Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NU. 1 2016

O ā Mea o E Iloa e Faatatau i Molimau a Ieova?

O ā Mea o E Iloa e Faatatau i Molimau a Ieova?

E te vaaia i matou i la matou talaʻiga. Atonu ua e faitau i lipoti o tala fou pe faalogo i ni tala e faatatau iā i matou. Peitaʻi o le ā le tele o mea o e iloa e faatatau i Molimau a Ieova?

ILOILO LOU ILOA

Faailoga po o fea o manatu nei e saʻo pe sesē.

SAʻO SESĒ

  1. O Molimau a Ieova o ni Kerisiano.

  2. E talitonu Molimau a Ieova e ono aso taʻi 24 itula na foafoaina ai le lalolagi.

  3. E lē talia e Molimau a Ieova ni togafitiga faafomaʻi.

  4. O Molimau a Ieova e talitonu i le Tusi Paia atoa.

  5. E faaaogā e Molimau a Ieova na o la latou lava faaliliuga o le Tusi Paia.

  6. Ua suia e Molimau a Ieova la latou Tusi Paia ina ia fetaui i o latou talitonuga.

  7. E teena e Molimau a Ieova le faia o galuega mo le lautele.

  8. E vaai maualalo Molimau a Ieova i tagata o isi lotu.

Mo tali o nei fesili, tagaʻi i itulau o loo sosoo mai.

  1.  1. SAʻO. E matou te taumafai malosi e mulimuli i aʻoaʻoga ma le auala na soifua ai Iesu Keriso. (1 Peteru 2:21) Peitaʻi, e tele vala e ese ai i matou mai i isi tapuaʻiga ua taʻua foʻi o Kerisiano. O se faaaʻoaʻoga, ua matou iloa o loo aʻoaʻo i le Tusi Paia o Iesu o le Alo o le Atua, ae e lē o se vaega o le Tolutasi. (Mareko 12:29) E matou te lē talitonu e iai se vaega o le tagata e ola pea pe a oti, pe taʻua foʻi i le Tusi Paia e faapuapuagatia e le Atua tagata i se afi e faavavau. E matou te lē talitonu foʻi e tatau ona iai ni taʻu faapitoa e avatu i taʻitaʻi lotu, ina ia faasilia ai i latou nai lo o isi.—Failauga 9:5; Esekielu 18:4; Mataio 23:8-10.

  2. 2. SESĒ. E matou te talitonu na foafoaina e le Atua mea uma. Peitaʻi e matou te lē lagolagoina manatu o ē e talitonu, e ono aso taʻi 24 itula na foafoaina ai le lalolagi. Aiseā? Talu ai o le tele o talitonuga a ē e ioe i lenei manatu, e feteenaʻi ma le Tusi Paia. Mo se faaaʻoaʻoga, e manatu nisi o aso e ono na foafoaina ai le lalolagi, o aso moni lava e taʻi 24 itula. Peitaʻi o le upu “aso” i le Tusi Paia e mafai ona faasino atu i se umi e sili atu. (Kenese 2:4; Salamo 90:4) E aʻoaʻo foʻi e nisi o i latou e faapea, ua na o ni nai afe tausaga talu ona iai le lalolagi. Peitaʻi ua faaalia mai i le Tusi Paia, ua leva ona iai le lalolagi ma le vateatea a o leʻi oo i aso e ono na faia ai le foafoaga. 1Kenese 1:1.

  3. 3. SESĒ. E matou te talia togafitiga faafomaʻi. O nisi foʻi o i matou o ni fomaʻi, e pei o le Kerisiano o Luka i le uluaʻi senituri. (Kolose 4:14) Peitaʻi, e matou te teena so o se togafitiga e feteenaʻi ma mataupu silisili o le Tusi Paia. O se faaaʻoaʻoga, e matou te lē taliaina ni tuigātoto, ona e teena e le Tusi Paia le ʻaina ma le tuiina o le toto i totonu o le tagata.—Galuega 15:20, 28, 29.

    E ui i lea, e matou te saʻilia ni togafitiga e sili ona lelei mo i matou ma o matou aiga. O togafitiga e faasaoina ai le toto na fuafuaina e fesoasoani i Molimau a Ieova, ua mafai foʻi ona aogā i tagata lautele. I le tele o atunuu, e mafai ona filifili le tagata maʻi e ʻalofia lamatiaga o tuigātoto, e pei o faamaʻi e feaveaʻi e le toto, aafiaga i le malosi o le tino e puipuia ai mai i faamaʻi, ma nisi faalētonu e pogai mai i togafitiga a fomaʻi.

  4. 4. SAʻO. E matou te talitonu o le Tusi Paia atoa “e mai i le agaga o le Atua, ma e aogā.” (2 Timoteo 3:16) E aofia ai le Feagaiga Tuai ma le Feagaiga Fou, e pei ona iloa ai e le toʻatele. Ae e masani ona matou taʻua vaega ia o le Tusi Paia, o Tusitusiga Eperu ma Tusitusiga Eleni. O lenei faiga e ʻalofia ai le manatu o nisi vaega o le Tusi Paia ua leva po ua lē toe aogā.

