Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NU. 2 2016

 MATAUPU AUTŪ

Le Tusi Paia—Aiseā e Tutasi Ai?

Le Tusi Paia—Aiseā e Tutasi Ai?

Na māeʻa ona tusia le Tusi Paia i le pe ā ma le 2,000 tausaga ua mavae. Talu mai lenā taimi, e tele isi tusi na lauiloa ma toe mou atu. Peitaʻi e lē faapena le Tusi Paia. Seʻi iloilo vala o loo mulimuli mai.

  • Na faaauau ona iai le Tusi Paia e ui i le tele o osofaʻiga mataʻutia a tagata maualuluga. O se faataʻitaʻiga, i le vaitaimi o le senituri lona 13 i le senituri lona 15, ua taʻua i le tusi An Introduction to the Medieval Bible, o nisi atunuu na faapea mai o Kerisiano, ʻsa manatu i le umia ma le faitauina o le Tusi Paia i gagana e masani ai tagata, o se tetee ma faatuʻiese.’ Sa lamatia ola o tagata atamamai na faaliliuina le Tusi Paia i gagana e malamalama ai tagata, pe uunaʻia le suʻesuʻeina o le Tusi Paia. O nisi na fasiotia.

  • E ui lava i le tele o fili o le Tusi Paia, ae na faaauau ona avea ma tusi e aupito i sili ona tufatufaina atu. I se fua faatatau, e pe ā ma le lima piliona kopi o le Tusi Paia atoa pe i vaega, ua lomia i le silia ma le 2,800 gagana. O lenei tulaga ua matuā ese ai lava le Tusi Paia mai i tusi faafilosofia, faasaienisi, ma isi mataupu, ia atonu e toʻaitiiti i latou e mauaina pe e vave foʻi ona lē toe aogā.

  • Ua fesoasoani le Tusi Paia e faatumau ma faaleleia atili nisi o gagana ua faaliliuina ai. Sa telē se aafiaga o le faaliliuga faa-Siamani a Martin Luther i le gagana Siamani. Ua faamatalaina le uluaʻi faaliliuga a le King James Version, “atonu o le tusi aupito i sili lea ona telē sona taaʻiga lelei ua lomia” i le gagana Peretania.

  • ʻUa telē le taaʻiga a le Tusi Paia i aganuu a atunuu i Europa ma Amerika i Mātū. E lē gata ua taaʻina ai talitonuga ma faiga faalotu, ae faapea foʻi ata e tusi ma vane, tusitusiga, tulafono, faiga faapolotiki, ma isi vala e tele.’—The Oxford Encyclopedia of the Books of the Bible.

O nisi na o mea moni e tutasi ai le Tusi Paia. Ae aiseā ua matuā lauiloa ai le Tusi Paia? Aiseā ua lotomalilie ai nisi e lamatia o latou ola ona o le Tusi Paia? E tele māfuaaga, e aofia ai vala nei: O loo iai i le Tusi Paia faamatalaga atamai i le auala e tatau ona tatou ola ai, ma le auala e maua ai se faiā lelei ma le Atua. Ua fesoasoani mai foʻi ina ia tatou malamalama i le pogai autū o mafatiaga ma faafitauli o tagata. Ae sili ai, o loo folafola mai ai le faaiʻuina o na faafitauli, ma le auala o le a faataunuu ai.

 O Loo Iai le Atamai Tau Amio ma Faaleagaga

E tāua aʻoaʻoga i le poto salalau. Peitaʻi ua faapea mai se faatonu o se nusipepa i Kanata, e taʻua o le Ottawa Citizen, ʻe tusa pe e tele ni ou faailoga maualuluga, ae e lē faapea ai e saʻo au filifiliga i le tulaga tau amio.’ I se suʻesuʻega na faia e se kamupani e taʻua o le Edelman, ua iloa ai o le toʻatele o tagata atamamai, e aofia ai taʻitaʻi o faigāmalo ma pisinisi, e taufaavalea, gāoi, ma faia faiga faatogafalea. O le iʻuga, “ua lē toe maufaatuatuaina ai e tagata ē ua fai ma taʻitaʻi.”

