ATONU na tomānatu le fafine, “Po o iloa mai e se tasi loʻu tulaga faigatā? Po o manatu alofa mai se isi iā te aʻu?” Ua oti le tane a lenei fafine, ma e iai lana tama laʻitiiti. I taimi o Isaraelu, na iai tulafono a le Atua e puipuia ai fafine ua oti a latou tane ma fanau ua leai ni tamā. Sa avea na tulafono o se faamāfanafanaga i nei fafine. Peitaʻi, o lenei fafine e lē o se Isaraelu. Sa nofo o ia i Sarefata, o se aai o Saitonu. E foliga mai na avea Etepaala le tupu o Saitonu o se ositaulaga mo le atua fafine o Asaira. Sa faaauiluma e le tapuaʻiga iā Asaira amioga matagā uma. Pe na faamoemoe lenei fafine mativa ua oti lana tane o le a alofa mutimutivale atu se tasi iā te ia, ae o loo sasao faiga sauā i le atunuu ma pagatia tagata i le lāmala ma le oge?

Na ia aoaoina mai ni nai meaʻai na mafai ona maua ina ia ola ai ma lana tama. E ui i lea, o loo faasolo ina leaga le tulaga o mea, ma e ono iʻu ai ina fano o la ola.

Ae e iai se mea na mataʻina ai lenei fafine ua oti lana tane. E pe ā ma le 1,000 tausaga mulimuli ane, na fetalai Iesu Keriso na silasila Ieova e ese lenei fafine mai i tagata lē faatuatua o Isaraelu. E foliga mai na iloa e le fafine Ieova, le Atua o Isaraelu. Atonu na pāʻia le loto o le fafine i le auala na feutagaʻi ai Ieova ma lona nuu. Sa talitonu o ia iā Ieova. Ae o le ā o le a faia e Ieova mo lenei fafine o loo nofo i se atunuu ese e tapuaʻi i atua faapaupau? Na foaʻi atu e Ieova se meaalofa tāua mo ia.

Na faatonu e Ieova lana perofeta o Elia e alu atu i le itu i mātū e saʻili le fafine ma nofo i lona fale i le taimi o le lāmala. Ina ua taunuu le perofeta i Sarefata, na ia iloa atu se fafine o fai fafie. Na ia talosaga atu ma le agalelei iā te ia: “Faamolemole, inā aumai ia sina ipu vai seʻi oʻu inu ai.” E ui e leʻi vaai muamua le fafine iā Elia, ae ua faapea mai le Tusi Paia: “Ua alu o ia e aumai se ipu vai.” Atonu o lona leo mālū, po o upu agalelei, po o ona ofu o se perofeta, na iloa ai e le fafine o lenei tagata o se auauna a Ieova. Atonu na mafaufau Elia po o le fafine lenei na auina atu o ia e Ieova e saʻili. O lea, na ia toe talosaga atu ai mo se fasi falaoa.

Na faapea mai ma le faamaoni le fafine: “Ou te tautō iā Ieova le Atua soifua,” e faaalia ai lona faatuatua i le Atua moni, o “le Atua soifua.” (Iere. 10:10) Na fai mai o ia iā Elia e leai sana falaoa, ua na o se luuga o falaoamata o loo i le fagu lapoʻa, ma sina suāuu o loo i le fagu laʻitiiti. O  lea na sau e fai fafie e sauni ai le la meaʻai mulimuli ma lana tama. Ona faapea mai lea o le fafine: “Pe a uma ona ma aai, ona ma feoti ai lea.”

E lē taumatea na faateʻia o ia i le tali atu a Elia: “Aua e te fefe.” E faapefea ona lē fefe lenei tinā i le vaai atu i lana tama o le a oti, ona o le matelāina i le fia ʻai? E ui i lea, na ia faalogo atu pea. Ona faailoa atu lea e Elia o se folafolaga mai iā Ieova. O le a tauia o ia e Ieova pe a ia faia muamua se tamaʻi falaoa mo le perofeta. O le a faamautinoa e Ieova e lē uma le falaoamata i le fagu lapoʻa ma le suāuu i le fagu laʻitiiti ina ia tausi ai o ia, seʻia oo ina uma le lāmala.