  5.  5. SESĒ. E tele faaliliuga eseese o le Tusi Paia e matou te faaaogāina i a matou suʻesuʻega. Ae i gagana ua faaliliuina ai le Tusi Paia o le Faaliliuga a le Lalolagi Fou, ua matou fiafia e faaaogā ona o loo iai le suafa o le Atua, e saʻo ma faigofie ona malamalama i ai. Seʻi manatu i le faaaogāina o le suafa o le Atua, o Ieova. I upu tomua o se tasi o faaliliuga o le Tusi Paia, o loo lisi mai ai igoa o i latou e toʻa 79 na sauniunia lenā faaliliuga. Peitaʻi, ua aveesea ai le suafa o le tusitala autū, o Ieova le Atua. Ae i le Faaliliuga a le Lalolagi Fou, ua toe tusia ai le suafa o le Atua i le tele o vaega na tusia ai i le uluaʻi tusitusiga o le Tusi Paia. 2

  6. 6. SESĒ. Pe a matou iloa ane e lē o ōgatusa o matou talitonuga ma le Tusi Paia, ona toe fetuunaʻi lea o lo matou malamalamaga. A o leʻi taitai faia Le Tusi Paia o le Faaliliuga a le Lalolagi Fou i le 1950, na matou faaaogāina lava faaliliuga na iai i lenā taimi ma faavae aʻe ai o matou talitonuga.

  7. 7. SESĒ. E toʻatele ua maua aogā mai i la matou talaʻiga. Ua matou fesoasoani i le toʻatele ina ia taofia masaniga leaga, e pei o le pulea i fualaau faasāina ma le ʻava malosi. Ua fesoasoani a matou vasega o loo aʻoaʻo ai le faitau ma le tusitusi, i le faitau afe o tagata i le lalolagi aoao ina ia iloa tusitusi ma faitau. I taimi o mala faalenatura, e matou te saunia fesoasoani laveaʻi mo Molimau a Ieova ma i latou e lē o ni Molimau a Ieova. E matou te taumafai e fesoasoani i le itu tau faalogona ma le itu faaleagaga o ē e mafatia i taimi faapena. 3

  8. 8. SESĒ. E matou te mulimuli i le fautuaga a le Tusi Paia “ia āva i ituaiga uma o tagata,” e tusa lava po o ā o latou talitonuga. (1 Peteru 2:17) Mo se faaaʻoaʻoga, i nisi atunuu o loo iai le faitau selau afe o Molimau a Ieova, e matou te lē uunaʻia faipule po o i latou e faia tulafono, ina ia taofi pe faasā galuega a isi lotu. E matou te lē taumafai foʻi e lagolagoina le faia o ni tulafono, ina ia faamalosia ai tagata lautele ia mulimuli i a matou tapulaa ma talitonuga. Nai lo o lea, e matou te faaaloalogia i latou e fai a latou lava galuega, e pei foʻi ona latou faia faapea iā i matou.—Mataio 7:12.

O lenei mataupu o loo aofia ai nisi faamatalaga mai i la matou upega tafaʻilagi aloaʻia o le jw.org/sm. Ina ia iloa atili, tagaʻi i le vaega MOLIMAU A IEOVA > FESILI E MASANI ONA LĀGĀ.

^ 1. O lea e matou te lagolagoina ai saʻiliʻiliga a saienitisi, ia e faaalia ai e faapea atonu ua faitau piliona tausaga talu ona iai le lalolagi.

^ 2. E iai se isi vala e matilatila ai le Faaliliuga a le Lalolagi Fou. E tufa fua e leai se tau. O lea, e faitau miliona i latou ua mafai ona faitau i le Tusi Paia i a latou lava gagana. Ua maua le Faaliliuga a le Lalolagi Fou i gagana e 130. E mafai foʻi ona e faitau i ai i le upega tafaʻilagi o le www.jw.org/sm.

^ 3. O se tasi o vala e matou te faaaogā ai meaalofa tauofo, o le saunia lea o fesoasoani laveaʻi mo ē e aafia i mala faalenatura. (Galuega 11:27-30) Talu ai o i latou e faia ia galuega e galulue tauofo, o lea e faaaogā ai foaʻi tauofo mo fesoasoani laveaʻi, ae e lē totogia ai i latou o loo galulue.

Faitau Atili

O ā Mea o Loo Faia i se Maota mo Sauniga?

Asiasi atu i ai mo lou silafia.

O le ā e Faia i se Su‘esu‘ega Faale-Tusi Paia?

I le lalolagi aoao, ua lauiloa Molimau a Ieova i a latou polokalame o su‘esu‘ega faale-Tusi Paia e leai se totogi. Taga‘i i le auala e faia ai.

Aiseā ua Ta‘ua ai i Matou o Molimau a Ieova?

Iloilo māfuaaga e tolu ua suia ai lo matou igoa i Molimau a Ieova.