Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NU. 2 2016

 LE MANATU O LE TUSI PAIA

Popole

Popole

E lua ituaiga popole. E iai le popole lelei, ae e iai foʻi le popole e lē lelei. Ua fesoasoani mai le Tusi Paia ina ia tatou iloa na ituaiga popole.

Po o se faalogona masani le popole?

LE TULAGA MONI

O le popole e aofia ai faalogona atugalu, lē toʻa pe atuatuvale. Talu ai o loo tatou ola i se lalolagi e lē mautonu, o so o se tasi lava la o i tatou e iai taimi e lofitūina ai i lagona popole.

LE MANATU O LE TUSI PAIA

Na tusi le tupu o Tavita: “O le ā le umi ou te popole ai, e faanoanoa ai loʻu loto i le aso atoa?” (Salamo 13:2, NWT) O le ā na fesoasoani iā Tavita e onosaia ai lona popole? Sa ia faailoa atu i le Atua mea uma o i lona loto e ala i le tatalo, ma faatuatua atoatoa i le alofa faamaoni o le Atua. (Salamo 13:5; 62:8) Ua valaaulia foʻi i tatou e le Atua ia tuu atu o tatou popolega iā te ia. Ua faapea mai i le 1 Peteru 5:7: “Ia taʻu atu o outou popolega uma iā te ia, auā o loo manatu mamafa mai o ia iā te outou.”

O le faia o se mea mo ē e pele, e faaitiitia ai lo tatou popole iā i latou

Peitaʻi, e iai mea e mafai ona tatou faia ina ia faaitiitia ai le popole. O se faataʻitaʻiga, ina ua ʻpopole Paulo i faapotopotoga uma,’ sa taumafai malosi o ia e faamāfanafana ma faalaeiau i latou sa popole i ai. (2 Korinito 11:28) Sa aogā lona popole, auā na uunaʻia ai o ia e avatu le fesoasoani manaʻomia. E faapena foʻi i tatou, e mafai ona avea lo tatou popole o se itu lelei. Ae o le lē popole ma le lē ano, e atagia atu ai le lē manatu mamafa.—Faataoto 17:17.

“Ia vaavaai ma le naunau e lē gata i au lava mea, ae i mea foʻi e lelei ai isi.”Filipi 2:4.

 E faapefea ona e taulima le soona popole?

LE TULAGA MONI

E ono popole tagata i mea sesē sa latou faia i taimi ua teʻa, pe popole e faatatau i le lumanaʻi po o tupe. *

LE MANATU O LE TUSI PAIA

Popole i mea sesē i taimi ua teʻa: A o leʻi avea ma Kerisiano, o nisi i le uluaʻi senituri sa avea ma ē e onanā, taufaavalea, faitaaga, ma gāoi. (1 Korinito 6:9-11) Nai lo o le mafaufau pea i mea na latou faia, sa suia o latou ala ma faatuatua i le tele o le alofa mutimutivale o le Atua, lea ua ia faailoa mai ma le lotomalie. Ua taʻua i le Salamo 130:4: “O oe lava [le Atua] e te faamagaloina agasala.”

Popole mo le aso a taeao: Na fetalai Iesu: “Aua neʻi outou popole mo le aso a taeao, auā e iai foʻi popolega o le aso a taeao.” (Mataio 6:25, 34) O le ā le uiga o lana fetalaiga? Ia taulaʻi atu i popolega o le asō. Aua le faateleina popolega o le asō e ala i le mafaufau fua i popolega o le aso a taeao, auā e ono sesē ai le mafaufau ma faia ai ni faaiʻuga faatopelau. Ia manatua foʻi, o le tele o mea e tatou te popole ai, atonu e lē o mea moni na e tutupu.

Popole i tupe: Na tatalo se tane atamai: “Ia aua neʻi oʻu matuā mativa po o ou te matuā tamaoaiga.” (Faataoto 30:8) Nai lo lea, sa ia saʻilia le lotomalie, o se faalogona e maua ai le finagalo malie o le Atua. Ua taʻua i le Eperu 13:5: “Ia aunoa o outou olaga ma le manaʻo tele i tupe, a ia outou lotomalilie i mea ua iai iā te outou. Auā na fetalai o ia [le Atua]: ʻOu te lē tuua lava oe, ma ou te lē tuulafoaʻia lava oe.’” O tupe e alu alu uma, ae e lē taitai ona tuulafoaʻia e le Atua i latou e faatuatua iā te ia, ma ola i se olaga faigofie.

“Ou te leʻi iloa lava se tagata amiotonu ua tuulafoaʻiina, po o ana fanau o ʻaisi mo ni meaʻai.”Salamo 37:25.

Po o le a iai se taimi e tatou te lē toe popole ai?

TALA A TAGATA

I se mataupu i le nusipepa The Guardian i le 2008, na taʻua ai e se tusitala e igoa iā Harriet Green: “Ua tatou ulu atu nei i se laasaga fou o le popole.” I le 2014, na taʻua ai e Patrick O’Connor i le mekasini The Wall Street Journal: “Ua matuā faatupulaʻia le popole o tagata Amerika.”

LE MANATU O LE TUSI PAIA

Ua taʻua i le Faataoto 12:25: “O popolega i le loto o le tagata e faavaivai ai le loto, a o tala lelei e olioli ai le loto.” O le “tala lelei” sili e maua i le tala lelei o le malo o le Atua. (Mataio 24:14) Ua lē o toe umi ona faia lea e lenā Malo, o le pulega a le Atua, le mea e lē mafai ona tatou faia, o le aveesea lea o popolega uma e ala i le liaʻi ese o pogai autū o le popole, e aofia ai maʻi ma le oti. Ua faapea mai le Faaaliga 21:4: ʻE soloiesea foʻi e le Atua loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.’

“Tau ina ia faatutumuina outou i le olioli uma ma le filemu e le Atua e aumaia ai le faamoemoe ona ua outou talitonu.”Roma 15:13.

^ pala. 10 Mo tagata o loo aafia i maʻi e māfua ona o le popole, atonu o se mea atamai le vaai o se fomaʻi. E lē o fautuaina e le Ala Mai! se togafitiga patino.

Faitau Atili

Po o le Finagalo Lea o le Atua?

Atonu e te taumānatu pe aiseā ua tele ai faafitauli i aso nei. Pe e te silafia ua faailoa mai i le Tusi Paia o le a iai ni suiga lelei i le lumanaʻi ma o le a e maua ai ni aogā?