E TELE māfuaaga na aafia ai Naomi i le lotomomomo. Ina ua oo se oge i Isaraelu, na filifili lana tane e ō ese ma lona aiga mai i lo latou nuu i Peteleema, ae nonofo i fanua o Moapi. I se tasi aso, na maliu ai le tane a Naomi ae tuua ai na o ia ma lana fanau tama e toʻalua i se atunuu ese. Mulimuli ane, na faaipoipo lana fanau tama i ni teine Moapi o ē e lē tapuaʻi iā Ieova. I le pe ā ma le sefulu tausaga mulimuli ane, na toe fetaiaʻi ai Naomi ma se tulaga e sili ona faanoanoa. Na maliliu uma lana fanau tama, ma sa leai foʻi ni a la fanau. O lea, na mou atu ai lona faamoemoe o le a vaai i se fanau a lana fanau.

Ona ua leai se isi māfuaaga e nofo ai pea Naomi i Moapi, na ia filifili ai e toe foʻi i lona nuu o Peteleema lea e pe ā ma le vaiaso e malaga atu ai. Na filifili avā a lana fanau o Ruta ma Orepa e malaga faatasi ma ia. Peitaʻi, na faigatā iā Naomi ona talia le manatu o le a tuua e Ruta ma Orepa lo la atunuu ma o la aiga, ma atonu o le a misia ai le avanoa e toe faaipoipo ma fai ni a laʻua lava fanau. O le manatu mamafa o Naomi iā Ruta ma Orepa, na ia ʻaiʻoi atu ai ina ia toe foʻi i aiga o o la tinā. Na malie lenei tinā lototele e malaga na o ia. Sa tagi Orepa ma toe foʻi. Sa tagi foʻi Ruta, ae na nofo pea o ia i inā.

Na faapea atu Ruta iā Naomi: “Aua e te tauanau mai iā te aʻu ina ia ou tuua oe, . . . auā o le mea e te alu i ai, ou te alu foʻi i ai, o le mea e te moe ai i le pō, ou te moe ai foʻi i le pō. O lou nuu e fai ma oʻu nuu, ma o lou Atua, o loʻu Atua foʻi lea. O le mea e te oti ai, ou te oti ai, e tanu ai foʻi aʻu.” Na filifili lenei fafine talavou faamaoni ma lototele, e fai Ieova le Atua o Naomi ma ona Atua.

O lea, na ia tuua ai lona aiga, le aganuu na masani ai, ma ona atua Moapi, ae ō faatasi ma Naomi i Isaraelu. Ina ua la taunuu i Peteleema, na faateʻia nisi o fafine i le telē o le suiga o Naomi i ni nai tausaga. Na tali atu o ia ma le mafatia ua aveesea e Ieova mea uma sa iā te ia; ua mativa ma maua i le lototigā. Atonu na tigā faalogona o Ruta i faamatalaga a Naomi ona o le tele o mea na ia tuua ina ia faatasi ai ma Naomi, ae e lē o taʻua i le Tusi Paia e faapea na ita Ruta. Nai lo o lea, na amata ona galue Ruta e ao mai fua o karite i fanua na lata ane e tausia ai i laʻua ma Naomi.

Na mātauina e Poasa le galue mamafa o Ruta i fanua. O Poasa o se tagata mauʻoa e tele ona fanua, ma o le tama foʻi a Raava. Sa fesili lenei tagata  amiotonu po o ai Ruta, ma ia iloa ai le auala na tausia ai ma le faamaoni e Ruta Naomi. Na viiviia e Poasa Ruta i lona filifili e sulufaʻi atu i le puipuiga alofa a Ieova le Atua. Na ia faatonu foʻi ona tauleleʻa e aua neʻi agaleaga se tasi iā Ruta.

