INA ua matua le soifua o Iakopo, na ia faamatalaina tausaga o lona olaga e faapea e “itiiti ma lutia i faafitauli.” (Kene. 47:9) Na fetaiaʻi o ia ma le tele o tulaga faigatā. I tausaga na muamua atu, na tatau ona sola ese o ia i le nuu mamao o Karana ona na manaʻo lona lava uso e fasioti o ia. A o iai i Karana, na matuā alofa Iakopo iā Rasela ae na ʻolegia o ia e Lapana le tamā o Rasela, ma avatu muamua iā te ia le uso matua o Rasela e faaipoipo i ai. O lea, e lua avā a Iakopo ma e leʻi fealofani i laʻua. Na faigaluega Iakopo mo Lapana mo le tele o tausaga, ae na taufaaʻoleʻole Lapana iā te ia i le tele o taimi. E ui i lea, e mataʻina le auala na faaalia ai e Iakopo le lototele, faatuatua, ma le tumau.

Sa fetalai atu Ieova iā Iakopo i se tasi aso ua tatau ona ō ese mai i Karana ae toe foʻi atu i lona nuu i Kanana. E leʻi faigofie lenā tulaga auā o Lapana o se tagata matapeʻapeʻa ma manaʻo tele. Na talanoa atu Iakopo i lona aiga, ona ia faapotopoto lea o i latou ma sosola ese e aunoa ma le faailoaina iā Lapana. Ina ua logotala Lapana, ona ia faapotopoto lea o ona tauaiga ma tuliloa i latou. Na ia maua atu Iakopo ma lona aiga, ma ua ʻinaʻinā atu iā Iakopo ona o le sosola ese. Na taufaamataʻu atu foʻi Lapana ma faapea atu: “E mafai ona ou faia se mea leaga iā te outou.” Ae na tali mai ma le lototele Iakopo e faasaʻo Lapana. Sa ia faapea mai na feutagaʻi Lapana ma ia i se auala lē tonu ma taufaaʻoleʻole mo le tele o tausaga. I le taimi e tasi, na naunau Iakopo e tausia le filemu. Na osia e nei tane se feagaiga o le filemu, ma ō eseese ai loa.

O le taimi lenā na agaʻi mai ai Esau le uso masaga o Iakopo e faafetaui o ia. E pe ā ma le 20 tausaga na muamua atu, na lapataʻia ai Iakopo e lo la tinā o Repeka e faapea na manaʻo Esau e fasioti o ia. Na manatu Esau na ʻolegia e Iakopo lo la tamā, ma maua ai e Iakopo le faamanuiaga na tatau ona ia mauaina. O lea, na manaʻo Iakopo e faalelei lo la vā ma lona uso. Na logotala Iakopo o loo agaʻi mai Esau ma tagata e toʻa 400 i le mea o iai ma lona aiga. Ua faapea mai le Tusi Paia: “Ua matuā fefe lava Iakopo ma ua popole.” O lea, na ia aauina atu ai ana auauna e muamua e faafeiloaʻi Esau, faatasi ma ni meaalofa mo Esau. E leʻi iloa e Iakopo po o le a teʻa ai le ita o Esau. Peitaʻi, e iai se mea mataʻina na tupu.

A o leʻi tafa mai ata, na vaaia ai e Iakopo se tagata ese. O lenā tagata ese o se agelu a Ieova, ma ua tauivi ma Iakopo. Na iloa e Iakopo e mafai  ona ia maua se faamanuiaga mai le agelu, o lea na ia tauivi ai ma le lototele ma le agelu mo le tele o itula. E leʻi faavaivai Iakopo e ui ua 97 ona tausaga ma na sili mamao atu le malosi o le agelu iā te ia. Na tauivi ma le malosi Iakopo ma na tagi foʻi o ia. (Ho. 12:4) Na iloa e Iakopo le tāua o le faamanuia a Ieova, o lea na maumauaʻi ai e finau ina ia maua lenā faamanuiaga. Ua oo i le tafa o ata, ona paʻi atu lea o le agelu i le faʻiga o le suilapalapa o Iakopo, ma see ai le faʻiga o lona suilapalapa. Na faailoa atu foʻi e le agelu se tala mataʻina iā te ia e faapea ua suia lona igoa iā Isaraelu. E tāua le uiga o lenā igoa, auā e faatatau atu i le finau ma le Atua. O le mea moni, na maumauaʻi ma finau Iakopo ina ia maua se faamanuiaga mai iā Ieova.

