NA FAAILOA atu e Ieova i lana uō o Aperaamo se folafolaga mataʻina lea o le a aafia ai le lumanaʻi o tagata: “Ou te faia oe ma nuu tele.” Na faaali atu foʻi e le Atua iā Aperaamo le laueleele matagofie o le a nofoia e lenā nuu. (Kene. 12:2; 13:​14, 15) Peitaʻi, na maumauaʻi Satani e faaumatia lenā nuu e ui e leʻi faavaeina i lenā taimi. Na iloa lelei e le Tiapolo o lenei nuu o le a tupuga mai ai le “fanau” na valoia, lea o le a faamutaina le pulega amioleaga a Satani ma faaumatia o ia.—Kene. 3:15.

Na taulaʻi atu osofaʻiga a Satani iā Aperaamo ma lona aiga. O se tasi o i latou na matuā mafatia i osofaʻiga a Satani, o Lota le atalii o le uso o Aperaamo. Na tuu atu ma le agalelei e Aperaamo le avanoa e filifili muamua ai Lota po o fea o le Nuu Folafolaina e fia nofo ai, ma na filifilia e Lota le laueleele e sili ona lafulemu ma lauusiusi. O lenā laueleele na latalata i le aai o Sotoma lea na iai tagata e “faia . . . agasala matuiā iā Ieova.” (Kene. 13:​8-13) Na iai le tupu o Sotoma i se ʻau faatasiga o tupu e toʻalima o Kanana, ma ua latou fiu i le totogiina o lafoga i le tupu o Elama. O lea, na latou fouvale ai. Na tali atu le tupu o Elama i lona taʻitaʻia o se ʻau faatasiga o tupu e toʻafā mai i vaipanoa mamao; na latou gasolo mai i le itu i mātū ma faatoʻilalo tupu o Kanana. Na toe foʻi ē na manumalo ma ave le tele o le vete ma pagota o le taua. Na aofia ai Lota ma lona aiga i ē na ave faapagota.

O le ā nei o le a fai e Aperaamo? Sa ono mafaufau Aperaamo e tuuaʻia lava Lota ona o le sesē o ana filifiliga. Na ono popole foʻi Aperaamo pe afai e alu e laveaʻi Lota, o lona uiga o le a siitaua atu i na tupu, ma o se tasi o i latou e pulea le atunuu o Senara. O Aperaamo o se leoleo mamoe e maumausolo i faleʻie, ae e lē o se tagata tau. E mafai faapefea ona ia faatoʻilalo ʻautau a ni tupu malolosi e toʻafā o ē na ʻau faatasi? E lē gata i lea, o Aperaamo e sau mai i le aai o Uro e iai i Senara. Pe ana faapea o se isi tagata, semanū e popole ina neʻi lē mafai ona toe foʻi i le olaga sologa lelei i Uro pe afai e siitaua atu. Ae e leʻi mafaufau faapena Aperaamo. Na ia iloa le mea na finagalo Ieova e na te faia.

I le taimi lenā, atonu ua sili atu ma le toʻa 1,000 le ʻaumalaga a Aperaamo. Na ia faapotopoto ona tagata ua masani e tau, o auauna tane e toʻa 318, ma latou sauni loa e tau. Na latou ō ma nisi na latou ʻau faatasi e tuliloa ʻautau a le fili. Ua latou taunuu i le itu i mātū i le vaipanoa o Tanu,  ma maua atu ai i latou. Sa vaevae e Aperaamo ana ʻau i ni vaega ma latou osofaʻia fili i le pō. E ui e toʻalāiti ē na ʻau ma Aperaamo, ae na latou faatoʻilalo ʻautau a le fili ma sosola ese ai. A o sosola atu tupu e toʻafā ma a latou ʻautau e agaʻi i le itu i mātū, na tuliloa pea i latou e Aperaamo. Na ia faatoʻilaloina i latou e latalata i Tamaseko ma toe faafoʻi mai oloa ma tagata na latou avea mai i Kanana. O lea, ua faasaʻoloto Lota ma lona aiga.

