Skip to content

Skip to secondary menu

Skip to table of contents

Molimau a Ieova

Faa-Samoa

Ala Mai!  |  Nu. 2 2017

 FESOASOANI MO LE AIGA | FANAU TALAVOU

Pe a Maliu se Tasi o Mātua

Pe a Maliu se Tasi o Mātua

LE LUʻI

E ono tausaga o Dami ina ua maliu lona tamā i le aneurysm, o se maʻi e aafia ai le faiʻai. E iva tausaga o Derrick ina ua maliu lona tamā i le maʻi fatu. Ae o Jeannie e fitu ona tausaga ina ua maliu lona tinā i le kanesa o le faaautama, ina ua mavae le tausaga o ia fesagaʻia lea maʻi. *

Na vave ona motusia le mafutaga a nei talavou e toʻatolu ma ē e pele iā i latou. Pe na oo iā te oe lea tulaga? Afai o lea, e mafai ona fesoasoani lenei mataupu iā te oe i le auala e feagai ai ma le maliu o sē e pele. * Peitaʻi, seʻi iloilo muamua ni mea moni e faatatau i le faavauvau.

MEA E TATAU ONA E ILOA

E tele auala e faavauvau ai. O lona uiga, atonu e ese le auala e te faaalia ai le faanoanoa mai i le auala e faaalia ai e isi. Ua taʻua i le tusi Helping Teens Cope With Death: “E lē tasi se auala e feagai ai ma le maliu o se tasi pe e iai foʻi ni tulafono i lenei tulaga.” O le mea tāua ia aua neʻi soona taofiofia ou lagona faavauvau. Aiseā? Talu ai . . .

E lē lelei le taofiofia o ou faalogona faavauvau. Na faapea mai Jeannie lea na taʻua i le amataga: “Sa ou mafaufau e tatau ona ou lototele mo loʻu uso laʻitiiti, o lea ou te leʻi faailoa atu ai oʻu faalogona. E oo mai lava i le taimi nei, o loo taofiofi pea oʻu faalogona tigā ma e lē o se mea lelei.”

O le manatu foʻi lenā o tagata atamamai. Ua faamatalaina i le tusi The Grieving Teen: “E lē faaauau ai pea ona taofiofia ou faalogona, e iai lava le taimi e te lē faatalitalia e aliaʻe [mai ai] pe a matuā ita pe maua foʻi i maʻi o le tino.” O le taofiofia o faalogona faavauvau, e mafai foʻi ona iʻu atu ai i le lē pulea o le faaaogāina o le ʻava malosi ma le faaaogāina o fualaau faasāina, o taumafaiga uma ina ia aua ai neʻi toe lagona le tigā.

E ono iai ni faalogona lē mautonu pe a faavauvau. O se faataʻitaʻiga, e lē fiafia nisi tagata i lē ua maliu ona o le “tuua” o i latou. E tuuaʻia e isi le Atua ma le manatu sa tatau ona ia taofia le oo o le oti i lea tagata. O le toʻatele o ē faavauvau e lagona le nofosala, ona o ni gaoioiga po o ni faamatalaga sa faia i lē ua maliu, talu ai ua lē mafai ona toe faalelei ma ia.

E manino mai la, o le faavauvau o se faalogona e faigatā ona malamalama i ai. E faapefea ona e maua le fesoasoani ma faaauau pea ona faia mea masani o le olaga?

 MEA E MAFAI ONA E FAIA

Talanoa atu i se tasi. Atonu e te ono mafaufau e lē toe faifaimea faatasi ma isi i lenā taimi faigatā. Peitaʻi, o le faailoa atu o ou faalogona i se tasi o le aiga po o se uō, o le a fesoasoani iā te oe e feagai ai ma ou faalogona ma ʻalofia ai le lotovaivai ona o le maliu o sē e pele.Mataupu silisili o le Tusi Paia: Faataoto 18:24.

Tusi i lalo ou lagona. Tusi e faatatau i se tasi o ou mātua ua maliu. O se faataʻitaʻiga, o le ā se mea e sili ona faagalogatā e te manatua ai o ia? Tusi i lalo ona uiga lelei, ma filifili po o lē fea o na uiga e te fia faaaʻoaʻo i ai.

Pe a lofitūina oe i mafaufauga lē saʻo, o se faataʻitaʻiga, afai ua lē mafai ona aveese mai i lou mafaufau se faamatalaga tigā na e fai atu iā te ia a o leʻi maliu, tusi i lalo ou faalogona ma le māfuaaga. O se faataʻitaʻiga, “ou te lagona le nofosala ona sa ma feeseeseaʻi ma loʻu tamā a o leʻi maliu.”

O le isi vala e sosoo ai, ia vaʻili po o talafeagai le māfuaaga o ou faalogona nofosala. Ua taʻua i le tusi The Grieving Teen: “E lē tuuaʻia oe i lou lē iloaina o le a leai se avanoa e te faatoese atu ai. O le mea moni, e faatalitalia lava e faia e se tasi se faamatalaga po o se gaoioiga e ono manaʻomia ai se faatoesega.”Mataupu silisili o le Tusi Paia: Iopu 10:1.

Ia tausia lelei lou soifua mālōlōina. Ia lava lelei lau mālōlō, faamalositino ma tausami i meaʻai paleni. Afai e te lē o lagona se fia taumafa, ia taumafai e tausami i meaʻai māmā ma paleni a o faagasolo le aso nai lo o se taumafataga mamafa, seʻia toe foʻi i le tulaga masani. Aua le faaaogāina meaʻai e leai se malosi e maua ai po o le ʻava malosi e faateʻa ai ou faalogona faavauvau, auā o le mea moni o le a atili ai ona e faavauvau.

Talanoa i le Atua i le tatalo. O loo taʻua i le Tusi Paia: “Ia tuuina atu iā Ieova ou popolega uma, o ia lava e na te tausia oe.” (Salamo 55:22) O le tatalo, e lē o se mea e tau ina faaleleia ai ou faalogona. Peitaʻi, o le auala lea e te talanoa ai i le Atua, o lē e “na te faamāfanafanaina i tatou i o tatou puapuaga uma.”2 Korinito 1:3, 4.

O se tasi o auala e faamāfanafana ai e le Atua ē faavauvau o lana Afioga, le Tusi Paia. Aiseā e te lē iloiloina ai le aʻoaʻoga a le Tusi Paia e faatatau i le tulaga moni o ē ua maliliu, ma le faamoemoe o le toetū? *Mataupu silisili o le Tusi Paia: Salamo 94:19.

^ pala. 4 E mafai foʻi ona e faitau i faamatalaga i mea na tutupu iā Dami, Derrick ma Jeannie i le mataupu o mulimuli mai.

^ pala. 5 E ui o loo taulaʻi atu lenei mataupu i le maliu o se tasi o mātua, ae o mataupu silisili o loo iai e mafai foʻi ona faatatau atu pe a maliu se tasi o ou tei po o sau uō.

^ pala. 19 Tagaʻi i le mataupu e 16 o le tusi Fesili ua Fesili Mai ai Talavou—Tali e Aogā. E mafai ona kopiina mai i le www.jw.org/sm. Tagaʻi i LOMIGA > TUSI MA POLOSIUA.

Faitau Atili

O Ā AʻOAʻOGA MONI A LE TUSI PAIA

Le Faamoemoe mo Ē Pele ua Maliliu

Po ua maliu se tasi e pele iā te oe? Pe e mafai ona e toe feiloaʻi ma i latou? Ia aʻoaʻo atili e faatatau i le aʻoaʻoga a le Tusi Paia i le toetū.