I le pō lenā, na matuā fiafia Naomi ina ua logotala i le agalelei o Poasa iā Ruta. Atonu na manatu Naomi o le a faaipoipo Poasa iā Ruta. O Poasa o lona tauaiga, ma na iai se faatulagaga faapitoa i le Tulafono a le Atua mo fafine talavou ua feoti a latou tane e pei o Ruta. Pe a maliu le tane a se fafine, e iai lana aiā e toe faaipoipo ai i se tauaiga vavalalata o lana tane ua maliu. O le faia faapea, atonu e na te fanaua ai se tama tama e tauave le igoa o lana tane, ma faatumau ai le gafa ma le tofi o le aiga o lana tane ua maliu. (Teu. 25:​5, 6) I se taimi mulimuli ane, na faamatala atu e Naomi iā Ruta le mea e tatau ona ia faia.

Na malie Ruta e faia e pei ona faatonu ai o ia e Naomi, e ui atonu e lē masani i lenā faatulagaga, ma o se mea e ono māsiasi ai. Na alu o ia i le pō i le mea e soli ai saito, lea e masani ona momoe ai tamāloloa i autafa o faaputuga karite sa latou seleseleina. Na alu atu lemū o ia i le mea o loo moe ai Poasa, ma susuʻe le ufiufi o ona vae ma taoto ai. Ina ua ala Poasa, na talosaga atu ma le lotomaulalo Ruta e talia o ia e fai ma ana avā, ona o Poasa o sē e toe faatauina le tofi. Atonu na iloa e lenā tamāloa agalelei le popole o Ruta. Na maofa Poasa i le lototele ma le alofa faamaoni o Ruta iā Ieova ma Naomi, ma na ia ioe seʻi alu e vaai pe e mafai ona faataunuu le mea o loo faamoemoe i ai Ruta.

I le aso na sosoo ai, na alu atu Poasa i toeaina o Peteleema ma faia mea uma e tusa ai ma le tulafono a le Atua. Na faaipoipo o ia iā Ruta. Mulimuli ane, na fanaua e Ruta se tama tama. Na alofa faapelepele Naomi i le tama a lana tama, o Opeta. Na tupuga mai le tupu o Tavita i lenā tamaitiiti, ma e faapena foʻi le Mesia i senituri mulimuli ane. (Mata. 1:​5, 6, 16) Na matuā tauia e Ieova le lototetele o Naomi ma Ruta.

Faitau le tala i le Tusi Paia:

• Ruta 1:1–4:22

Mo talanoaga:

O ā auala na faaalia ai e Naomi ma Ruta le lototetele?

1. 2. E faapefea ona tatou iloa e leʻi alu atu Ruta iā Poasa ona o ni uunaʻiga lē mamā? (ia 47 ¶17-18)

   Tali

2. 3. Aiseā e mataʻina ai le taʻua e Poasa o Ruta o lona “afafine”? (Ruta 2:8; w16.11 3)

   Tali

3. 4. I se faaeseesega ma le tagata e lē o taʻua lona igoa i le Tusi Paia, na faapefea ona faaalia e Poasa le lē manatu faapito ina ua ioe e faaipoipo iā Ruta? (w23.03 14) E

   Tali

 Manatunatu i ni Lesona

• E faapefea i le faaaʻoaʻoga a Ruta o le galue mamafa ma le lotofaafetai, ona fesoasoani iā i tatou pe a feagai ma tulaga faigatā tautupe? I

  Tali

• Na fesoasoani Ruta iā Naomi ina ua aafia Naomi i le lotomomomo. O le ā e tatou te aʻoaʻoina mai i le lotomaulalo o Naomi e talia le fesoasoani mai i isi? O le ā e tatou te aʻoaʻoina mai iā Ruta e faatatau i le faalaeiau atu i isi?

  Tali

• O ā isi auala e mafai ona e faaaʻoaʻo ai iā Naomi ma Ruta i le faaalia o le lototele?

  Tali

Manatunatu iā Ieova ma Lona Finagalo

• O le ā ua ou aʻoaʻoina mai i lenei tala e faatatau iā Ieova?

  Tali

• O le ā le fesootaʻiga o lenei tala ma le finagalo o Ieova?

  Tali

• O ā ni mea ou te fia fesili ai iā Naomi ma Ruta pe a toetutū mai?

  Tali