Skip to content

Skip to secondary menu

Skip to table of contents

Molimau a Ieova

Faa-Samoa

La Tatou Faiva ma le Olaga Faa-Kerisiano–Polokalame mo le Sauniga  |  Oketopa 2017

 AUALA E OLA AI O SE KERISIANO

Auala e Avea ai ma Tagata Suʻesuʻe Filigā o le Tusi Paia

Auala e Avea ai ma Tagata Suʻesuʻe Filigā o le Tusi Paia

Pe e te manaʻo e faamaoni e ui i faigatā e pei o Tanielu? Na filigā Tanielu e suʻesuʻe le Afioga a le Atua, e aofia ai valoaga faigatā. (Ta 9:2) E fesoasoani le filigā e suʻesuʻe le Tusi Paia ina ia e tumau ai faamaoni. E faapefea? E faamalosia atili ai lou faatuatua o le a taunuu folafolaga uma a Ieova. (Ios 23:14) E fesoasoani foʻi e faalolotoina lou alofa mo le Atua, ma uunaʻia oe e faia le mea saʻo. (Sl 97:10) Ae o le ā le auala e ao ona e faia ai? Mātau fautuaga nei.

  • O le ā e ao ona ou suʻesuʻeina? O se faasologa lelei mo suʻesuʻega e aofia ai le sauniuni mo sauniga. O le a tele aogā e te maua mai i le faitau Tusi Paia o le vaiaso, pe afai e te saʻiliʻili atili i ni manatu e te leʻi malamalama ai. E lē gata i lea, ua filifili nisi e aʻoaʻo atili valoaga o le Tusi Paia, vala eseese o le fua o le agaga paia, malaga faamisionare a le aposetolo o Paulo, po o foafoaga foʻi a Ieova. Pe a tau lou mafaufau i se fesili faale-Tusi Paia a o faagasolo le aso, ia tusi i lalo e te suʻesuʻe i ai i se isi taimi.

  • O fea ou te maua ai faamatalaga? Mo nisi fautuaga, maimoa i le vitiō Meafaigaluega mo Saʻiliʻiliga i ʻOa Faaleagaga. O se faataʻitaʻiga, ia saʻili po o ai malo malolosi o le lalolagi o loo faaāta mai i manufeʻai o loo i le Tanielu mataupu e 7.

  • O le ā le umi e ao ona faia ai aʻu suʻesuʻega? O le faia o suʻesuʻega e lē aunoa, o le ki lea i le mauaina o le soifua mālōlōina faaleagaga. E mafai ona faapupuu i le amataga pe a manaʻomia, ae a o faagasolo taimi, e mafai ona faia mo se taimi umi. O le suʻesuʻe i le Tusi Paia e tai pei o le saʻilia o ʻoa tautele o loo natia; o le tele o ʻoa e te maua, o le tele foʻi lenā o lou manaʻo e te saʻiliʻili atili! (Fat 2:3-6) O le a faateleina lou naunau i le Afioga a le Atua, ma o le a avea le suʻesuʻe e lē aunoa o le Tusi Paia o sau faasologa masani.​—1Pe 2:2.

O AI O LOO FAAĀTA MAI I MANUFEʻAI O LOO I LE TANIELU MATAUPU E 7?

FESILI FAAOPOOPO:

Na faapefea ona faataunuuina le Tanielu 7:8, 24?

SAʻILIʻILIGA ATILI:

O ai o loo faaāta mai e manufeʻai o loo i le Faaaliga mataupu e 13?