E taulaʻi atu le Tusi Paia i aʻoaʻoga i le itu tau amio ma le faaleagaga. E tatou te maua ai le tofā mamao i le “amiotonu, o le faamasinotonu ma le amio saʻo, o ala lelei uma ia.” (Faataoto 2:9) O se faataʻitaʻiga, o se tauleʻaleʻa e 23 tausaga, o lē o le a tatou faaigoa iā Setefano, sa faafalepuipui i Polani. A o iai i le falepuipui, na amata ona ia suʻesuʻeina le Tusi Paia ma talisapaia le aogā o fautuaga o loo iai. Na tusi o ia: “Ua ou iloa nei le uiga o le manatu ia ʻe āva i lou tamā ma lou tinā.’ Ua mafai foʻi ona ou pulea oʻu faalogona, aemaise lava i le ita leaga.”—Efeso 4:31; 6:2.

O le mataupu silisili na pāʻia ai le loto o Setefano, o le Faataoto 19:11: “O le tofā mamao o le tagata, e faagesegese ai lona ita, ma e matagofie foʻi lona lē manatua o le agaleaga.” O lea, pe a fesagaʻia e Setefano se tulaga e tofotofoina ai, e taumafai o ia e iloilo ma le toʻafilemu lea tulaga, ma faatatau mataupu silisili talafeagai o le Tusi Paia. Ua ia faapea mai: “Ua ou iloa nei o le Tusi Paia o le tusi taʻiala sili lea.”

O Maria o se Molimau a Ieova, sa tuuaʻia e se fafine faailoga tagata i luma o le lautele. Ae nai lo o le toe tali atu, sa savali ese ma le toʻafilemu Maria. Sa leaga faalogona o le fafine ona o ana gaoioiga, ma ia saʻilia loa Molimau a Ieova. Pe ā o se masina mulimuli  ane, sa ia toe vaai ai iā Maria, sa ia fusi ma faatoese atu iā te ia. Sa manatu foʻi o ia o le agamalu ma le amio pulea o Maria, sa atagia mai ai ona talitonuga faalotu. O le iʻuga, sa filifili lenei fafine ma sui e toʻalima o lona aiga, e suʻesuʻe le Tusi Paia ma Molimau a Ieova.

Na fetalai Iesu, “e taʻuamiotonuina le atamai i ana galuega.” (Mataio 11:19) E tele faamaoniga e iloa ai le aogā o mataupu silisili o le Tusi Paia. E avea ai i tatou ma tagata e sili ona lelei. E “atamai ai le tagata e leai se poto masani,” e “olioli ai le loto,” ma e “malamalama ai mata” i le itu tau amio ma le tulaga faaleagaga.—Salamo 19:7, 8.

O Loo Faamatala ai Mafatiaga ma Faafitauli o Tagata

Pe a faia ni saʻiliʻiliga i se faamaʻi tele, e taumafai le ʻausuʻesuʻe e saʻili le pogai na māfua ai. E faapena foʻi pe a tatou taumafai e malamalama i le pogai o mala ma puapuaga ua mafatia ai tagata. O loo iai i le Tusi Paia le fesoasoani, auā o loo faamauina ai lo tatou talafaasolopito mai i le amataga, le taimi na amata ai o tatou faafitauli.

O loo faamauina i le tusi o Kenese na amata puapuaga o tagata ina ua fouvale uluaʻi tagata i le Atua. Na filifilia e i laʻua lava le mea lelei ma le mea leaga, o le aiā e na o Lē na foafoaina mea e pule ai. (Kenese 3:1-7) E faanoanoa ona talu mai lenā taimi, ua iai foʻi i tagata lenā mafaufau fia tutoʻatasi. O le iʻuga, ua faaalia i mea ua tutupu i le talafaasolopito, ua leai se saʻolotoga ma se fiafia o le fanau a tagata, ae ua na o feteenaʻiga, mafatiaga, ma puapuaga i le tulaga tau amio ma le faaleagaga. (Failauga 8:9) Ua talafeagai ai le taʻua i le Tusi Paia ʻe lē o i le tagata, ona faatonuina le mea e ui ai o ia.’ (Ieremia 10:23) Ae o le tala lelei, ua toeitiiti ona faaiʻuina lea o le leaga o le tulaga fiatutoʻatasi o tagata.

