitaʻi na ou iloa ua tatau loa ona ou alu i le falemaʻi.”

O LE toʻatele o tagata e fiafia tele i le tausami. Peitaʻi, e iai nisi ua avea isi meaʻai ma o latou “fili” e pei o Emily lea e taʻua i luga, o loo mafatia i le pata o le tino ona o meaʻai. O le tulaga matuiā o Emily e taʻua o le anaphylaxis, e sili ona leaga ona aafiaga. O le mea e lelei ai ona e lē o tagata uma e aafia i le pata o le tino e tugā faapea o latou tulaga.

I tausaga talu ai nei, na lipotia ai le faatupulaʻia o ē e pata o latou tino i meaʻai, ma ē e aafia i meaʻai e ono teena e le tino. Peitaʻi, na faaalia i nisi o suʻesuʻega, e na o se vaega o tagata na faapea mai e pata o latou tino i meaʻai, na faamaonia mai e se fomaʻi.

O le ā le Uiga o Meaʻai e Pata ai le Tino?

I se lipoti a se vaega o saienitisi na taʻitaʻia e Dr. Jennifer J. Schneider Chafen, lea na lomia i le mekasini The Journal of the American Medical Association na taʻua ai: “E eseese manatu o tagata i le uiga o meaʻai e pata ai le tino.” Peitaʻi, o le toʻatele o tagata atamamai e talitonu o āuga e aafia ai mai i nei meaʻai, e māfua mai i le malosi o le tino e tetee ai i faamaʻi.

O āuga e aafia ai ona o se meaʻai, e masani ona tupu ona o se polotini o loo iai i lenā meaʻai. E faailoga sesē e le malosi o le tino e tetee atu ai i faamaʻi lenā polotini o se lamatiaga i le tino. Pe a ulu atu se ituaiga polotini i le tino, e ono gaosi e le malosi o le tino e tetee atu ai i faamaʻi se vailaau (antibody) e taʻua o le IgE, e tapē ai lenā polotini. Pe a toe ulu atu lea polotini i le tino, ona faamatuu mai lea e le vailaau (IgE) na muaʻi gaosia nisi vailaau e aofia ai le histamine.

I tulaga masani, e telē le tāua o le histamine i le malosi o le tino e tetee ai i faamaʻi. Peitaʻi, e iai māfuaaga e lē o manino lelei i le taimi nei, pe aiseā e māfua ai ona aliaʻe āuga o le pata o le tino ona o le vailaau o le IgE, ma le faamatuu mai o le vailaau o le histamine, aemaise iā i latou e tugā o latou tulaga ona o se polotini.

O le māfuaaga lea e te lē iloaina ai ni āuga i le taimi muamua e te ʻai ai i se meaʻai fou, peitaʻi o le isi taimi e te toe ʻai ai i le meaʻai lava lenā, ona pata loa lea o le tino.

O le ā le uiga o Meaʻai e Ono Teena e le Tino?

O āuga e aliaʻe mai i meaʻai e ono teena e le tino atonu e māfua mai i se meaʻai, e pei lava foʻi o meaʻai e pata ai le tino. Peitaʻi e ese mai meaʻai e pata ai le tino (lea e māfua mai i le malosi o le tino e tetee ai i faamaʻi), o meaʻai e ono teena e le tino e māfua mai i le totoga e faamalū ai meaʻai ae e lē o aafia ai  ni vailaau. Aemaise lava, pe afai o le tagata lea atonu e iai se faafitauli i le totoga e faamalū ai meaʻai, pe atonu foʻi o le lē lava o le polotini pe māfua foʻi ona o se vailaau o loo i se meaʻai lea ua faigatā ai ona faamalū. O se faataʻitaʻiga, o se ituaiga suka e maua mai i le susu po o sisi lea e faigatā i le puta ona gaosi se ituaiga polotini e manaʻomia ina ia faamalū ai.

