NA SOLA ese Sesera mai i le fanua laugatasi o Isereelu, lea na ia tuulafoaʻia ai lana ʻautau e feoti e aunoa ma lo latou taʻitaʻi. E mautinoa na faigatā ona ia talitonu ua faatoʻilaloina e le ʻautau a Isaraelu e leʻi faaauupegaina lelei ma e leai ni kariota, ia lana ʻautau malosi e iai kariota mataʻutia e 900. E pau le mea na mafaufau i ai Sesera o le suʻe o se mea e lafi ai. O lea, na alu atu ai o ia i le faleʻie o Kaveru le tagata Keni.

Na ʻau faatasi le ituaiga o Keni ma le fanauga a Isaraelu. Na lelei la latou faiā e amata mai i le taimi o Mose, auā o le avā a Mose o se tagata Keni. Ua nonofo nei i Isaraelu na tagata sa nonofo maumausolo. Peitaʻi, na ese Kaveru mai i isi tagata Keni. E leʻi ʻau faatasi o ia ma Isaraelu, ae sa ʻau faatasi ma Iapino le tupu o Kanana. O lea na manatu ai Sesera le taʻitaʻiʻau a Iapino e mafai ona sulufaʻi atu i faleʻie o Kaveru. E leʻi tau le mafaufau o Sesera atonu e lē lagolagoina e le avā a Kaveru o Iaeli, le itu a lana tane.

E na o Iaeli sa iai i le faleʻie ae e leʻi iai lana tane. Ina ua ia iloa atu o loo agaʻi mai Sesera, sa tatau ona vave mafaufau i le mea e fai. E mautinoa na iloa e Iaeli o Sesera o le taʻitaʻiʻau a Iapino ma o ia o se tagata leaga. Atonu e na te leʻi iloa le faamatalaga a Tepora le perofeta fafine a Ieova e faatatau iā Sesera e faapea, o le a fasiotia o ia e se fafine ae lē o se tamāloa. Peitaʻi, e foliga mai na iloa e Iaeli le mea na finagalo Ieova e na te faia. E faapefea ona tatou iloa?

Na iloa e Iaeli o Sesera o se fili amioleaga o Ieova, ma ua ia maua le avanoa e faatino ai le mea na finagalo i ai Ieova. Mulimuli ane, na faagaeeina e Ieova Tepora e usuina se pese e faatatau i le manumalo o Parako iā Sesera. O nisi nei o upu o le pese: “E sili ona manuia i fafine uma o Iaeli le avā a Kaveru le tagata Keni; e sili foʻi lona manuia i fafine e nonofo i faleʻie.” O lea, o Iaeli e lē o se fafine e faufau leaga ma sauā, e pei ona taʻua e nisi o tagata faitio. Ae o ia o se toa lototele na tau mo Ieova. E pei ona faia e Raava, sa filifili foʻi Iaeli e ʻau faatasi ma Ieova e faasagatau i Ona fili. Ae o le a faapefea ona ia faataunuuina lenā mea?

Na iloa lelei e Iaeli e lē mafai ona la tauivi ma Sesera i sona malosi. O Sesera o se tagata toa tomai ma e mautinoa e matuā malosi o ia. O lea, sa valaaulia e Iaeli o ia i totonu o lona faleʻie mo se meaʻai ma mālōlō ai. Sa ia ufiufi Sesera i se palanikeke. Ina ua talosaga atu Sesera mo se vai,  na ia avatu iā te ia se suāsusu. Na ia faatonu Iaeli e tū i le faitotoʻa o le faleʻie, ma aua le faailoa atu i se tasi e fesili po o iai se tagata i le faleʻie. Ona moegase ai lea o Sesera.

Ua iloa e Iaeli ua oo i le taimi e gaoioi ai. Na tago atu o ia i meafaigaluega e foliga mai na masani ona ia faaaogā, o le samala ma se pine o le faleʻie atonu e fai mai i laau. Sa ia alu atu lemū i le mea o moe ai le taʻitaʻiʻau malosi. Na ia punou mālie ifo i lona ulu, ma sauni loa e tā. Pe afai e sasi lana tā po o sana gaoioiga i le taimi lenā, e mautinoa e ala aʻe Sesera ma fasioti o ia. Ua sasau lana tā ma tutuʻi le pine o le faleʻie i le ulu o Sesera ma ati i ona manifinifi, ona oti ai lea o ia i le mea o tū ai Iaeli.

Mulimuli ane, na agaʻi mai le faamasino o Parako e saʻili Sesera. Na alu atu Iaeli e faafetaiaʻi o ia. Na ia faapea atu iā Parako: “Sau, seʻi oʻu faasino atu iā te oe le tagata o loo e saʻilia.” Ua ulu atu Parako i le faleʻie ma vaaia ai ua faataunuu le valoaga a Tepora: “E tuuina atu e Ieova Sesera i le lima o se fafine.”

I le pese o le manumalo a Parako ma Tepora, na la viiviia ai Iaeli. E leʻi toe taʻua mulimuli ane le igoa o Iaeli i le Tusi Paia. E ui i lea, e oo mai lava i aso nei i le silia ma le 3,200 tausaga, o loo aogā pea lana faaaʻoaʻoga mataʻina. E lē tauina e auauna a le Atua i aso nei ni taua moni e faaaogā ai auupega faaletino. Ae o loo tatou tauina se taua faaleagaga. Ua sili atu ona manaʻomia i aso nei ona tatou faaalia le lototetele, e pei ona faaalia e Iaeli.

Faitau le tala i le Tusi Paia:

• Faamasino 4:​9, 11, 17-22; 5:​24-31

Mo talanoaga:

O ā auala na faaalia ai e Iaeli le lototele?

 Manatunatu i ni Lesona

• Pe afai e lē tapuaʻi iā Ieova le tane a se tuafafine, o ā taimi atonu e manaʻomia ai e le tuafafine ona lototele e pei o Iaeli?

  Tali

• O Iaeli e lē o se perofeta fafine e pei o Tepora, ma e lē o se fitafita e pei o Parako. Ae na fai e Iaeli le mea na ia gafatia. O le ā e tatou te aʻoaʻoina mai iā te ia pe afai e faatapulaa lo tatou malosi? E

  Tali

• O ā isi auala e mafai ona e faaaʻoaʻo ai iā Iaeli i le faaalia o le lototele?

  Tali

Manatunatu iā Ieova ma Lona Finagalo

• O le ā ua ou aʻoaʻoina mai i lenei tala e faatatau iā Ieova?

  Tali

• O le ā le fesootaʻiga o lenei tala ma le finagalo o Ieova?

  Tali

• O ā ni mea ou te fia fesili ai iā Iaeli pe a toetū mai?

  Tali