 O Loo Taʻu Mai ai le Faamoemoe

Ua faamautinoa mai i le Tusi Paia, o le alofa o le Atua i ē e faaaloalo i lana pule ma ana tapulaa, o le a lē faaauau ai ona iai le amioleaga ma mafatiaga. O tagata amioleaga o le a ʻselesele i āuga o o latou ala.’ (Faataoto 1:30, 31) Ae “o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”—Salamo 37:11.

“E finagalo [le Atua] ina ia faaolaina ituaiga uma o tagata, ma ia maua le poto saʻo i le upu moni.”—1 Timoteo 2:3, 4

O le a faataunuu e le Atua lona finagalo mo se lalolagi filemu e ala mai i lona Malo. (Luka 4:43) O lenā Malo o le a pulea le lalolagi, ma o le a faaalia ai e le Atua le tonu o lana pule silisili ese i le fanau a tagata. Na faafesootaʻi e Iesu le Malo ma le lalolagi ina ua taʻua i lana tatalo faaaʻoaʻo: “Ia oo mai lou malo. Ia faia lou finagalo i le lalolagi.”—Mataio 6:10.

Ioe, o le a faia e tagatānuu o le Malo o le Atua le finagalo o le Atua, ma amanaʻia e na o Lē na foafoaina mea e iai le aiā e pule ai, ae lē o se tagata. O le a lē toe iai ni faiga piʻopiʻo, matapeʻapeʻa, le lē tutusa o le tulaga tau tamaoaiga, faailogalanu, ma faigātaua. O le a autasi le lalolagi, tasi le faigāmalo, ma o le a tutusa tapulaa tau amio ma le faaleagaga.—Faaaliga 11:15.

O le auala autū e tatou te oo atu ai i lenā lalolagi fou, o aʻoaʻoga. Ua taʻua i le 1 Timoteo 2:3, 4, “e finagalo [le Atua] ina ia faaolaina ituaiga uma o tagata, ma ia maua le poto  saʻo i le upu moni.” O lenā upu moni e aofia ai aʻoaʻoga o le Tusi Paia ia atonu e tatou te taʻua o tulafono faavae o le Malo, o tulafono ma mataupu silisili o le a lima taʻitaʻiina ai, e pei o mataupu silisili e maua i le Lauga a Iesu Keriso i le Mauga. (Mataio mataupu e 5-7) Pe a e faitau i na mataupu e tolu, taumafai e faaata le ituaiga olaga o le a iai pe afai e faatatauina e tagata uma le atamai o Iesu.

Pe e tatau la ona faateʻia i tatou i le avea o le Tusi Paia ma tusi ua sili ona tufatufaina i le lalolagi? E leai. O aʻoaʻoga o loo iai ua faamaonia ai o se tusi mai i le Atua. O le tele ua tufatufaina atu ai le Tusi Paia, ua faaalia ai e finagalo le Atua ia iloa e atunuu uma ma gagana o ia, ma ia maua aogā i faamanuiaga o le a aumaia e lona Malo.—Galuega 10:34, 35.

Faitau Atili

Pe e Saʻo Aʻiaʻi le Tusi Paia?

Afai o le Tusi Paia e mai le Atua, e tatau la ona sili atu i lo o se isi lava tusi.

O le Tusi Paia, o se Tusi Mai le Atua

E faapefea ona fesoasoani le Tusi Paia i ou faafitauli? Aiseā e mafai ai ona e talitonuina valoaga o loo iai?

Aiseā e Su‘esu‘e ai le Tusi Paia?

Ua fesoasoani le Tusi Paia i le faitau miliona o tagata i le lalolagi aoao, ina ia maua tali o fesili tāua e faatatau i le olaga. Pe e te fia iloa tali o na fesili?