O ā ni faalogona o Ieova i le lototele ma le faatuatua na faaalia e Aperaamo? Na iloa le tali ina ua agaʻi atu Aperaamo e lata i le aai o Salema. O le tupu o lenā aai o Mekisateko, o ia foʻi o se ositaulaga a Ieova. Na sau le tupu i fafo o le aai e faafeiloaʻi Aperaamo, ma faaoo mai i ai le faamanuiaga a Ieova. Sa foaʻi atu ma le lotomaulalo e Aperaamo iā Mekisateko le sefuluaʻi o mea e aupito sili ona lelei mai i mea na faoa.

Ioe, o lenā taua o le taua a le Atua ae e lē o se taua a tagata. O loo taʻua i le Tusi Paia “le tusi o Taua a Ieova.” (Nu. 21:14) O le taua na tauina e Aperaamo, atonu o le taua muamua lenā o loo faamauina i lenā tusi. I senituri mulimuli ane, ina ua tau ē na tupuga mai iā Aperaamo ma tagata amioleaga o Kanana na ʻainā le Nuu Folafolaina, na foaʻi atu e Ieova i ona tagata faamaoni le manumalo i lea taua ma lea taua.

Peitaʻi, e leʻi toe maua e tagata o le Atua lana puipuiga ina ua latou fulitua iā te ia. Na iʻu ina tuulafoaʻia i latou e Ieova ina ua latou teena lona Alo, o le Mesia. Na amata mai i inā ona faamanuia e Ieova se nuu faaleagaga e taʻitaʻia e Keriso, e sui aʻi le nuu o Isaraelu. E leʻi faataga e Iesu ona soo e auai i taua faaletino. (Mata. 26:52) Nai lo o lea, na ia aʻoaʻoina i latou ina ia tau i se taua faaleagaga. Sa ia faataatia le faaaʻoaʻoga e faaalia ai e tatou te manaʻomia le lototele e tau ai i le taua faaleagaga, e pei ona manaʻomia le lototele e tau ai i taua faaletino.

Faitau le tala i le Tusi Paia:

• Kenese 14:​1-24

• Eperu 7:​1-4

Mo talanoaga:

E pei ona tatou aʻoaʻoina i lenei mataupu, o ā auala na faaalia ai e Aperaamo le lototele?

 Saʻiliʻili Atili

1. 1. O ā faamaoniga mai toega o mea na eli mai i le palapala e iloa ai le moni o lenei tala? (w89-E 7/1 5 ¶4–6 ¶1-wcgr)

   Tali

2. 2. O ā faamaoniga e lagolagoina ai le faamatalaga a le Tusi Paia e faatatau i le nofoaga atonu na iai Sotoma ma Komoro? (it “Sami Oona” ¶6) A

   Tali

   BestTravelPhotography/iStock via Getty Images Plus

3. 3. O Mekisateko o le tupu ma le ositaulaga o Salema. O fea na tū ai Salema? (it “Salema”)

   Tali

4. 4. O ā auala na faaata mai ai e Mekisateko Iesu? (it “Le Ositaulaga Sili” ¶27-28) E

   Tali

 Manatunatu i ni Lesona

• Na faataga e Aperaamo Lota e na te filifilia le laueleele e sili ona lelei. E faapefea ona tatou faaaʻoaʻo iā Aperaamo i a tatou feutagaʻiga ma o tatou aiga, uso talitonu, ma isi? I

  Tali

• O le ā e tatou te aʻoaʻoina mai i le nofosauni o Aperaamo e laveaʻi le atalii o lona uso?

  Tali

• E faapefea ona e faaaʻoaʻo i le lototele o Aperaamo e pei ona faaalia i lenei mataupu?

  Tali

Manatunatu iā Ieova ma Lona Finagalo

• O le ā ua ou aʻoaʻoina mai i lenei tala e faatatau iā Ieova?

  Tali

• O le ā le fesootaʻiga o lenei tala ma le finagalo o Ieova?

  Tali

• O ā ni mea ou te fia fesili ai iā Aperaamo pe a toetū mai?

  Tali