Skip to content

Skip to secondary menu

Skip to table of contents

Molimau a Ieova

Faa-Samoa

Ala Mai!  |  Nu. 1 2016

 MATAUPU AUTŪ

Ia Iai se Vaaiga Saʻo

Ia Iai se Vaaiga Saʻo

O le ā sou manatu, o lē fea o mea nei e telē sona aafiaga i lou mauaina o le fiafia?

  • lou tulaga

  • auala na faia ai oe

  • lau vaaiga i mea

O NISI e tali mai o le “tulaga,” ma atonu e faapea mai, “Ou te fiafia . . .

  • “pe ana tele ni aʻu tupe”

  • “pe ana lelei laʻu faaipoipoga”

  • “pe ana lelei loʻu soifua mālōlōina”

Peitaʻi, ina ia maua le fiafia, e sili atu ona tāua lau vaaiga i mea, nai lo o lou tulaga ma le auala na faia ai oe. E talafeagai lenā manatu auā e lē mafai ona e pulea lou tulaga ma le auala na faia ai oe, ae e mafai ona e pulea lau vaaiga i mea.

ʻE AOGĀ E MĀLŌLŌ AI’

Ua taʻua i le Faataoto 17:22: “O le loto e fiafia e aogā auā e mālōlō ai, a o le loto e momomo e mamago ai ivi.” I nisi faaupuga, e tāua le iai o se vaaiga saʻo! E mafai ona e ausia pe faamaamulu ai i se sini, ma pe a tulaʻi mai se tulaga faigatā, e mafai ona iloa ai ou uiga lelei po o uiga lē lelei.

O nisi atonu e lē mautonu i lenei manatu. E latou te ono faapea mai:

  • ʻAiseā e natia ai tulaga faigatā o loo feagai ma aʻu, ma faafoliga atu o loo lelei mea uma?’

  • ʻE tusa pe saʻo laʻu vaaiga i mea, ae e lē suia ai le tulaga ua tupu iā te aʻu.’

  • ʻE sili le talia o tulaga moni o loo tutupu, nai lo o le avea ma sē e moomoo i mea.’

Atonu e foliga mai e talafeagai nei manatu, peitaʻi e tāua le iai o se vaaiga saʻo. O se faataʻitaʻiga, seʻi manatu i tulaga o loo mulimuli mai.

 E tofu Aleki ma Peni ma galuega na galulue malolosi ai i le la fale faigaluega. Ina ua uma ona iloilo a la galuega e lē e vaaia le ʻaufaigaluega, sa ia faailoa atu mea autū na faalētonu i a la galuega.

  • Aleki: “E tele aʻu taumafaiga ma le taimi na alu i le faiga o lenei galuega, ae e lē o saʻo lava. E lē taitai ona ou taulau i lenei galuega. E tusa po o le ā loʻu taumafai malosi, e lē taitai ona lelei. E maʻimau le taimi.”

  • Peni: “Sa faailoa mai e loʻu pule itu e fiafia ai i laʻu galuega, ae e iai lava mea tāua sa sesē. O lea ua ou aʻoaʻoina mai ai ni lesona aogā e fesoasoani iā te aʻu ina ia faaleleia ai i se isi taimi.”

O LE Ā SOU MANATU?

  • Pe a mavae le ono masina, o ai lē o le a sili ona faigaluega lelei, o Aleki po o Peni?

  • Pe afai o oe o le pule o se galuega, o ai o i laʻua e te faafaigaluegaina?

  • Pe a e feagai ma tulaga e lē fiafia ai, pe e te tali atu e pei o Aleki po o Peni?

O loo mafatia uma Ana ma Pele i faalogona tuua toʻatasi. E eseese uma auala e la te taulima ai nei tulaga.

  • E tele ina mafaufau Ana mo na o lona lava lelei. E lē manaʻo e fai ni mea mo isi seʻi vaganā ua latou faia muamua mai ni mea mo ia. Ua ia faapea ifo: ʻAiseā e maʻimau ai fua loʻu taimi i tagata e leai saʻu mea e maua ai?’

