E MAUTINOA na faateʻia le tupu o Asa ina ua vaai atu i le ʻautau e sili ona toʻatele a Aitiope na tolauapi i Iuta, ma ua latou sauni e siitaua mai. E tele taimi na auina atu ai e Ieova ona tagata e tau, ae o le taimi muamua lea ua latou fetaiaʻi ai ma se fili e sili ona toʻatele. O lenei ʻautau malosi e tasi le miliona, ua toeitiiti faaluaina le aofaʻi o le ʻautau a Asa. O le ā o le a fesoasoani iā Asa ina ia lototele ai e faafetaiaʻia lenā luʻi?

O le mea moni, ua leva ona sauni Asa mo tulaga faigatā. Ina ua amata ona pule o ia i Iuta i le sefulu tausaga na muamua atu, na mulimuli Asa i le faaaʻoaʻoga a lona augātamā o le tupu o Tavita. Na saʻili Asa e faafiafia le finagalo o Ieova lona Atua. Na ia faalogo ma le lotomaulalo i perofeta a Ieova o Oteta ma lona atalii o Asaraia. Sa lototele foʻi lenā tupu talavou e toe faaleleia nisi o mea leaga na faia e tagata, lea na amata mai i le taimi na fulitua ai le tupu o Solomona iā Ieova. Na tauivi ma le lototele Asa e tafiesea faiga matagā, e pei o faiga faatalitane a tamāloloa i le malumalu ma le tapuaʻi i atua sesē.

Sa taulima foʻi e Asa agasala a lona aiga. Na faaaloalogia e tagata Maaka le tinā o lona tinā, ona sa avea o ia ma masiofo i Iuta. Na faatūina e Maaka se tupua inosia ina ia faaauiluma ai tapuaʻiga matagā tau feusuaʻiga. Peitaʻi, e leʻi taaʻina Asa i ona sootaga faaleaiga. Na ia aveesea le tinā o lona tinā mai i lona tulaga maualuga, ma susunu le tupua. Talu ai na faafiafiaina e Asa le finagalo o Ieova, na faamanuia e le Atua le atunuu ma latou maua ai le filemu mo tausaga e sefulu. Ae o le ā na faia e Ieova mo Asa ina ua osofaʻia e ʻautau a Aitiope le nuu o Iuta?

Ina ua vaavaai ifo Asa i fanua maulalo o Iuta ma iloa atu le ʻautau e sili ona toʻatele a Aitiope, o le mea muamua lava na ia faia o le tatalo i le Atua. Seʻi manatu i faalogona o ona fitafita a o tatalo Asa e faapea: “Ieova e, e leai se mea e faigatā iā te oe, e tusa pe e toʻatele pe e leai se malosi o ē o loo e fesoasoani mai i ai. Ieova e, lo matou Atua, ia e fesoasoani mai iā i matou, auā e matou te faalagolago atu iā te oe, o lou suafa foʻi ua matou ō mai ai e tau ma lenei motu o tagata. Ieova e, o oe o lo matou Atua. Aua neʻi manumalo tagata faatauvaa iā te oe.” E mautinoa na fiafia Ieova i le tatalo faamaoni a Asa. Na silafia e Ieova sa pei Asa o Ionatana le atalii o le tupu o Saulo, ona sa malamalama uma nei tane e lē tāua iā Ieova le aofaʻi o se ʻautau. (1 Samu. 14:6) Ioe, o le itu e lagolagoina e le Pule Silisili Ese i le  aoao o mea, o le itu lenā e mautinoa e manumalo i le taua!

Sa taʻitaʻia e Asa ona fitafita i le taua. O le ā na iʻu i ai? Ua faapea mai le Tusi Paia e faatatau i le ʻautau a Aitiope: “Ua faaumatia i latou e Ieova ma lana ʻautau.” E leai se tasi o na fitafita na sao mai ai.

