A O E talaʻi atu mai i lea fale i lea fale, ae e faalogoina loa se sailini ua amata ona ee leotele mai. A o e talaʻi atu i le fale e sosoo ai, ua tosina ese le vaai a lau paga ina ua tū atu se taavale a leoleo. Ua agaʻi atu se leoleo ma fesili atu: “O oulua lea o loo talaʻi e faatatau i le Tusi Paia? Ua tele faitioga e faatatau iā oulua.” Ua e tali atu ma le faaaloalo ma faailoa atu o oulua o Molimau a Ieova. O le ā nei le mea o le a tupu?

E faalagolago lenā vala i mea e masani ona tutupu i lou atunuu. I le tele o tausaga, na faapefea ona feagai faigāmalo ma Molimau a Ieova i le atunuu o loo e soifua ai? Po o iai se saʻolotoga tau tapuaʻiga? Afai e iai, e mautinoa la sa telē se sao o uso ma tuafāfine na galulue mamafa i aso ua mavae, e ʻtutū atu mo le tala lelei ma faamautū ai faaletulafono.’ (Fili. 1:7) O le mafaufau loloto i le tele o manumalo a Molimau a Ieova i faamasinoga, e mafai ona faamalosia ai lou faatuatua e tusa lava po o fea e te iai. I lenei vaega, o le a tatou iloiloina ai nisi o na tala mataʻina. O na manumalo o se faamaoniga sili lea o le moni o le Malo, auā e lē mafai ona tatou faataunuuina nei vala i so tatou lava malosi.