O lenei tulaga na tofotofoina ai le faatuatua o le fafine. Po o le a ia avatu le meaʻai o loo totoe iā te ia e fafaga ai le perofeta a Ieova? Atonu na ia iloa e sili atu ona ofoofogia vavega na faia e Ieova mo ona tagata, pe a faatusatusa i le saunia o meaʻai mo se fafine ua oti lana tane ma lana tama. Po o le a ia maua le lototele e usitaʻi ai? Ua faapea mai le Tusi Paia: “Ona alu lea o ia ma faia e tusa ma upu a Elia.”

Sa matuā tauia e Ieova lenei fafine. Na faia e Ieova le vavega ina ia lē uma le falaoamata ma le suāuu i fagu e tausi ai Elia ma le aiga o le fafine, seʻia oo ina uma le lāmala. Ae e iai se mea e sili atu ona ofoofogia na faia e Ieova mo ia. I se tasi aso, na faafuaseʻi ona maʻi lana tama ma oti ai. Na faaaogā e Ieova Elia ina ia faatūina le tama mai le oti. O le tagata muamua lenā na toetū mai o loo faamauina i le Tusi Paia. O lenā vavega e mautinoa na faalototeleina ai le fafine ua oti lana tane. Talu mai lenā taimi, ua avea lana faaaʻoaʻoga ma faalaeiauga i le faitau miliona o tagata, ina ia latou faaalia ai foʻi le lototetele.

Faitau le tala i le Tusi Paia:

• 1 Tupu 17:​8-24

• Luka 4:​25, 26

Mo talanoaga:

O ā auala na faaalia ai e le fafine Sarefata ua oti lana tane le lototele?

 Saʻiliʻili Atili

1. 1. Ia faamatala le tapuaʻiga a Saitonu, o le aai autū a Foinie. Na faapefea ona aafia tagata Isaraelu i lenā tapuaʻiga? (it “Saitonu” ¶6) A

   Tali

   Penta Springs Limited/Alamy Stock Photo

2. 2. O le ā le faiā a Etepaala ma Aapo le tupu o Isaraelu? (it “Etepaala”)

   Tali

3. 3. Na tapuaʻi tagata Foinie i le atua fafine o Asaira (Aseta). O ā nisi o tū ma aga a lenā tapuaʻiga o loo faaauau ona faia e tagata i aso nei? (g93 11/22 13 ¶1-4-wcgr)

   Tali

4. 4. Ina ua oti le tama a le fafine ua oti lana tane, aiseā atonu na fesili atu ai le fafine iā Elia: “Po ua e sau ea e faamanatu mai aʻu mea sesē, ma faaoo le oti i laʻu tama?” (1 Tu. 17:18; w14 2/15 15 ¶4-5) E

   Tali

 Manatunatu i ni Lesona

• Na mātauina e Ieova le fafine ua oti lana tane, e ui na nofo le fafine i se aai e tapuaʻi iā Paala. O le ā se mea e te aʻoaʻoina mai ai e faatatau iā Ieova, ma la tatou vaaiga e tatau ona iai i tagata o la tatou oganuu? (Galu. 10:35)

  Tali

• Pe a lē lava le faasoa a se Kerisiano, o le ā e na te aʻoaʻoina mai i le faatuatua ma le lototele o le fafine Sarefata ua oti lana tane? I

  Tali

• O ā isi auala e mafai ona e faaaʻoaʻo ai i le fafine Sarefata ua oti lana tane i le faaalia o le lototele?

  Tali

Manatunatu iā Ieova ma Lona Finagalo

• O le ā ua ou aʻoaʻoina mai i lenei tala e faatatau iā Ieova?

  Tali

• O le ā le fesootaʻiga o lenei tala ma le finagalo o Ieova?

  Tali

• O ā ni mea ou te fia fesili ai i le fafine Sarefata pe a toetū mai?

  Tali