UA TAUASO Samasoni, ae na ia lagona taufaifaiga ma ulaga a le motu o tagata o Filisitia. Aiseā na oo ai Samasoni i lenā tulaga pagatia? Na ia faailoa atu ma le valea le pogai o lona malosi tele, lea na iʻu ai ina puʻea o ia, faatauasoina, saisaitia, faafalepuipui, ma faamalosia e faia galuega a se pologa. Sa toē tagata Filisitia iā te ia ma lona Atua o Ieova. Na iloa e Samasoni e tuuaʻia o ia i mea o loo tutupu iā te ia. E tele tausaga na avea ai Samasoni o se tane e matuā lototele. Ae pe e mafai ona ia toe faaalia lenā lototele, e ui i lona tulaga vaivai ua iai nei?

Na auauna Samasoni o se faamasino i Isaraelu mo le 20 tausaga, ae na ese o ia mai i isi faamasino. O isi faamasino e pei o Parako, Kitiona, ma Iefata, na latou taʻitaʻia ni ʻautau e faasagatau i fili o le Atua. Ae e leʻi faapena Samasoni. Na tau toʻatasi o ia e aunoa ma sana ʻautau e faasaga i fili o le Atua. Na faaaogā o ia e Ieova e tau na o ia e faatoʻilalo ʻautau e toʻatele a Filisitia. Ae seʻi o tatou toe foʻi i le amataga o le tala.

Na faatonuina e le Atua mātua o Samasoni ina ia tuuina atu la laʻua tama e auauna iā Ieova o se Naseri mo lona olaga atoa. O le māfuaaga lea e leʻi ʻotiina ai lona lauulu. Afai e faaauau ona ia faamaoni i lana tautoga o se Naseri, e faamanuia o ia e Ieova e ala i lona mauaina o se malosi uiga ese. I se tasi aso, na saeluaina ai e Samasoni se leona i ona lava lima. Sa faaaogā e Samasoni lona malosi mai le Atua e faasagatau ai i tagata Filisitia, o ē na pule sauā i tagata fouvale o le Atua i Isaraelu.

I se tasi taimi, na fefefe ai tagata Isaraelu ma latou saisaitia Samasoni ma tuuina atu o ia i tagata Filisitia. Ae na motusi ese e Samasoni maea na saisai ai ona lima ua pei o ni manoa lino, ma ia fasiotia tagata Filisitia e toʻa 1,000 e faaaogā ai na o le ivi auvae o se asini. Mulimuli ane a o iai Samasoni i le aai o Kasa, na lalafi ona fili e faatalitali ma taupulepule e fasioti o ia pe a malama le taeao. Ae na tulaʻi Samasoni i le vaeluapō ma fafaʻi faitotoʻa tetele o le pā o le aai, o pou i autafa, ma le faamau o faitotoʻa. Ona ia amoina lea i lona ua ma ave aʻe i le tumutumu o le mauga e feagai ma Heperona, lea e pe ā ma le 60 kilomita (37 maila) le mamao.

E leʻi mafai lava e se tasi ona faatoʻilalo Samasoni. Na faamaonia atu e Samasoni i tagata Filisitia, e leai se malosi o o latou atua e pei o Takono e faatoʻilalo ai se auauna faamaoni a Ieova. Peitaʻi, na maua e tagata Filisitia se auala poto e maileia ai Samasoni, e ala i se fafine e igoa iā Talila.

 Na alofa Samasoni iā Talila, ae e leʻi faamaoni Talila ma na ia faalataina Samasoni. Na talia e Talila se tupe tele mai tagata Filisitia ina ia suʻesuʻe ai po o le ā le pogai o le malosi uiga ese o Samasoni. Na ia tauanau pea Samasoni e faailoa atu iā te ia. Na iʻu ina vaivai le loto o Samasoni, ma ia faamatala atu ai iā Talila le pogai o lona malosi tele. Na faailoa atu e Samasoni iā te ia pe afai e ʻoti lona lauulu, ona alu ese ai lea o lona malosi ma pei ai o ia o isi tagata. Sa faatali Talila seʻia moe Samasoni, ona valaau atu lea i se tagata e sau e ʻoti fili uumi o le ulu o Samasoni. Ona faapea mai lea o le Tusi Paia e faatatau iā Samasoni: “Ua tuua o ia e Ieova.” O lea, na mou ese atu ai le malosi o Samasoni. Sa ō mai faatopetope tagata Filisitia ma puʻea o ia ma sali ese ona mata.