Na faaauau ona faaauiluma e Asa le tapuaʻiga mamā. O le toʻatele o tagata i le malo o ituaiga e sefulu o Isaraelu i le itu i mātū, na latou siitia i le itu i saute i Iuta ina ia toe foʻi i le tapuaʻiga mamā na faia i le malumalu i Ierusalema. Sa faapotopoto e Asa le nuu atoa i Iuta, ma latou faia se tautoga e tapuaʻi ma le faamaoni iā Ieova.

Peitaʻi, o le tala iā Asa e aofia ai foʻi ma ni mea sesē matuiā na ia faia. Ina ua faamataʻu ane le tupu o Isaraelu o le a siitaua iā Iuta, e leʻi talosaga atu Asa iā Ieova mo se fesoasoani. Nai lo o lea, na ia totogi le tupu o Suria e osofaʻi Isaraelu. Ae ina ua auina mai e Ieova le perofeta o Hanani, o se tagata e iloa faaaliga, ina ia faasaʻo le tupu o Asa, na ita o ia ma lafo le perofeta i le falepuipui. Sa maʻi tigāina Asa ina ua matua lona soifua, ma na ia saʻili atu i ē e faia faamālōlōga nai lo o le saʻili atu mo le fesoasoani a Ieova. E foliga mai e leʻi faaauau ona malosi le faatuatua o Asa e pei o le taimi muamua.

Peitaʻi, e matuā onosaʻi Ieova lo tatou Tamā. O le faamatalaga lenei a le Tusi Paia e taaofaʻi ai le pulega a Asa mo le 41 tausaga: “E ui i lea, na atoatoa le loto o Asa iā Ieova i lona olaga atoa.” O le tala a le Tusi Paia i le olaga o lenei tane iloga, e faamanatu mai ai iā i tatou e alofa Ieova i ē e alolofa iā te Ia. Ae ua faaalia ai foʻi e lē tatau ona tatou faagaloina mea ua faia e Ieova mo i tatou. O le a faamalosia lo tatou lototetele, pe a tatou mātauina mea lelei uma e faia e Ieova mo i tatou mai i lea tausaga i lea tausaga.

Faitau le tala i le Tusi Paia:

• 1 Tupu 15:​8-24

• 2 Nofoaiga a Tupu 14:1–16:14

Mo talanoaga:

O ā auala na faaalia ai e Asa le lototele?

1. 2. E foliga mai o ai le atalii o Hanani le tagata e iloa faaaliga, ma na faapefea ona ia faaaʻoaʻo i le lototele o lona tamā? (2 No. 19:2; it “Hanani” Nu. 2)

   Tali

2. 3. E ui na ia faia ni mea sesē, ae o le ā na faia e Asa e faaalia ai ʻna atoatoa lona loto iā Ieova?’ (1 Tu. 15:14; w17.03 19 ¶5-6)

   Tali

3. 4. Pe na aveesea e Asa “mea maualuluga” uma? (2 No. 14:​2-5; 15:17; w05 12/1 20 ¶3)

   Tali

 Manatunatu i ni Lesona

• O faalaeiauga a le perofeta o Asaraia na uunaʻia ai Asa e toe faafoʻisia le tapuaʻiga mamā. O ā ni aafiaga lelei o au upu faalaeiau i isi? E

  Tali

• Na faalagolago Asa iā Ieova e faatoʻilalo se ʻautau toʻatele, ae mulimuli ane na ia faalagolago i tagata e faatoʻilalo se ʻautau toʻaitiiti. O le ā e tatou te aʻoaʻoina mai ai e faatatau i le faalagolago iā Ieova i o tatou ala uma? (Faata. 3:​5, 6)

  Tali

• E faapefea ona e faaaʻoaʻo iā Asa i le faaalia o le lototele i lou olaga?

  Tali

Manatunatu iā Ieova ma Lona Finagalo

• O le ā ua ou aʻoaʻoina mai i lenei tala e faatatau iā Ieova?

  Tali

• O le ā le fesootaʻiga o lenei tala ma le finagalo o Ieova?

  Tali

• O ā ni mea ou te fia fesili ai iā Asa pe a toetū mai?

  Tali