O LE tagata e lototele, e manaʻomia foʻi ona faaeteete. O le faaeteete e na te ʻalofia ai le mautinoa naʻuā ma mea e lamatia ai. E lē gata na lototele Kitiona, ae na faaeteete foʻi o ia. Na soifua Kitiona i le vaitaimi na toe fulitua ai le fanauga a Isaraelu iā Ieova. Sa faataga e Ieova tagata Mitiana ina ia lolofi ane i lo latou atunuu, faasauā i ona tagata, ma faaleagaina fua o o latou laueleele. Peitaʻi, e leʻi taofia ai Kitiona mai i le sasaina o saito ina ia maua ai e ona tagata ni meaʻai. Na ia gaoioi ma le faaeteete e ala i le sasaina o saito i le mea e soli ai vine, lea atonu na vaneina i se papa ina ia lilo ai mai i tagata Mitiana.

Na salamō le fanauga a Isaraelu ma alalaga atu iā Ieova mo se fesoasoani. Na ia auina mai se perofeta e faamanatu i ai le māfuaaga na Ia tuulafoaʻia ai i latou. Ona ia auina mai lea o se agelu e tofia Kitiona ina ia laveaʻiina Lona nuu. Na talosaga atu Kitiona mo se faailoga. Na faavavega ona faamumū e le agelu le afi ma susunuina ai le taulaga na saunia e Kitiona, ona mou ese lea o le agelu mai i luma o Kitiona. I lenā lava pō, na fetalai mai ai Ieova iā Kitiona ma faatonu o ia e lepeti i lalo le fata faitaulaga a lona tamā mo Paala ma se pou paia, ae faia se fata faitaulaga mo Ieova ma ofo atu se taulaga iā te Ia. Na usitaʻi Kitiona, ae na ia faia na gaoioiga i le pō ona o le fefe i lona tamā ma tagata o le aai ina neʻi iloa atu o ia e se isi.

Ona o gaoioiga lototele a Kitiona, na faapotopoto ai e tagata Mitiana se ʻautau toʻatele e ʻau faatasi ma tagata Amaleka ma tagata mai i Sasaʻe e faasagatau iā Isaraelu, ma latou ufitia ai le vanu o Isereelu, ua toʻatele e pei o sē akerise. Na oo mai iā Kitiona le agaga o Ieova, ma auina atu ai e Kitiona ni avefeʻau e faapotopoto faatasi tane mai i nisi o ituaiga o Isaraelu ina ia ō mai e latou te ʻau faatasi. Na toe gaoioi foʻi Kitiona ma le faaeteete e ala i le talosaga atu iā Ieova mo ni vavega se lua e fai ma faailoga, e faamautinoa atu ai o loo ʻau faatasi Ieova ma ia. Na talia ma le onosaʻi e Ieova le talosaga a Kitiona. I le pō lenā, na tuu ai e Kitiona le fulufulu mamoe i le mea e sasa ai saito ma na faasusū e Ieova le fulufulu mamoe i le sau, ae mātūtū le laueleele uma. I le pō na sosoo ai, na faamātūtū e Ieova na o le fulufulu mamoe ae susū le laueleele atoa i le sau.

Na faamalosia Kitiona i le tali mai a le Atua, ma ia taʻitaʻia ai lana ʻautau toʻaitiiti e 32,000 tane e agaʻi i le fili lea e pe tusa ma le 135,000 lo  latou aofaʻi. Na fetalai atu Ieova iā Kitiona ua toʻatele naʻuā lana ʻautau, a o tolauapi le ʻautau a Isaraelu i le vaipuna o Harota. Na tuu atu e Kitiona fitafita uma na fefefe ina ia toe foʻi i o latou aiga. E na o le 10,000 fitafita na totoe. Ae na toe fetalai atu Ieova o loo toʻatele pea. Ona ia faatonuina lea o Kitiona e mātau ona tagata a o latou feinu mai i le vai. O fitafita uma na punonou e feinu, na toe faafoʻi e Kitiona. Peitaʻi, o fitafita na gaoioi ma le faaeteete e ala i le inu etoeto mai i o latou lima a o vaavaai solo, na filifilia mo le taua ona o lo latou mataala. O le iʻuga, e na o le 300 tane o le ʻautau a Kitiona.