Na setusetu Iakopo ina ua toe foʻi i lona aiga. Na ia iloa mamao atu Esau ma ona tagata e toʻa 400 o loo agaʻi mai. Sa alu atu Iakopo na o ia e faafetaui i latou. Na ifo toʻele faafitu o ia seʻia oo ina latalata atu iā Esau. Ae na tamoʻe mai Esau e faafetaui iā te ia e aunoa ma sana auupega. Na faaloaloa mai ona lima ma fusi Iakopo, ma la fetagisi. O le tele o meaalofa a Iakopo ma lona lotomaulalo na matuā teʻa ai le ita o Esau. Atonu na maofa foʻi Esau i le lototele o Iakopo. Na maua e Iakopo le auala e tausia ai le filemu ma lona uso.

Na faaauau ona setusetu Iakopo i lona olaga atoa, ona o lona suilapalapa ua faalētonu. E tele foʻi isi tulaga faigatā na fetaiaʻi ma ia. Ae e mautinoa e leʻi salamō o ia i lana filifiliga e usiusitaʻi iā Ieova, po o le tauivi ma le agelu. Mulimuli ane, na faataunuuina se folafolaga mataʻina na faia e Ieova iā te ia, o le avea o Isaraelu ma se nuu tele. (Kene. 28:14) E lē gata i lea, e masani ona taʻua Ieova o “le Atua o Iakopo.” (Eso. 3:6) Na faaaogā e Iesu Keriso lenā faaupuga. Na ia fetalai foʻi o Ieova “o le Atua o ē e ola, ae lē o ē ua oti, auā o loo latou feola uma iā te ia.” (Luka 20:​37, 38) O lea, e mautinoa o le a maua e Iakopo se lumanaʻi matagofie. I le lalolagi fou, o le a lē mafaitaulia ona tausaga ma o le a faatumulia lona olaga i le fiafia.

Faitau le tala i le Tusi Paia:

• Kenese 27:​41-45; 31:​1-29, 36-55; 32:1–33:16

Mo talanoaga:

O ā auala na faaalia ai e Iakopo le lototele?

 Saʻiliʻili Atili

1. 1. Aiseā na maua ai e Iakopo le faamanuiaga a Ieova o le tofi o le ulumatua nai lo o Esau? (w03 10/15 29 ¶2)

   Tali

2. 2. O le ā le miti na faailoa atu e Ieova iā Iakopo, ma o le ā se faamautinoaga na ia maua mai ai? (w03 10/15 28 ¶3–29 ¶1) A

   Tali

3. 3. Aiseā na mautinoa ai Iakopo e mafai ona ia maua se faamanuiaga mai i le agelu? (w03 10/15 31 ¶1) E

   Tali

4. 4. O ā ni laasaga na faia e Iakopo e puipuia ai lona aiga mai taaʻiga a tagata Kanana? (w95 9/15 21 ¶4, fpl.)

   Tali

 Manatunatu i ni Lesona

• Sa tausia lelei e Iakopo mamoe uma a Lapana. (Kene. 31:​38-40) E faapefea i leoleo mamoe Kerisiano i aso nei ona tausi faapelepele i mamoe a Ieova, o o latou uso ma tuafāfine? I

  Tali

• Ina ua fefe Iakopo, na tatalo o ia iā Ieova. (Kene. 32:​6-12) O le ā e te aʻoaʻoina mai iā Iakopo i mea e faaaofia i au tatalo?

  Tali

• E faapefea ona e faaaʻoaʻo iā Iakopo i le faaalia o le lototele i lou olaga?

  Tali

Manatunatu iā Ieova ma Lona Finagalo

• O le ā ua ou aʻoaʻoina mai i lenei tala e faatatau iā Ieova?

  Tali

• O le ā le fesootaʻiga o lenei tala ma le finagalo o Ieova?

  Tali

• O ā ni mea ou te fia fesili ai iā Iakopo pe a toetū mai?

  Tali