Skip to content

Skip to secondary menu

Skip to table of contents

Molimau a Ieova

Faa-Samoa

Ala Mai!  |  Nu. 2 2017

E matuā malosi i Toledo le aganuu ma le talafaasolopito o Sepania. Na faaigoaina o se tasi o mataaga a le World Heritage i le 1986, ma e sili ona fiafia turisi e asiasi i ai

 ATUNUU MA TAGATA

Se Asiasiga i Sepania

Se Asiasiga i Sepania

O SEPANIA o se atunuu e eseese ituaiga o tagata e iai, ma e tele foʻi mea e maua i lona laueleele. O le tele o vaega o Sepania e iai togāsaito, togāvine, ma laau olive. I le itu i saute, e pe ā ma le iva maila (14 km) le mamao o Sepania mai i le konitineta o Aferika, ma e va i le sami.

O Sepania e i le itu i saute i sisifo o Europa, ma e toʻatele tagata na malaga atu i ai, e aofia ai tagata Foinie, tagata Eleni, ma tagata Carthage mai i Aferika i Mātū. I le senituri lona tolu T.L.M., na taunuu ane ai tagata Roma ma nofoia le laueleele, ma latou faaigoaina ai o Hispania. Mulimuli ane, taunuu atu tagata Visigoth ma tagata Moor. O nei ituaiga uma, sa telē se aafiaga o a latou aganuu i le atunuu o Sepania.

I le 2015, e silia i le 68 miliona tagata na asiasi atu i Sepania.  O le toʻatele e faimalaga atu i inā ona o le tau māfanafana, matagofie o matafaga, ma isi vala e iloga ai le atunuu e pei o ata, le talafaasolopito ma le fausaga o fale. O le toʻatele foʻi e asiasi atu i Sepania ona o meaʻai, e pei o meaʻai mai i le sami, ham, sitiū, salati, ma fualaau faisua e kukaina pe faamanogi i le suāuu olive. O meaʻai e lauiloa ai Sepania i le lalolagi atoa, o omelets, paella ma le tapas.

O le mariscada o se ituaiga o meaʻai e faia mai i figota eseese o le sami

O le siva o le flamenco

O tagata Sepania e faaleuō ma e fiafia e talatalanoa i tagata. O le toʻatele e faapea mai o i latou o Katoliko Roma, ae e toʻaitiiti lava e auai i le Misasā. I tausaga talu ai nei, na malaga atu ai tagata mai i Aferika, Asia, ma Amerika Latina ma nonofo i Sepania. O le toʻatele o i latou e fiafia e talatalanoa i o latou talitonuga ma tū faalotu. E tele iʻuga lelei na maua mai i a latou talanoaga ma Molimau a Ieova, ma na fesoasoani foʻi iā i latou e iloa ai aʻoaʻoga a le Tusi Paia i le tele o mataupu.

A o faagasolo le 2015, e silia i le 10,500 Molimau a Ieova na tauofo e fausia pe faaleleia, le 70 o nofoaga e faia ai a latou tapuaʻiga e taʻua o Maota mo Sauniga. Na faamatuu mai e pulega faaitumalo fanua e fausia ai nisi o ia maota. Ina ia fesoasoani i tagata na siitia mai i isi atunuu, e faia ai e Molimau a Ieova sauniga i le silia ma le 30 gagana e ese mai i le gagana Sepania. I le 2016, e silia i le 186,000 tagata na auai i se sauniga faapitoa na faia e Molimau a Ieova, e faamanatuina ai le maliu o Iesu Keriso.