Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NU. 1 2017

 MATAUPU AUTŪ

Lotomafatia o Talavou—Māfuaaga ma Fesoasoani

Lotomafatia o Talavou—Māfuaaga ma Fesoasoani

UA FAAPEA mai Anna *: “Pe a lofitūina aʻu i mafatiaga, ou te lē toe fia faia se mea e oo lava i mea e masani ona ou fiafia e fai. E pau le mea ou te manaʻo e fai o le moe. E masani ona ou manatu e leai se tasi e alofa iā te aʻu, lagona le lē aogā, ma ua avea aʻu ma avega mamafa i isi.”

Ua faapea mai Julia: “Na ou mafaufau ou te pule i loʻu ola. Peitaʻi, ou te leʻi fia oti. E pau le mea na ou manaʻo ai o le aveesea o ia faalogona. O aʻu o se tagata e lotoalofa, ae pe a ou mafatia, ou te lē toe popole i se tagata po o se mea.”

E pe ā ma le 13 tausaga o Anna ae pe tusa o le 14 tausaga o Julia, na aafia ai i laʻua i le lotomafatia. O nisi talavou * e na o sina taimi e mafatia ai, ae o Anna ma Julia na matuā mafatia i ni vaiaso po o ni masina foʻi. Ua faapea mai Anna: “E tai pei o loo e iai i totonu o se ana pogisa e leai se auala e sao ai i fafo. E pei ua lē sagatonu lou mafaufau ma suia atoa ou uiga.”

E taatele le tulaga na aafia ai Anna ma Julia. Ua faatupulaʻia le aafia o talavou i le lotomafatia, ma “o le pogai lea o faamaʻi ma le lē atoatoa o le malosi e aafia ai tama ma teine i le va o le 10 i le 19 tausaga,” o le faamatalaga lea a le Faalapotopotoga o le Soifua Mālōlōina i le Lalolagi.

 E aliaʻe mai āuga o le lotomafatia pe a faasolo ina avea le tamaitiiti ma tagata matua, ma e ono lē moe lelei ai, suia le auala e taumafa ai, ma suia ai le fuaitino. Atonu e aliaʻe mai foʻi faalogona o le lotovaivai, leai se faamoemoe, faanoanoa, ma faalogona e leai se tāua. O isi āuga e aofia ai le lē fia auai i ni faatasiga, faigatā ona uaʻi i se mea pe galogalo foʻi mea, mafaufauga ma gaoioiga e fia pule i le ola, ma isi āuga e lē mafai ona faamatalaina e fomaʻi. Pe a masalomia e fomaʻi faapitoa o le mafaufau ua aafia se tasi i le lotomafatia, e masani ona latou vaai i ni āuga e faaauau ona iai pea mo ni vaiaso, ma e aafia ai gaoioiga masani a se tagata.

MĀFUAAGA O LE LOTOMAFATIA O TALAVOU

Ua taʻua e le Faalapotopotoga o le Soifua Mālōlōina i le Lalolagi, e tele vala e mafai ona māfua ai le lotomafatia. Atonu e māfua mai ona o le auala e feagai ai isi ma se tasi, mafatiaga o le mafaufau, po o le siʻomaga foʻi. E aofia ai vala nei.

Mea e aafia ai le tino. E pei o le tulaga o Julia, o le lotomafatia e mafai ona tuufaasolo i le aiga, lea e mafai ona aafia ai le faiʻai. O isi vala e aafia ai le tino e aofia ai faamaʻi e ono aafia ai le fatu, suia o homone o le tino, ma le soona faaaogāina pea o fualaau lea e atili ai ona lotomafatia. *

Popole. Atonu e leai se afāina o sina popole, ae o le soona popole ma le popole faaumiumi e mafai ona afāina ai le tino ma le mafaufau, ma o nisi taimi e faigofie ona iʻu ai i le lotomafatia o se talavou ona o suiga o homone o le tino. Ona o lea tulaga, e lē mautinoa lelei ai le māfuaaga o le lotomafatia ma e ono aofia ai nisi o vala e pei ona taʻua muamua.

O vala e māfua ai le popole lea e oo atu ai i  le lotomafatia, e aofia ai le nonofo eseese po o le tatala o faaipoipoga a mātua, le maliu o sē e pele, le sauāina ma le faaleagaina i feusuaʻiga, se faalavelave faafuaseʻi matuiā, maʻi, po o le lē atoatoa o le mafaufau lea e faigatā ai ona aʻoaʻoina aemaise pe a manatu le tamaitiiti ua teena o ia. O se isi vala o le tele o mea e faatalitalia e mātua ae e lē mafai ona ausia, atonu o ni tulaga tauaʻoaʻoga. O se isi māfuaaga, o le soona fai lea e isi, lē mautonu i le lumanaʻi, aafiaga o faalogona ona o le lotomafatia o se matua, ma le femoumouaʻi o le auala e tausia ai e mātua fanau. Pe a aafia se talavou i le lotomafatia, o le ā le auala e na te fesagaʻia ai?

