Skip to content

Skip to secondary menu

Skip to table of contents

Molimau a Ieova

Faa-Samoa

ALA MAI! NU. 1 2016

 PE NA TEʻI LAVA UA IAI?

Le Auala e Sui ai e se Ituaiga o Gufee Lona Lanu

Le Auala e Sui ai e se Ituaiga o Gufee Lona Lanu

E MAFAI e le gufee e taʻu o le cuttlefish ona fesuisuiaʻi lona lanu ma faatutusa i vaega o loo siʻomia ai, ma e toetoe a lē mafai ai ona iloa atu e tagata. Na taʻua i se lipoti, ua lauiloa le gufee o le cuttlefish “i le tele o ituaiga lanu eseese e sui i ai lona tino, ma e vave tele ona ia faia nei suiga.” E faapefea ona faia e lenei gufee nei suiga?

Ia Mātau: E sui e le cuttlefish lona lanu e ala i le faaaogā o se ituaiga o sela faapitoa e i totonu o lona paʻu. O lenei sela faapitoa, o loo iai ni mea e pei o ni tamaʻi taga e tumu i vaitusi o lanu, ma e siʻomia i musele ninii. Pe a manaʻo le cuttlefish e sui lona lanu, e taʻu atu e lona faiʻai i nei musele ia faamimigi i totonu. Pe a tupu lenā tulaga, e fefete tamaʻi taga ma vaitusi o loo iai, ona suia faafuaseʻi ai lea e le cuttlefish o lona lanu ma foliga. E lē gata e na te faaaogā lenei faiga ina ia sui ai lona lanu, ae e faatosina mai ai foʻi le isi gufee e ono avea ma ana paaga, ma atonu e na te faaaogā e fesootaʻi ai.

Ua fausia e saienitisi i le Iunivesite o Bristol i Egelani se una faataʻitaʻi o le paʻu o le cuttlefish. E latou te tuu faafelataʻi ni paʻu manifinifi lapotopoto lanu uli, i le va o ni tamaʻi uaea e galulue e pei o musele o le cuttlefish. E tuu loa i ai e le ʻau suʻesuʻe le eletise i le paʻu, ona mimigi lea o tamaʻi uaea ae fefete paʻu manifinifi lapotopoto lanu uli. O le iʻuga, o le a malosi le lanu ma suia ai le lanu o lenei paʻu faataʻitaʻi.

E tusa ai ma suʻesuʻega i musele o le cuttlefish, na taʻua e se saienitisi e igoa iā Jonathan Rossiter, “o le mataʻina o le auala na faia ai lenei foafoaga o le natura,” atonu e mafai ai ona faia ni ofu e fesuisuiaʻi lanu a o leʻi atoa se sekone. Na taʻua e Rossiter e ono ofu e tagata ni ofu ua faataʻitaʻi i le paʻu o le cuttlefish, ina ia faatutusa ai le lanu o le ofu ma lanu o mea o loo siʻomia ai i latou, pe tau foʻi ina avea o se sikaili.

O le ā sou manatu? Pe na teʻi lava ua mafai e le gufee o le cuttlefish ona suia lona lanu? Pe na foafoaina?