  • E taumafai malosi Pele ia agalelei i tagata ma fai mea mo isi, e tusa pe e latou te talisapaia pe leai. E ola o ia e tusa ai ma le Tulafono Faaauro, e feutagaʻi ma isi i le auala e manaʻo e feutagaʻi ai isi ma ia. (Luka 6:31) E manatu Pele o le faia o mea lelei e maua ai le faamalieina e tusa pe e talileleia e isi pe leai.

O LE Ā SOU MANATU?

  • O ai o i laʻua nei e te manaʻo e fai ma au uō?

  • O ai o i laʻua e sili ona faamalieina i ana faiā ma isi?

  • Pe afai o loo e mafatia ona o lagona tuua toʻatasi, pe e te taulima e pei o le auala a Ana, pe e pei o Pele?

Atonu e te iloaina ni tagata e pei o Peni ma Pele, pe e te lagona foʻi e pei o i laʻua. Pe afai o le tulaga lenā, e mautinoa la ua e iloa le tāua o le iai o se vaaiga saʻo i lou olaga. Ae faapefea pe afai e pei oe o Aleki ma Ana? Seʻi iloilo auala e tolu e mafai ona fesoasoani ai le Tusi Paia iā te oe, ina ia iai se vaaiga saʻo i tulaga faigatā o le olaga.

 1. ʻALOFIA LE MAFAUFAU E LEAI SE FAAMOEMOE

LE MANATU O LE TUSI PAIA: “Po ua e lotovaivai ea i le aso o le puapuaga? O le a itiiti lou malosi.”—Faataoto 24:10.

LE UIGA: O le mafaufau e leai se faamoemoe, o le a faaitiitia ai le malosi e te manaʻomia e faaleleia pe fesoasoani e feagai ai ma se tulaga ua tupu iā te oe.

FAATAʻITAʻIGA: Sa faanoanoa le olaga tuputupu aʻe o Juliza. Na pulea lona tamā e le ʻava ma na matitiva lona aiga. Sa latou siitia solo mai i lea nofoaga i lea nofoaga. I le taimi muamua, sa manatu Juliza e lē mafai ona toe faaleleia tulaga ua tutupu i lona olaga. Peitaʻi na suia. E faapefea? Ua taʻua e Juliza: “A o leʻi foʻia e oʻu mātua o la faafitauli, sa fesoasoani le Tusi Paia iā te aʻu ina ia faaleleia le auala ou te vaai ai i mea. O loo fesoasoani pea le Tusi Paia iā te aʻu i aso nei ina ia saʻo laʻu vaai. O lea pe a faaalia mai e tagata ni uiga ou te lē fiafia i ai, ou te taumafai e malamalama i le māfuaaga ua latou faia ai faapea.”

E pei ona iloa e Juliza, o le Tusi Paia o se tusi o loo iai mataupu silisili e aogā. E mafai ona fesoasoani fautuaga o loo iai e te onosaia ai tulaga lē lelei e tutupu mai. O se faaaʻoaʻoga, ua faapea mai le Efeso 4:23: “Ia faafouina le malosi e pulea ai o outou mafaufau.”

Ua faaalia mai i lenei mau, e mafai ona e suia lau vaaiga i mea. E mafai ona e “faafouina” ou mafaufauga. Peitaʻi, o lenei suiga o se mea e faaauau pea ona fai.

2. IA TAULAʻI ATU I MEA LELEI

LE MANATU O LE TUSI PAIA: “O aso uma o lē ua mafatia e leaga; a o lē ua lelei lona loto, e fai e lē aunoa lana faigaʻai.”—Faataoto 15:15.

LE UIGA: Pe afai e lē saʻo lau vaaiga i mea uma, o le a e “mafatia” ma foliga mai e “leaga” aso uma iā te oe. Ae afai e te taulaʻi atu i mea lelei, o le a ʻlelei lou loto’ ma e lagona le fiafia. O lea, e faalagolago lava iā te oe.

FAATAʻITAʻIGA: Ina ua uma ni taotoga o Yanko e aveese ai se tuma sa i lona faiʻai, sa lē atoa le malosi o lona tino ma na aafia ai lana gaoioi ma le tautala. Sa matuā lotovaivai Yanko mo le tele o tausaga, ona sa manatu o le a lē mafai ona ia ausia ona sini. Peitaʻi na suia lea tulaga. Ua ia taʻua: “Nai lo o le taulaʻi atu i mea ua lē mafai ona ou faia, sa faatumu loʻu mafaufau i mea e faalaeiau ai.”

