Skip to content

Skip to secondary menu

Skip to table of contents

Molimau a Ieova

Faa-Samoa

Ala Mai!  |  Nu. 2 2016

 FAATALANOAGA | YAN-DER HSUUW

Faamatala e se Saienitisi Lona Faatuatuaga

Faamatala e se Saienitisi Lona Faatuatuaga

O LE polofesa o Yan-Der Hsuuw o le faatonu i suʻesuʻega e faia i se ola ua afuafua, i le National Pingtung University of Science and Technology i Taiwan. Sa talitonu o ia i le evolusione, ae na mulimuli ane suia lona manatu ina ua avea ma saienitisi suʻesuʻe. Sa ia faamatala i le Ala Mai! ana māfuaaga.

Seʻi faamatala puupuu mai lou talaaga.

Na ou fanau i le 1966 ma ola aʻe i Taiwan. Na faavae aʻe talitonuga a oʻu mātua i le lotu Tao ma le lotu Puta. Na matou tapuaʻi i o matou tuaa ma tatalo i faatusa, ae e matou te leʻi talitonu e iai Sē na foafoaina mea.

Aiseā na e suʻesuʻeina ai meaola ma laau?

A o ou laʻitiiti, sa ou fiafia e tausi fagafao, ma na ou fia iloa le auala e fesoasoani ai i manu ma tagata i mea e tigā ai. E iai se taimi na ou aʻoga ai e avea ma se fomaʻi manu. Mulimuli ane na ou suʻesuʻeina le afuafuaina o le ola, o se mataupu na ou faamoemoe e malamalama ai i le amataga o le ola.

Sa e talitonu i le evolusione i lenā taimi. Seʻi e faamatala mai pe aiseā?

Na ou talitonu i le evolusione ona na aʻoaʻo e polofesa o le Iunivesite, ma na faapea mai e iai faamaoniga e lagolagoina ai lenā manatu.

Aiseā na amata ai ona e faitauina le Tusi Paia?

E lua māfuaaga. Muamua, na ou mafaufau e tele atua o loo tapuaʻi ai tagata, e tatau la ona iai se atua e sili atu nai lo o isi. Ae o lē fea atua e sili? Lona lua, na ou iloa o le Tusi Paia o se tusi e faaaloalogia e tagata. O lea na ou fia iloa atili ai e faatatau i le Tusi Paia.

Ina ua amata laʻu aʻoga i le Catholic University of Leuven i Peleseuma i le 1992, na ou asiasi i se lotu Katoliko ma talosaga i le patele e fesoasoani mai ina ia ou malamalama i le Tusi Paia. Peitaʻi na ia teena laʻu talosaga.

Na faapefea la ona faamalieina lou galala faaleagaga?

I tausaga e lua mulimuli ane, a o faaauau aʻu suʻesuʻega faasaienitisi i Peleseuma, na ou feiloaʻi ai iā Ruta, o se tamaʻitaʻi Polani ma o se Molimau a Ieova. Sa ia aʻoaʻoina le gagana Saina ina ia fesoasoani i tamaiti o le Iunivesite na fia aʻoaʻoina e faatatau i le Atua. Na ou tatalo mo lea ituaiga o fesoasoani, ma na ou fiafia ina ua ou feiloaʻi iā Ruta.

Na faailoa mai e Ruta iā te aʻu, e ui o le Tusi Paia e lē o se tusi faasaienisi, ae e ōgatusa lava ma le faasaienisi. O se faataʻitaʻiga, na taʻua e Tavita i le Salamo 139:16 i lana tatalo i le Atua: “Na silasila mai lava ou fofoga ina o afuafua aʻu, na tusia foʻi i lau tusi ona vaega uma, e faatatau i aso na faia ai a o leai ni vaega o loʻu tino.” E ui na faaaogā e Tavita le gagana faafatusolo, ae e saʻo lelei ona manatu. A o leʻi faia vaega o le tino, ua iai uma faamatalaga mo le faia aʻe o na vaega. O le saʻo aʻiaʻi o le Tusi Paia na faatalitonuina ai aʻu, o le Afioga lea a le Atua. Ua ou malamalama ai foʻi, e na o le toʻatasi le Atua moni, o Ieova lea. 1

 O le ā na faatalitonuina ai oe na foafoaina e le Atua le ola?

O le sini o se suʻesuʻega faasaienisi, ina ia maua le mea moni, ae e lē ina ia lagolago ai ni manatu ua iai. O aʻu suʻesuʻega i le faagasologa o le afuafuaina o se ola, ua suia ai loʻu manatu e faapea na foafoaina le ola. O se faataʻitaʻiga, e gaosi e inisinia vaega eseese o se masini, ina ia fetaui lelei vaega saʻo i le faatulagaga saʻo ma le auala saʻo. E tai faapena le auala e afuafua ai le pepe ae e sili atu la ona lavelave.

E amata lenā faasologa i se sela se tasi ua afuafua, e saʻo?

Ioe. E vaevae lenā sela lamoʻimoʻī ma amata mai ai le faasologa o le vaevaeina o sela. E iai le taimi e faaluaina ai le aofaʻi o sela i totonu o le 12 i le 24 itula. I le amataga o lenei faasologa, e faia aʻe ai sela e taʻua o sela autū. 2 E faia e sela autū le toetoe 200 pe sili atu o ituaiga sela eseese ina ia faia aʻe ai se pepe atoa, e pei o sela o le toto, sela o ponaivi, sela o neula, ma isi lava sela.

O aʻu suʻesuʻega i le faagasologa o se ola ua afuafua, ua ou iloa ai na foafoaina le ola

E tatau ona saʻo le faasologa ma saʻo le vaega e fausia aʻe ai se sela. Muamua, e faaputuputu sela ina ia faia aʻe ai mea ua taʻua o tissues, ona faaputuputu lea o tissues ma faia aʻe ai totoga, vae ma lima. E leai se saienitisi e mafai ona ia tusia ni faatonuga mo se ituaiga faasologa faapea. Peitaʻi, o loo iai i le DNA faamatalaga uma mo le auala e fausia aʻe ai se ola ua afuafua. Ina ua ou iloiloina nei mea uma, sa ou talitonu ai loa o le Atua na ia saunia le ola.

Aiseā na avea ai oe ma Molimau a Ieova?

Pe a faapuupuu, o le alofa. Na fetalai Iesu Keriso: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioane 13:35) E lē faailoga tagata lenā alofa. E lē taaʻina i le atunuu, aganuu, po o le lanu o se tasi. Na ou mātauina ma tofo totino i lenā ituaiga o alofa, ina ua ou aufaatasi ma Molimau a Ieova.

^ 2. Ua lē o toe galue le polofesa o Yan-Der Hsuuw i le vaega e afuafuaina sela autū ina ia maua aʻe ai se tagata, ona o lona lotofuatiaifo o se Kerisiano.