NA TUSI le aposetolo o Ioane o lē ua afu le soifua: “O le itula mulimuli lenei.” Na silafia e Ioane, o ia le aposetolo mulimuli o loo totoe mai i aposetolo na faatasi ma Iesu. I le tele o tausaga na muamua atu, na valoia e Iesu ma le aposetolo o Paulo o le a sasao faaafi taaʻiga a ē e fulitua i le upu moni. Na avea le ʻauaposetolo ma ē e taofiofia na taaʻiga leaga. Peitaʻi, pe a maliliu i latou, o le a ō ane aʻoaʻo pepelo ma faaleagaina le faapotopotoga Kerisiano. (Mata. 7:15; Galu. 20:​29, 30; 2 Tesa. 2:​6, 7) E foliga mai o Ioane le aposetolo mulimuli na avea ma lē e taofiofia na taaʻiga leaga. Seʻi mafaufau i le matuā tigā o faalogona o Ioane, a o faasolo ina faaleagaina faapotopotoga taʻitasi. E ui i lea, na faaalia pea e Ioane le lototele.

A o toeitiiti atoa le 100 o ona tausaga, sa maelega pea o ia ʻe talaʻi e uiga i le Atua, ma molimau atu e faatatau iā Iesu.’ O le māfuaaga lea na faaaunuua ai o ia i Patamo, o se motu e tuufua ma gaoā i le sami o Ainea. O le ā na fesoasoani iā Ioane e lototele ai ma iai pea se vaaiga saʻo? E mautinoa na tāmau i lona mafaufau le folafolaga lenei a Iesu: “Faauta! ou te faatasi ma outou i aso uma lava seʻia oo i le taufaaiʻuiʻuga o le faiga o mea a le lalolagi.”—Mata. 28:20.

Ua silia ma le 60 tausaga talu ona faia e Iesu lenā folafolaga. A o lenei ua faaali atu Iesu iā Ioane e faailoa i ai se faaaliga ofoofogia mai iā Ieova le Atua. E mautinoa na matuā faagaeetia Ioane ina ua toe vaai ma faalogo atu iā Iesu. Sa taulaʻi le faaaliga i “le aso o le Alii,” i le taimi o le a toe faafoʻisia ma autasia ai le faapotopotoga Kerisiano. O le a fesoasoani foʻi Keriso i ona soo ina ia latou manumalo mai i tofotofoga faigatā.

O lenei faaaliga na faailoa atu iā Ioane e ala i “faailoga.” O le mea moni, e tele mea e leʻi malamalama i ai Ioane. Ae na manino i lona mafaufau, e faamautinoa e Ieova ma Iesu o le a lē taulau taumafaiga a ē e faasalalauina aʻoaʻoga sesē. A o faagasolo le aso o le Alii, o le a faatoʻateleina tagata o le Atua ma o le a latou tofo i le tele o faamanuiaga. O le a iai se taua i le lagi e faatoʻilaloina ai Satani ma lafo mai o ia i le lalolagi. Mulimuli ane, o le a faaumatia o ia e faavavau. O lenā faaaliga na matuā faamalosia ai le lototele o Ioane, ma ia tusia “mea uma na ia vaai i ai.”

E leʻi fano le ola o Ioane a o faaaunuua i Patamo, ma e leʻi lotovaivai foʻi. E aliali mai na faasaʻolotoina o ia ina ua maliu le emeperoa o Roma o Domitian,  o lē na matuā ʻinoʻino i Kerisiano. Mulimuli ane, e foliga mai na toe foʻi Ioane i Efeso. Sa maua e Ioane se tofiga fou faigatā i le pe tusa ma le 100 o ona tausaga.

Na faagaeeina Ioane e tusia le Evagelia lona fā, o le Evagelia mulimuli foʻi lea. Na ia iloa o le a vave ona oo atu lenei tusi i faapotopotoga taʻitasi, ma faalaeiauina ai le toʻatele o Kerisiano ina ia lototetele ma faatuatua. O lenā gaoioiga na matuā lamatia ai lona ola, ona o ē na ʻinoʻino i le faa-Kerisiano. Peitaʻi, e leʻi faavaivai ai o ia.

