Skip to content

Skip to secondary menu

Skip to table of contents

Molimau a Ieova

Faa-Samoa

La Tatou Faiva ma le Olaga Faa-Kerisiano–Polokalame mo le Sauniga  |  Iuni 2017

 AUALA E OLA AI O SE KERISIANO

Ia Tausisia Tapulaa Tau Amio a Ieova

Ia Tausisia Tapulaa Tau Amio a Ieova

Na faataatia e Ieova le tapulaa tau amio mo tagata. O se faaaʻoaʻoga, na ia faatulagaina le faaipoipoga o se mafutaga tumau i le va o le tamāloa ma le fafine. (Mat 19:4-6, 9) E na te taʻusalaina so o se ituaiga o feusuaʻiga lē mamā. (1Ko 6:9, 10) Ua ia saunia foʻi taʻiala i laʻei ma teuga ina ia faaesea ai ona tagata.Te 22:5; 1Ti 2:9, 10.

I le lalolagi i aso nei, e teena e le toʻatele tapulaa a Ieova. (Ro 1:18-32) Ua latou faataga manatu taatele o tagata e aafia ai o latou laʻei ma teuga, ma a latou amioga. Ua faia ma le faaalialia e le toʻatele a latou amioga sesē matagā, ma tauemu i ē o loo ese tapulaa tau amio o loo ola ai.1Pe 4:3, 4.

I le avea ma Molimau a Ieova, e tatau ona tatou lototetele e tausisi i tapulaa tau amio a le Atua. (Ro 12:9) E faapefea? E tatau ona tatou faailoa atu ma le faautauta mea e taliaina e Ieova. Peitaʻi e manaʻomia foʻi ona tatou tausia tapulaa maualuluga tau amio i o tatou olaga. O se faaaʻoaʻoga, pe a filifilia laʻei ma teuga, ia fesili ifo: ʻPo o atagia atu i aʻu filifiliga tapulaa a Ieova po o tapulaa a le lalolagi? Po o mātauina aʻu o se Kerisiano e mataʻu i le Atua i oʻu ofu ma aʻu teuga?’ Pe fesili ifo foʻi pe a filifili se polokalame po o se ata e matamata ai: ʻPe e talia e Ieova lenei polokalame? O tapulaa tau amio a ai o loo faaauiluma i lenei polokalame? Po o le a ou lolo atu i amioga lē mamā ona o faafiafiaga ou te filifilia? (Sl 101:3) Po o le a tausuai oʻu tauaiga ma isi ona o aʻu faafiafiaga?’1Ko 10:31-33.

Aiseā e tāua ai ona tatou tausisia tapulaa tau amio a Ieova? E lē o toe umi ona faaumatia lea e Iesu atunuu ma mea leaga uma. (Esk 9:4-7) E na o i latou o loo faia le finagalo o le Atua e faasaoina. (1Io 2:15-17) O lea, seʻi o tatou tausisia tapulaa tau amio a Ieova, ina ia mafai ai e i latou o loo mātauina a tatou amioga lelei ona faamamaluina le Atua.1Pe 2:11, 12.

O le ā o loo taʻu atu i aʻu filifiliga o laʻei ma teuga e faatatau i aʻu tapulaa tau amio?

MAIMOA I LE VITIŌ AVEA OE MA UŌ A IEOVA—TASI LE TAMĀLOA, TASI LE FAFINE, ONA TALI LEA O FESILI NEI:

  • Aiseā e atamai ai le ola i tapulaa a Ieova?

  • Aiseā e tatau ai i mātua ona aʻoaʻoina fanau a o lāiti, i tapulaa tau amio a Ieova?

  • E faapefea ona fesoasoani talavou ma ē matutua i isi tagata, ina ia maua aogā mai le faamoemoe ua tuuina mai e le Atua i le lumanaʻi?