TAUSIA LOU TINO MA LOU MAFAUFAU

O le matuā lotomafatia e masani ona foʻia e ala i fualaau ma vailaau, faatasi ai ma fautuaga mai i fomaʻi faapitoa o le mafaufau. * Na fetalai Iesu Keriso: “E lē manaʻomia e tagata malolosi se fomaʻi, ae na o ē e mamaʻi.” (Mareko 2:17) O so o se maʻi e mafai ona aafia ai vaega uma o le tino, e aofia ai ma le faiʻai. O lea, atonu e talafeagai le suia o le auala e tatou te ola ai, ona e fesootaʻi lelei le faiʻai ma le tino.

Pe a e aafia i le lotomafatia, ia uia ni laasaga talafeagai ina ia mālōlōina ai lou tino ma le mafaufau. O se faaaʻoaʻoga, ia taumafa paleni, ia lava le moe, ma ia faamalositino e lē aunoa. O le faamalositino e maua ai e lou tino vailaau ia e mafai ona faaleleia ai ou faalogona, faaopoopo ai lou malosi, ma lelei ai lau moe. Pe a mafai, ia taumafai e mātau ni faailoga e iloa ai ua amata ona e lotomafatia, ma fuafua ni auala e te gaoioi ai. Ia talanoa atu i se tasi e te maufaatuatuaina. O le lagolagosua a aiga vavalalata ma uō, e mafai ai ona e fesagaʻia ma le taulau manuia le lotomafatia, pe faaitiitia ai foʻi ona āuga. Ia tusi i lalo ou manatu ma ou faalogona, o le mea  lenā na fesoasoani iā Julia lea na taʻua i le amataga. Ae sili atu i lenā, ia tausia ou manaʻoga faaleagaga. O lenei vala e mafai ona fesoasoani tele i le auala e te vaai ai i le olaga. Na fetalai Iesu Keriso: “E fiafia o ē e naunau i mea faaleagaga.”Mataio 5:3.

Ia taumafa paleni, faamalositino, ma lava le moe

E te maua faamāfanafanaga e ala i le faamalieina o ou manaʻoga faaleagaga

Ua ioe Anna ma Julia i le moni o upu a Iesu. Ua faapea mai Anna: “O mea faaleagaga ua ou uaʻi ai i isi tagata nai lo o oʻu lava faafitauli. E leʻi faigofie i taimi uma lenā mea, ae na ou maua ai le fiafia.” Na maua e Julia faamāfanafanaga e ala i le tatalo ma le faitau i le Tusi Paia. Ua ia faapea mai: “O le sasaa atu o loʻu loto i le Atua e ala i le tatalo, ua ou maua ai le toʻafilemu. O le Tusi Paia ua ou iloa ai e tāua aʻu i le silafaga a le Atua, ma e manatu mamafa mai iā te aʻu. O le faitauina foʻi o le Tusi Paia, ua ou maua ai se vaaiga mautinoa i le lumanaʻi.”

O Ieova lo tatou Atua na foafoaina i tatou. O lea, e malamalama lelei ai o ia e iai le aafiaga i la tatou vaaiga i le olaga ma faalogona, ona o le auala na tatou ola aʻe ai, mea na tutupu i o tatou olaga, ma mea e tuufaasolo mai i o tatou aiga. O le māfuaaga lea e lagolagosua mai ai o ia ma saunia mai le faamāfanafanaga, atonu e ala mai i ni tagata malamalama ma alofa mutimutivale. Ae sili atu i lenā, e iai le taimi o le a aveesea ai e le Atua maʻi uma o le tino po o le mafaufau. Ua taʻua i le Isaia 33:24: “E lē fai mai foʻi se tasi ua nofo ai: ʻOu te maʻi.’”

Ua folafola mai i le Tusi Paia o le a soloiesea e le Atua “loimata uma i o [tatou] mata, e lē toe iai se oti, po o se faanoanoa, po o se tagiauē, e lē toe iai foʻi se tigā.” (Faaaliga 21:4) Maʻeu se manatu faalaeiau ma faamāfanafanaloto! Pe afai e te fia aʻoaʻoina atili e faatatau i le finagalo o le Atua mo tagata ma le lalolagi, faamolemole tagaʻi i le jw.org. O i inā e te maua ai le Tusi Paia e sili ona lelei, faapea le tele o lomiga e faatatau i mataupu eseese e aofia ai ma le lotomafatia.

^ pala. 3 Ua suia igoa.

^ pala. 5 I lenei mataupu, o loo faasino atu le faaupuga “talavou” i talavou i le va o le 13 i le 19 tausaga le matutua.

^ pala. 10 O le tele o faamaʻi, fualaau ma vailaau, ma fualaau faasāina e mafai ona aafia ai uiga o tagata, o lea, e manaʻomia ai ona maua ni fualaau talafeagai mai i se fomaʻi.

^ pala. 14 E lē o fautuaina e le Ala Mai! se togafitiga faapitoa.