Uso ma Tuafāfine Peleina:

O nisi nei o upu a Iesu na aofia i le feʻau na ia auina atu i le faapotopotoga i Semurana: “Aua e te fefe i mea o le a e tigā ai.” (Faaa. 2:10) O lenā timaʻiga “aua e te fefe,” e aogā foʻi iā i tatou o loo ola a o faagasolo “le aso o le Alii.” (Faaa. 1:10) O le mea moni, o loo tatou ola i “aso e sili ona faigatā.” (2 Timo. 3:​1-5) E matuā faalaeiauina i matou pe a mātauina le faatuatua malosi ma le lototetele o tagata o le Atua i le lalolagi aoao, a o tutumau ma le faamaoni iā Ieova e ui i tofotofoga.

E faapefea ona faamautinoa e tatou te tutumau faamaoni, ma “e lē o ni ē e tuumuli” ona o le fefefe? (Epe. 10:39) E lē faigofie lenā tulaga, ona e iai le taimi atonu o le a tatou feagai ai ma teteega ma sauāga. Peitaʻi, e mafai ona tatou filifili e lagolagoina ma le lototetele le itu a Ieova ma faia le mea saʻo, e tusa po o i tatou o ni tagata matamumuli po o ni tagata tiotio. O le ā e mafai ona fesoasoani iā i tatou?

E mafai ona tatou lototetele ona o le fesoasoani a le Afioga a le Atua. O loo iai le tele o faaaʻoaʻoga a tane ma fafine lototetele. Ua saunia lenei tusi e fesoasoani iā i tatou e iloilo a latou faaaʻoaʻoga, ma manatunatu loloto i ai. A o outou suʻesuʻeina a latou faaaʻoaʻoga ma tatalo iā Ieova, ia mafaufau i luʻi o loo outou fesagaʻia i le taimi lenei ma le lumanaʻi. Ia mafaufau i auala e mafai ona fesoasoani mai ai Ieova ina ia outou lototetele. Ia tomānatu pe e faapefea i le lototetele o nei tane ma fafine, ona fesoasoani e atiaʻe lo outou lototetele e faia mea nei:

Ia usiusitaʻi i le finagalo o Ieova. (Iako. 3:17) Na faaalia e Ionatana le faamaoni ma le lototele e lagolagoina atoatoa Tavita, o lē ua filifilia e Ieova. O le taimi lenā ua teena e Ieova Saulo, ae filifilia le talavou o Tavita e avea ma tupu e sosoo ai o Isaraelu.

Ia tausisi i tapulaa amiotonu. (Epe. 11:​32-34) Na lotomalilie Hanania, Mesaelu, ma Asaraia e fano o latou ola i se ogaumu aasa, nai lo o le ifo i se tupua ma faagutugutulua ai i tapulaa a Ieova.

 Ia faailoa atu i isi le upu moni. (Mata. 22:16) Ia tomānatu iā Saulo o Taso. Na manatu tagata o le a ia fesoasoani iā i latou e sauāina soo o Iesu. Peitaʻi, na suia le olaga o Saulo ma ia faailoa atu ma le lototele le mea moni e faatatau iā Iesu.

E matou te faamoemoe o le a fesoasoani lenei tusi iā te outou, ina ia tuputupu aʻe lo outou faatuatua ma le lototetele. (Sala. 27:14) Tau ina ia faamanuia Ieova iā te outou, a o outou fesoasoani i o outou aiga ma faapotopotoga ina ia lototetele e lagolagoina le Malo o le Atua!