Na faamalosia e fili o Samasoni o ia e faia galuega mamafa, o le oloina lea o saito mo i latou. Ua matuā fiafia tagata Filisitia, auā ua saisai lo latou fili malosi i faamau ʻapamemea ma avea o se pologa faatauvaa. Na latou fuafua se tausamiga tele mo lo latou atua o Takono. Ua oo i le aso o le tausamiga, ona faapotopoto mai lea o le faitau afe o tagata Filisitia i se malumalu tele. E pe tusa ma le toʻa 3,000 tagata na iai i le taualuga. Na mananaʻo tagata Filisitia e aumai Samasoni e matamata ma toē i ai. O lea, sa latou avatu le faatonuga e aumai o ia mai i le falepuipui ma faatū i le vā o pou tetele e lua. E oo ane i le taimi lenā, ua toe tutupu le lauulu o lenei faamasino ua salamō.

Na tagotago atu Samasoni i pou tetele ma talosaga atu iā Ieova ina ia toe faafoʻisia lona malosi. Na tatalo o ia: “Faamolemole ia e manatua mai aʻu, ma ia e faamalosia aʻu faamolemole i lenei lava taimi, le Atua e.” Ona alaga atu lea: “Ia ou oti faatasi ma tagata Filisitia!” Seʻi faaata i o tatou mafaufau Samasoni o loo faaaogā maso uma o lona tino e matuā uunaʻi ai pou tetele, ma amata ai ona maluelue. E leʻi maua e tagata Filisitia se avanoa e taofia ai Samasoni, ma ua paʻuʻū i lalo pou ma solofa ifo le malumalu atoa. O le gaoioiga mulimuli lenā na faia e Samasoni. I le aso lenā, e toʻatele atu fili o le Atua na ia fasiotia i le taimi na oti ai, nai lo o fili na ia fasiotia a o ola o ia.

I le faitau selau o tausaga mulimuli ane, na faaaofia ai e le aposetolo o Paulo Samasoni ina ua ia taʻua tane o ē na malosi lo latou faatuatua. E mautinoa na mafaufau Paulo i lenā faamasino lototele a o ia tusi e faatatau i ē na ʻtoe malolosi mai i tulaga vaivai.’—Epe. 11:​32-34.

Faitau le tala i le Tusi Paia:

• Faamasino 13:1–16:31

Mo talanoaga:

O ā auala na faaalia ai e Samasoni le lototele?

 Saʻiliʻili Atili

1. 1. Na mafai faapefea ona avea pea Samasoni o se Naseri ae sa paʻi atu o ia i tino o tagata oti? (w05 1/15 30 ¶1–31 ¶1)

   Tali

2. 2. O le ā e faaalia ai na manaʻomia e Samasoni le agaga paia o le Atua e amo ai faitotoʻa ma pou mai i Kasa e agaʻi i Heperona? (w04 10/15 15 ¶7-8) A

   Tali

3. 3. O le ā e faaalia ai atonu o Talila o se fafine Isaraelu? (w05 3/15 28 ¶3)

   Tali

4. 4. Aiseā na tatalo ai Samasoni e tauimasui “mo se tasi o [ona] mata e lua”? (Faama. 16:28; it “Samasoni” ¶10)

   Tali

 Manatunatu i ni Lesona

• Na faailoa atu e Samasoni iā Talila ni faamatalaga sa lē tatau ona faalauaʻiteleina, ina ua tauanauina o ia e Talila. O le ā se lesona mo toeaina ma a latou avā? E

  Tali

• Sa faia e Samasoni se mea sesē matuiā, ae na toe faaaogā o ia e Ieova i se tulaga mataʻina. Pe a faia e se Kerisiano se mea sesē i aso nei, e faapefea i le faaaʻoaʻoga a Samasoni ona faamalosia o ia e finafinau pea?

  Tali

• E faapefea ona e faaaʻoaʻo iā Samasoni i le faaalia o le lototele i lou olaga?

  Tali

Manatunatu iā Ieova ma Lona Finagalo

• O le ā ua ou aʻoaʻoina mai i lenei tala e faatatau iā Ieova?

  Tali

• O le ā le fesootaʻiga o lenei tala ma le finagalo o Ieova?

  Tali

• O ā ni mea ou te fia fesili ai iā Samasoni pe a toetū mai?

  Tali