O LOO fesolasolataʻi Tavita. I le taimi muamua, na matuā alofa Saulo iā Tavita o lē na aveina ana meatau, ma o lana taʻitaʻiʻau maufaatuatuaina. Ae o lenei ua saʻili Saulo e fasioti o ia. Na folafola atu e le Atua o le a fai Tavita ma tupu, peitaʻi o loo lafilafi solo Tavita i le toafa ina ia puipuia lona ola ma ola o ona tagata e toʻa 600.

Ua avea nei Saulo o se tupu matuā leaga. O lona lotoleaga iā Tavita, na matuā ita ai ma taumafai e fasioti o ia i le tele o taimi. Na faasaoina e Tavita le ola o le tupu i se tasi aso, a o lea e tulituliloa pea o ia e Saulo e fasioti. Sa alu atu Tavita e lafi i le toafa e lata i le aai o Sifi, ma na taʻu e tagata o le aai iā Saulo le mea o loo lafi ai o ia. O le taimi lona lua lea ua latou lē faamaoni ai iā Tavita. O lea, ua agaʻi atu Saulo ma lana ʻautau e tuliloa o ia.

O le ā o le a faia e Tavita? Na ia aauina muamua atu ni tagata e vaai po o sau moni Saulo i le toafa. E leʻi atuatuvale Tavita e ui lava e toʻa 3,000 le ʻautau a Saulo. O le mea moni, o le taimi lenā na tusi ai Tavita: “Faauta! o le Atua o loʻu fesoasoani lea; o loo faatasi foʻi Ieova ma ē o loo lagolagoina aʻu.” (Sala. 54:4; tagaʻi foʻi i le ulutala) Na filifili Tavita e alu i le mea na tolauapi ai Saulo i le pō. Na ia fesili po o ai e la te ō faatasi.

Na ofo atu Apisai e la te ō. O Apisai o le tama a le tuafafine o Tavita, ma o se tagata tau e lē fefe, ae e iai taimi e lē alofa mutimutivale ai i isi. Sa ō atu lemū Tavita ma Apisai i le mea o tolauapi ai Saulo ma maua atu o loo momoe i latou uma. Na faapogaia e Ieova i latou uma e momoegase. E oo foʻi i le tupu o Saulo o loo moegase o ia, e leai se isi o leoleoina, ma o loo sunuʻi lana tao i le eleele i tafatafa o lona ulu.

O le ā o le a faia e Tavita? Ua faigofie nei ona fasiotia Saulo. O le faia faapea, o le a saʻoloto ai Tavita mai i le tulituliloaina e Saulo ma avea loa o ia ma tupu. Ua lē malamalama Apisai pe aiseā ua faatalatū ai Tavita e fasioti Saulo. Na ia musumusu atu: “Ua tuuina mai e le Atua i le asō lou fili i lou lima. Faamolemole, tuu mai iā te aʻu seʻi oʻu tutuʻi iā te ia i le tao i le eleele, e na o le faatasi lava, ou te lē tutuʻi faalua iā te ia.”

Na manatua lelei e Tavita le taimi muamua na ia maua ai le avanoa e fasiotia ai Saulo. A o iai i le toafa o Enokati, na alu atu Saulo i le ana sa ia lafi ai. Na faigofie ona fasiotia e Tavita lona fili auā e leʻi iloa o ia e  Saulo. Peitaʻi, e na te leʻi faia faapea. Nai lo o lea, na ia sesele ese le pito o le ofu tele o Saulo. Sa ōia le lotofuatiaifo o Tavita i lana gaoioiga na fai. Na leaga ona faalogona ona o lona lē faaaloalo i le tupu na faauuina e Ieova.

Atonu na faigofie ona lolo Tavita i le mea na manaʻo i ai Apisai. I le pei o Tavita, o loo fesolasolataʻi foʻi Apisai. E mautinoa na mananaʻo tagata na ʻau ma Tavita e faamuta le tuliloaina o i latou e Saulo. E ui i lea, e leʻi manaʻo Tavita e tauimasui. Na ia faasaʻo le manatu o lona soātau o lē na naunau e fasioti Saulo, ma fai i ai e onosaʻi. Sa faamautinoa atu e Tavita iā Apisai: “E fasia lava [Saulo] e Ieova, pe oo mai le aso e oti ai o ia, pe e alu atu foʻi i se taua ma oti ai.” Na toe faapea atu Tavita: “Ae ia mamao mai i le silafaga a Ieova, ona faaoo atu loʻu lima i lē ua faauuina a Ieova!”