Talu ai e lē aofia ai le gaosiga o se vailaau lea e faia e le tino, o lea o meaʻai e ono teena e le tino, e iloa ona āuga i le taimi lava e te tausami ai. O le tele o lau tausami atonu o se isi lea pogai, auā e ono lē afāina lava pe a itiiti lau tausami. Peitaʻi e tulaʻi mai se faafitauli pe a e soona tausami i lea meaʻai. E ese mai lea mai i le tugā o meaʻai e pata ai le tino, auā e tusa lava pe itiiti se meaʻai e taumafaina e ogaoga lava ona aafiaga.

O Āuga

Pe afai e iai ni meaʻai e pata ai lou tino, atonu o nisi nei o āuga, e aofia ai le mageso, pata, fula o le faaʻī, mata, po o le laulaufaiva, faafaufau, faasuati, ma le manava tatā, ae pe a tugā tele e maulalo le toto, niniva, matapogia po o le pē foʻi o le fatu. E ono vave ona matuā tugā āuga o le aafia i meaʻai e pata ai le tino, lea e taʻua o le anaphylactic ma e ono maliu ai.

O le pata o le tino e ono māfua mai i soo se meaʻai. Peitaʻi o le tele lava o meaʻai e tugā ai le pata o le tino, e masani lava o meaʻai e pei o le susu, fuāmoa, iʻa, ula, tugage, pinati, ituaiga o pi, fatu ma karite. E lē faatapulaaina le matua o se tasi e aafia i meaʻai e pata ai le tino. Ua iloa mai i suʻesuʻega e mafai ona tuufaasolo mai i mātua, ma e telē le avanoa e aafia ai se tamaitiiti pe afai o ona mātua po o se tasi o ona mātua, e pata le tino i se meaʻai. O se tulaga masani le mafai ona lē toe aafia tamaiti i le pata o le tino pe a matutua.

E masani lava o āuga o meaʻai e ono teena e le tino, e lē tugā tele e pei o āuga o meaʻai e pata ai le tino. O meaʻai e ono teena e le tino, e ono māfua ai le tigā o le manava, fula le manava, tele le ʻea i le manava, migi uaua, tigā le ulu, pata ma eeva le tino ma iai faalogona maʻi. Atonu o nisi meaaʻi e ono teena e le tino o meaʻai e pei o le susu, sisi, karite, ituaiga o falaoamata, ʻava malosi ma se ituaiga o fefete.

Auala e Iloa ma Foʻia Ai

Pe afai ua e manatu e pata lou tino i meaai pe e teena e lou tino ni meaʻai, atonu e lelei ona vaai se fomaʻi faapitoa. O lou faia e oe lava ia o le faaiʻuga e te lē toe tausami i se meaʻai, atonu e lē lelei i nisi taimi auā ua e lē maua ai vaitamini ia e manaʻomia e lou tino.

E leai se auala patino e foʻia ai le tugā o le pata o le tino i meaʻai nai lo le lē toe tausami i na meaʻai. * Ae i le isi itu, afai e lē tugā tele lou tulaga i meaʻai e pata ai le tino po o meaʻai e ono teena e le tino, atonu e aogā mo oe le faaitiitia o le tausami pe aua foʻi le tausami soo i na meaʻai. Peitaʻi i nisi tulaga, ua filifili ē e aafia e ʻalofia meaʻai e lē lelei mo i latou, pe e lē toe tausami ai mo se taimi e fua i le matuiā o o latou tulaga.

O lea, pe afai e te aafia i le pata o le tino ona o ni meaʻai, po o meaʻai e ono teena e le tino, e fesoasoani le iloaina e toʻatele isi o loo aafia o loo mafai lava ona pulea o latou tulaga, ma olioli i le tofo eseese o meaaʻi susua.

^ pala. 19 E masani ona fautuaina ē e iai aafiaga tugā ona o le pata o le tino mai i ni meaʻai, e feaveaʻi se tui faapitoa e iai le vailaau o le adrenaline (epinephrine) lea e mafai ona latou tuiina i o latou tino pe a tulaʻi mai se tulaga faafuaseʻi. O nisi fomaʻi faapitoa e latou te fautuaina tamaiti e aafia i le pata o le tino, e ave pe fai se faailoilo e faigofie ona iloa ai e faiaʻoga po o ē e vaaia i latou, lo latou tulaga.