Ua silia ma le 70 tausaga talu mai le taimi na soifua ai Iesu i le lalolagi. E ui i lea, o le fesoasoani a le agaga paia na mafai ai e Ioane ona manatua lelei mea mataʻina na tutupu i le soifuaga o Iesu. Na tusia e Ioane se tala faaoso naunau o le olaga o Iesu. O le tele o na faamatalaga, e lē o aofia i isi Evagelia e tolu na tusia i se taimi na muamua atu. O se faaaʻoaʻoga, e na o Ioane na tusi e faatatau i le toetū o Lasalo, ma le faufauga a taʻitaʻi lotu e fasiotia Lasalo. (Ioa. 11:​1-46; 12:10) Na faamatala auʻiliʻili foʻi e Ioane fetalaiga a Iesu i ona soo, ma lana tatalo mo i latou i le pō na faalataina ai Iesu. Maʻeu se meaalofa tautele na avatu e Ioane mo Kerisiano uma!

Na tusia foʻi e Ioane i lenā taimi ni tusi faagaeeina se tolu i ona uso Kerisiano. E leʻi fefe o ia e faaalialia i lumāmea taaʻiga a ē ua fulitua i le upu moni. Sa ia lapataʻia Kerisiano ina ia aua neʻi faifaimea ma i latou e oo lava i le faatalofa i ai. O loo faamatilatila mai i na tusi e tolu le alofa ma le faamoemoe. Na ia taʻua “o le Atua o le alofa lava ia,” ma na ia faaatagia mai lenā alofa i ana faalaeiauga ma timaʻiga. Na ia tusi foʻi e faatatau i lona olioli tele i le vaai “o loo savavali pea” lana fanau faaleagaga “i le upu moni.” E mautinoa o lenā faalaeiauga na uunaʻia ai le toʻatele o i latou e tumau pea i le upu moni.

E lē o toe feagai Kerisiano i aso nei ma le tofotofoga faigatā na feagai ma Ioane. E moni o loo faaauau ona iai ē e fulitua i le upu moni, ae e mautinoa e lē toe faaleagaina le faapotopotoga Kerisiano, e pei ona tupu i senituri mulimuli ane talu ona maliu Ioane. (Isa. 54:17; Galu. 3:21) Atonu e oo mai teteega, sauāga, pe tuua toʻatasi foʻi i tatou e pei o Ioane. O lea, seʻi o tatou mulimuli i lana faaaʻoaʻoga. Po o ā lava puapuaga e oo iā i tatou, ae tau ina ia tatou lototetele e savavali pea ma le Atua!

Faitau le tala i le Tusi Paia:

• Ioane 16:1–17:26

• 1 Ioane 2:18; 4:8

• 2 Ioane 9-11

• 3 Ioane 4

• Faaaliga 1:​1, 2, 9-11; 12:9; 20:​1-6; 21:​1-5

Mo talanoaga:

O ā auala na faaalia ai e Ioane le lototele?

 Saʻiliʻili Atili

1. 1. O le ā e faaalia ai o Ioane o se tagata maelega ma tiotio? (bt 33, pusa ¶3-4)

   Tali

2. 2. Aiseā na taʻua ai Ioane o se “tagata e leʻi aʻoaʻoina ma e faatauvaa”? (Galu. 4:13; w08 5/15 30 ¶6)

   Tali

3. 3. O le ā na uiga i ai le tumau pea ona iai o Ioane seʻia afio mai Iesu? (Ioa. 21:22; w05 1/15 13 ¶14-15)

   Tali

4. 4. Aiseā e tatou te faapea atu ai o Ioane na tusia le Evagelia o loo faaigoa i lona igoa? (bsi08-1 12-13 ¶3-4) A

   Tali

   Fondation Martin Bodmer, Cologny (Genève)

 Manatunatu i ni Lesona

• E silia i le 100 taimi na taʻua ai i tusitusiga faagaeeina a Ioane le taulaga togiola a Iesu po o aogā o lenā togiola. E faapefea ona tatou faaalia le lotofaafetai mo le taulaga togiola a Iesu, e pei ona sa faia e Ioane?

  Tali

• E foliga mai na toeitiiti atoa le 100 tausaga o Ioane i le taimi na faagaeeina ai o ia e tusia tusi e lima o le Tusi Paia. O le ā e tatou te aʻoaʻoina mai ai i le silafaga a Ieova i ē ua loa le soifua? E

  Tali

• O ā auala e mafai ona e faaaʻoaʻo ai iā Ioane i le faaalia o le lototele i lou olaga?

  Tali

Manatunatu iā Ieova ma Lona Finagalo

• O le ā ua ou aʻoaʻoina mai i lenei tala e faatatau iā Ieova?

  Tali

• O le ā le fesootaʻiga o lenei tala ma le finagalo o Ieova?

  Tali

• O ā ni ou faalogona i le filifilia o Ioane e pule faatasi ma Keriso i le lagi, ma aiseā?

  Tali