Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NU. 1 2016

 FESOASOANI MO LE AIGA | FANAU TALAVOU

Auala e Maua ai ni Uō Moni

Auala e Maua ai ni Uō Moni

LE LUʻI

E faafetaia le tekinolosi faaonapōnei, ona ua sili atu ona faigofie ona fesootaʻi ai ma le toʻatele o tagata i so o se taimi. Peitaʻi e foliga mai e lē tumau faauōga e faia aʻe e ala i nei faiga. Ua faapea mai se alii talavou: “E lē tumau aʻu faauōga, ae o loʻu tamā ua autausagā o māfana a latou mafutaga ma ana uō.”

Aiseā o se luʻi ai i aso nei le maua o ni faauōga e tumau ma fiafia?

MEA E TATAU ONA E ILOA

Atonu o le tekinolosi faaonapōnei le isi pogai. E foliga mai e mafai ona tumau se faauōga pe a talanoa e ala i feʻau tusitusia i le telefoni ma fetusiaʻiga i le initaneti, e aunoa ma le talanoa faafesagaʻi. Ua suia le talanoa faafesagaʻi i feʻau tusitusia. Ua taʻua i le tusi Artificial Maturity: “Ua seāseā talanoa faafesagaʻi tagata. Ua tele le taimi e faaalu e tamaiti aʻoga i masini faaonapōnei, nai lo o le talanoa ma isi.”

O nisi taimi e foliga mai o loo māfana ni faauōga e fetalanoaaʻi e ala i le tekinolosi, peitaʻi e lē o le tulaga moni lenā. Na faapea mai Brian, * o lē e 22 ona tausaga, “Talu ai nei na ou iloa ai o aʻu lava e tausolomua e lafo atu feʻau tusitusia i aʻu uō, e vaai po o ā mai i latou. Na ou lē toe lafoina atu i ai se feʻau tusitusia, seʻi vaai po o ai o i latou e nofonofo lafo mai sana feʻau tusitusia iā te aʻu. O laʻu tala moni lava o le toʻatele o i latou e leʻi faia faapea. Ua ou iloa ai o nisi o aʻu uō e lē māfana la matou faauōga e pei ona ou manatu i ai.”

Pe e aogā le lafo atu o feʻau tusitusia ma le talanoa i le initaneti, ina ia e fesootaʻi ai pea ma tagata ma faamalosia ai a outou faauōga? Ioe, e aogā, aemaise lava la pe afai e iai foʻi ni taimi e tou te talanoa faafesagaʻi ai ma na tagata. Peitaʻi, o le faaaogā o le initaneti e talanoa ai, o le a faigatā ai ona e māfana ma vavalalata atu i au uō.

 MEA E MAFAI ONA E FAIA

Ia iloa le mea e taʻu o le uō moni. Ua faamatala i le Tusi Paia se uō, o sē e “sili ona alofa faamaoni nai lo o le uso.” (Faataoto 18:24) Po o le ituaiga uō lenā e te manaʻo i ai? Po o avea oe ma se uō faapena? Ina ia tali nei fesili, ia tusi i lalo ni uiga se tolu e te manaʻo ia iai i sau uō. Pe a uma, ona tusi lea i lalo o ni uiga se tolu e te faaalia i au uō. Ia fesili ifo: ʻO ai o aʻu uō i le initaneti e faaalia uiga ia ou te faatāuaina i se uō? O ā uiga o le a faapea mai aʻu uō o loo oʻu faaalia?’—Mataupu silisili o le Tusi Paia: Filipi 2:4.

Ia iloa mea o loo faatāua. O faauōga e fetalanoaaʻi i luga o le initaneti, e masani ona faavae aʻe i mea e fiafia i ai. Peitaʻi e sili atu ona tāua i se faauōga le tutusa o mea e faatāua, nai lo o le tutusa o mea e fiafia i ai. Ua faapea mai Lina, o lē e 21 ona tausaga, “Atonu e lē toʻatele ni aʻu uō, ae o aʻu uō ia e iai e latou te faalaeiau aʻu ia avea ma se tagata lelei.”—Mataupu silisili o le Tusi Paia: Faataoto 13:20.

Ia talanoa faafesagaʻi ma tagata. E sili atu ona lelei le talanoa faafesagaʻi, auā e mafai ai ona lua mātauina ma lē o loo oulua talanoa, fesuiaʻiga o o oulua leo, foliga vaaia ma taga.—Mataupu silisili o le Tusi Paia: 1 Tesalonia 2:17.

Tusi se tusi. Atonu e manatu i lenei auala o se faiga tuai. Peitaʻi o le tusia o se tusi, e taʻu atu ai o loo e naunau e uaʻi atoatoa atu i lē o loo ave i ai le tusi. O lenei ituaiga uaʻi ua seāseā ona toe faaalia i aso nei i lenei lalolagi ua tele mea e fai i le taimi e tasi. O se faaaʻoaʻoga, na taʻua e Sherry Turkle i lana tusi Alone Together, se alii talavou na faapea mai e na te lē manatua se taimi o lona olaga na tusi mai ai se isi iā te ia. I le faasino atu i le taimi na tusi ai e tagata tusi, na faapea mai lea talavou: “Ou te misia na aso e ui lava ou te leʻi fanau mai i lenā taimi.” Aiseā e lē toe faaaogā ai lenei faiga tuai ina ia maua ai ni uō?

Manatu tāua: E tele mea e aofia ai i se faauōga moni i lo o le tau ina talanoa. E ao ona oulua faaalia ma lau uō uiga e pei o le alofa, tigā alofa, onosaʻi ma le lotofaamagalo. O nei uiga e maua ai se faauōga māfana. Peitaʻi, e faigatā ona faaalia nei uiga pe afai e na o le tekinolosi o loo faaaogā e te lua talanoa ai.

^ pala. 8 Ua suia nisi igoa i lenei mataupu.