Na alu atu ma le lototele Kitiona e sauni e tau. Na toe avatu e Ieova se isi faamautinoaga iā Kitiona. Sa ia faatonuina o ia e alu atu faalilolilo i le togālauapi a le fili i le pō, ma na ia faia faapea. Na faalogo atu Kitiona o faamatala e se fitafita lana miti e faaalia ai o le a manumalo Isaraelu i le taua. O le fesoasoani a le Atua, na mautinoa atoatoa ai Kitiona ma toe foʻi i ona tagata ma faatonuina i latou e mulimuli atu iā te ia a o agaʻi e osofaʻi le fili. Ona latou ō atu lea ma siʻomia le togālauapi a le fili i le pō. Na latou ave fagu tetele, o sulu, ma pū. Ina ua avatu e Kitiona le faailoilo, ona latou ilia lea o pū ma taʻei fagu tetele, ma alalaga atu: “O le pelu a Ieova ma Kitiona!” O leo tetele o pū ma le taʻei o fagu, faapea le malamalama o sulu, na manatu ai le fili ua siʻomia ma osofaʻia i latou e se ʻautau e toʻatele. Na iʻu ina fememeaʻi ma fenuminumiaʻi ai. Sa faapogaia e Ieova le toe fetauaʻi ma le fefasiotiaʻi o i latou lava. E pe tusa ma le 15,000 ē na sao mai ai ma sosola ese.

Sa tuliloaina i latou e Kitiona. Mulimuli ane, na ia faatoʻilaloina le fili, fasiotia o latou taʻitaʻi, ma faasalaina tagata Isaraelu e leʻi lagolagoina ma le faamaoni lana itu i le taua na faatonuina e le Atua. Na taumafai tagata e tofia Kitiona e fai ma o latou tupu. Ae na teena ma le lotomaulalo e Kitiona lo latou manaʻo, ma faapea atu: “E pule lava Ieova iā te outou.” Na tauia e le Atua lenā tane lototele na gaoioi ma le faaeteete. Na olioli Kitiona i le filemu a o avea o se faamasino i Isaraelu, ma na soifua o ia seʻia oo ina toeaina lava. Na faaaofia foʻi o ia e le aposetolo o Paulo ina ua ia taʻua tane ma fafine o ē na malosi lo latou faatuatua.—Epe. 11:32.

Faitau le tala i le Tusi Paia:

• Faamasino 6:1–7:22; 8:​4-23, 28

Mo talanoaga:

O ā auala na faaalia ai e Kitiona le lototele?

 Saʻiliʻili Atili

1. 1. Aiseā atonu e talafeagai ai ona faaata e “se falaoa karite lapotopoto” le ʻautau a Kitiona na vaaia i le miti a le fitafita? (Faama. 7:13; it “Karite” ¶7)

   Tali

2. 2. Aiseā na fenuminumiaʻi ma matataʻu ai le ʻautau a Mitiana ina ua faalogo i leo o pū e 300 na iliina? (it “Pū” ¶3) A

   Tali

3. 3. O le ā na tatau ona fai e Kitiona ma lana ʻautau ina ia faatoʻilalo ai ʻautau a Mitiana? (w04 10/15 16 ¶9-10) E

   Tali

4. 4. O ā faamatalaga e faamaonia ai le saʻo aʻiaʻi o lenei tala mai i le Tusi Paia? (w05 4/15 32)

   Tali

 Manatunatu i ni Lesona

• Na taʻitaʻia e Kitiona tagata o le Atua i le taua ma na latou manumalo. Ae na faaalia pea e Kitiona le lotomaulalo ma talanoa atu i isi i se auala filemu. (Faama. 8:​1-3) E faapefea ona faaaʻoaʻo ulu o aiga ma toeaina iā Kitiona pe a lē fiafia se tasi i se latou gaoioiga na fai?

  Tali

• O ā tulaga atonu e manaʻomia ai ona tatou faaalia le lototetele ma gaoioi ma le faaeteete? I

  Tali

• E faapefea ona e faaaʻoaʻo iā Kitiona i le faaalia o le lototele i lou olaga?

  Tali

Manatunatu iā Ieova ma Lona Finagalo

• O le ā ua ou aʻoaʻoina mai i lenei tala e faatatau iā Ieova?

  Tali

• O le ā le fesootaʻiga o lenei tala ma le finagalo o Ieova?

  Tali

• O ā ni mea ou te fia fesili ai iā Kitiona pe a toetū mai?

  Tali