Na iloa e Tavita o le a tauia e Ieova amioga leaga a Saulo i le taimi tatau. Na tusi Tavita e faatatau iā Ieova i le salamo na taʻua muamua: “E na te toe taui atu i oʻu fili a latou lava mea leaga.” (Sala. 54:5) O lea, na ō ese Tavita ma Apisai mai i le mea na tolauapi ai Saulo ma ō aʻe i le tumutumu o se mauga. Ua valaau atu Tavita iā Saulo ma ana fitafita. Na ia faaseā atu i na fitafita i le lē puipuia o lo latou tupu. Na ia faaseā atu foʻi iā Saulo ona o le faamaʻimau o lona taimi e tulituliloa ai o ia, ae ua na o ia o “se ʻutu fiti” e na te lē faia se mea e afāina ai le tupu. Ona tali mai lea o Saulo ma le māsiasi: “Ua ou gaoioi ma le valea, ua ou matuā sesē lava.”

Pe na suia ai e Saulo ona ala? Atonu na iloa lelei e Tavita e lē suia lava ala o Saulo. Peitaʻi, e leʻi salamō Tavita i lana filifiliga e mulimuli ma le lototele i lona lotofuatiaifo mai i le Atua. Mulimuli ane, o le lototele ma le faamaoni o Tavita na faamanuiaina ai o ia e Ieova i auala e na te leʻi faatalitalia.

Faitau le tala i le Tusi Paia:

• 1 Samuelu 16:21; 18:​5-14; 23:19; 24:​3-7; 26:​1-25

Mo talanoaga:

E pei ona tatou aʻoaʻoina i lenei mataupu, o ā auala na faaalia ai e Tavita le lototele?

 Saʻiliʻili Atili

1. 1. E ui e iai taimi e leʻi alofa mutimutivale ai Apisai ma vavevave e fai se gaoioiga, ae na faapefea ona ia lototele e puipuia tagata o Ieova ma lagolagoina Tavita? (it “Apisai” ¶3-5)

   Tali

2. 2. Aiseā na faatusaina ai e Tavita o ia “i le manulele o le koli i luga o mauga”? (1 Samu. 26:20; it “Manulele o le Koli” ¶4) A

   Tali

   Ekaterina Kolomeets/stock.adobe.com

3. 3. Aiseā na manaʻomia ai ona onosaʻi Tavita? (w17.08 6 ¶14-15)

   Tali

4. 4. Na faapefea ona faaauau ona faaalia e Tavita le faamaulalo i le tele o tausaga mulimuli ane? (w21.09 10 ¶8) E

   Tali

 Manatunatu i ni Lesona

• E ui lava e tele mea sesē na faia e Saulo, ae na faaaloalo Tavita i lana pule. E faapefea ona tatou faaaʻoaʻo iā Tavita i le auala e tatou te vāai ai . . .

  • i o tatou mātua? I

    Tali

  • i tagata maualuluga o le malo? O

    Tali

  • i toeaina o le faapotopotoga? U

    Tali

• Na mulimuli ma le lototele Tavita i lona lotofuatiaifo mai i le Atua. O ā tulaga e ono manaʻomia ai ona tatou lototetele e mulimuli i o tatou lotofuatiaifo?

  Tali

• E faapefea ona e faaaʻoaʻo i le lototele o Tavita e pei ona faaalia i lenei mataupu?

  Tali

Manatunatu iā Ieova ma Lona Finagalo

• O le ā ua ou aʻoaʻoina mai i lenei tala e faatatau iā Ieova?

  Tali

• O le ā le fesootaʻiga o lenei tala ma le finagalo o Ieova?

  Tali

• O ā ni mea ou te fia fesili ai iā Tavita pe a toetū mai?

  Tali