Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NU. 1 2017

 FESOASOANI MO LE AIGA | FAAIPOIPOGA

Auala e Faaalia ai le Talisapaia

Auala e Faaalia ai le Talisapaia

LE LUʻI

Ina ia maua se faaipoipoga taulau manuia, e tāua le faaalia o le talisapaia. Peitaʻi o le toʻatele o tane ma avā e lē o toe mātauina uiga lelei o a latou paaga, ma lē faaalia le talisapaia o i latou. I le tusi Emotional Infidelity ua mātauina e se tagata faufautua, o le toʻatele o ulugalii e ō atu iā te ia, “e sili atu ona popole i mea e lē o tutupu [i a latou faaipoipoga] nai lo o mea o loo tutupu. E latou te ō mai i loʻu ofisa e taʻu mai mea e manaʻomia ona suia, nai lo o mea e manaʻomia ona tumau pea. O le mea sesē o loo faia e nei ulugalii taʻitasi, o le lē faaalia o le alofa e ala i le leai o se talisapaia.”

E faapefea iā te oe ma lau paaga ona ʻalofia lenā mailei?

MEA E TATAU ONA E ILOA

O le faaalia o le talisapaia e mafai ona faaitiitia ai faafitauli i le faaipoipoga. Pe a faia taumafaiga a se tane ma se avā e mātauina ma faailoa atu uiga lelei o le isi, e masani lava ona faaleleia ai la laʻua faiā. E mafai foʻi ona faaitiitia feeseeseaʻiga matuiā pe a lagona e paaga le talisapaia e le tasi o le isi.

Mo avā. Ua faamatalaina i le tusi Emotional Infidelity, “o le toʻatele o fafine e masani ona lē amanaʻia le telē o le tiute tauave o loo feagai ma tane o le tausia lea o o latou aiga.” I nisi o vaipanoa, e ono tulaʻi mai lenā tulaga i aiga e faigaluega uma le tane ma le avā.

Mo tane. E masani ona manatu māmā tane i taumafaiga a le avā e fesoasoani i le tausiga o le aiga, e ala i le faigaluega, tausia aʻe o le fanau, po o le faia o feʻau i le fale. Ua faapea mai Fiona * lea ua tusa ma le tolu tausaga talu ona faaipoipo: “O i tatou uma e fai mea sesē, ma pe a ou faia se mea sesē e lē lelei oʻu faalogona. O lea, pe a faamālō mai laʻu tane ona o se mea na ou faia e pei o feʻau i le fale, ou te iloa ai o loo ia alofa pea iā te aʻu e ui i oʻu sesē. Ou te lagona foʻi le fiafia, ma maua le lagolagosua.”

I se faaeseesega, pe a lagona e se paaga le lē talisapaia o ia, e mafai ona faavaivaia ai le fusi o se faaipoipoga. Ua faapea mai se avā e igoa iā Valerie: “Pe a e lagona e lē o talisapaia oe e lau paaga, e faigofie ona e tosina atu i se tasi e faia mea e te lagona ai o loo talisapaia oe.”

 MEA E MAFAI ONA E FAIA

Ia mataalia. I le vaiaso o loo sosoo mai, ia mātau uiga lelei e faaalia e lau paaga. Ia mātau foʻi mea e na te faia ina ia sologa lelei ai lo oulua aiga, atonu o ni mea e te lē o talisapaia i le taimi lenei. I le faaiʻuga o le vaiaso, fai se lisi o (1) uiga o lau paaga e te talisapaia ma (2) mea na ia faia mo le lelei o lo oulua aiga.Mataupu silisili o le Tusi Paia: Filipi 4:8.

Aiseā e tāua ai le mataalia? Ua faapea mai se avā e igoa iā Erika: “Pe a mavae ni nai tausaga talu ona e faaipoipo, o le a amata ona e lē toe talisapaia lau paaga. E te lē toe mātauina mea lelei e na te faia, ae e tele ina taulaʻi atu i mea e na te o faia.”

Ia fesili ifo: ʻPo ou te talisapaia galuega mamafa a laʻu paaga?’ O se faataʻitaʻiga, pe afai e faaleleia e lau tane mea i le fale, pe e te faatalatū e faafetai atu iā te ia ona e te manatu o lana tiute tauave le faia o na galuega? Pe afai o oe o se tane, pe e te manatu e lē tatau ona faamālō atu i taumafaiga a lau avā i le tausiga o le fanau, talu ai o le mea lea e tatau ona ia faia? Ia fai ma ou sini le mātauina ma ia lotofaafetai i taumafaiga uma a lau paaga e tusa pe e itiiti pe e tele, mo le lelei o lo oulua aiga.—Mataupu silisili o le Tusi Paia: Roma 12:10.

Ia faamālō atu e lē aunoa. E lē o tau ina faapea mai le Tusi Paia ia lotofaafetai, peitaʻi o loo taʻua ai “ia faaalia foʻi lo outou loto faafetai.” (Kolose 3:15) O lea, ia fai ma masani le faafetai atu i lau paaga. Ua faapea mai se tane e igoa iā James: “Pe a faailoa mai e laʻu avā lona lotofaafetai mo mea ou te faia, e uunaʻia ai aʻu ina ia galue mamafa e avea o se tane lelei, ma faia gaoioiga e faaleleia atili ai la ma faaipoipoga.”Mataupu silisili o le Tusi Paia: Kolose 4:6.

E faamalosia le faiā a tane ma avā pe a faaalia le lototalisapaia o le tasi i le isi. Ua faapea mai se tane e igoa iā Michael: “Ou te talitonu e mafai ona tumau pea le tele o faaipoipoga pe afai e taulaʻi paaga i mea e fiafia ai le tasi i le isi. Pe a tulaʻi mai faafitauli e latou te lē manatu e tatala le faaipoipoga, talu ai o loo latou manatuaina pea mea lelei i a latou faaipoipoga.”

^ pala. 9 Ua suia nisi igoa.

Faitau Atili

O le ā le Manatu o le Tusi Paia e Faatatau i le Lotofaafetai?

E tele aogā o le faaalia o lenei uiga. E faapefea ona fesoasoani lenei uiga iā te oe, ma e faapefea ona e atia‘e lenei uiga?