O se tasi o auala e faia e Yanko, o le faitauina lea o le Tusi Paia. Ua ia faapea mai: ʻO lenei faiga ua fesoasoani e saʻo ai pea laʻu vaaiga i mea. E lē faapea ua matuā lafoaʻia oʻu sini mo le lumanaʻi, ae o loo ou taulaʻi atu i sini lāiti e mafai ona ou ausia i le taimi nei. Pe a oso aʻe ni manatu e faavaivaia ai, ou te mafaufau i le tele o māfuaaga e ao ai ona ou fiafia.’

I le pei o Yanko, e mafai ona e teena le mafaufau ua leai se faamoemoe, ae suia i ni mafaufauga lelei. Pe afai o loo e feagai ma ni tulaga lē lelei, atonu o se faafitauli i le soifua mālōlōina e pei ona tupu iā Yanko, ia fesili ifo: ʻPo ua leai moni lava se mea e mafai ona fai i lenei tulaga? Po o le iʻuga lea, po ua na o se faafitauli e mafai ona onosaia?’ Ia teena mafaufauga lē saʻo, e ala i le uaʻi atu i se mea lelei.

 3. IA FAIA MEA MO ISI

LE MANATU O LE TUSI PAIA: “E sili le fiafia e maua i le foaʻi atu i lo o le talia mai.”—Galuega 20:35.

LE UIGA: O lē e foaʻi atu ma le lē manatu faapito, e na te lagona le matuā faamalieina. Aiseā? Auā na foafoaina i tatou ina ia faia nisi mea, nai lo o le tau ina tausia o o tatou lava manaʻoga. (Filipi 2:3, 4; 1 Ioane 4:11) O le tofo i le olioli ona o le foaʻi atu, e fesoasoani tele iā i tatou e onosaia ai tulaga lē lelei e tutupu i le olaga.

FAATAʻITAʻIGA: Na fanau mai Josué e iai se faalētonu i lona tuasivi. E masani ona matuā tigā ma gāoi lona tino. Peitaʻi e fiafia le olaga o Josué ona o le fesoasoani i isi. Ua faapea mai o ia: “Nai lo o le mafaufau, ʻE lē mafai ona ou faia lenā mea,’ ou te mafaufau i ni auala e mafai ona ou fesoasoani ai i tagata i mea manaʻomia i aso taʻitasi. E iai lava mea e mafai ona ou fesoasoani ai i isi, ma ou te matuā lagona ai le fiafia.”

MEA E MAFAI ONA E FAIA

Ia vaai ni avanoa e faaalia ai le agaga faataulaga. O se faataʻitaʻiga, pe e mafai ona e saunia se meaʻai mo sou tuaoi o loo maʻi? Pe e iai ni tagata matutua e te iloa o loo manaʻomia se fesoasoani i ni feʻau e fai i le fale?

O le mauaina o se vaaiga saʻo, e pei lava o le auala e te tausia ai se togālaau. E vele ese vao leaga, totō laau mananaia, ma tuu iai se faalelei eleele, ona iʻu ai lea ina ola ma fua, ma o le a avea o se mea e te matuā fiafia i ai. I se tulaga tutusa, ia liaʻi ese ni mafaufauga lē saʻo ma le mafaufau e leai se faamoemoe, ia atiaʻe se vaaiga mautinoa, ma ia faia ni gaoioiga e iʻu ai i faalogona lelei. O le faia faapea o le a e selesele ai i se olaga faamalieina, ma faamaonia ai e tāua tele le iai o se vaaiga saʻo.

O nisi tagata e latou te lē taliaina nisi o meaʻai ona e mo lo latou soifua mālōlōina lelei. E mafai foʻi ona e faia faapea i le teena o mafaufauga lē saʻo

Faitau Atili

TALA LELEI MAI I LE ATUA!

E Faapefea Ona Aogā iā i Tatou Mataupu Silisili o le Tusi Paia?

Na taʻua e Iesu le māfuaaga e tatou te manaʻomia ai taʻitaʻiga, faapea mataupu silisili e lua e sili ona tāua.