E TELĒ le faafitauli o loo feagai ma Apikaila ona o ni tamāloloa se toʻalua ua feita. O le tasi tamāloa o lana tane o Napalu, o se tagata e ʻinaʻinā, sauā, ma valea. A o le isi tamāloa o Tavita, o se tagata lelei e auauna faamaoni iā Ieova, ma o lē o le a fai ma tupu o Isaraelu. Peitaʻi, na faatupu e Napalu le toʻatamaʻi o Tavita, ma ua matuā lamatia ai ola o le aiga o Apikaila. O Apikaila o se fafine e lalelei ma atamai. Ae na manaʻomia ona ia lototele ina ia puipuia lona aiga.

Na logotala Apikaila i le faafitauli ina ua faailoa i ai e se auauna. Na ia faapea atu iā Apikaila o loo agaʻi mai Tavita ma ona tagata ua faaauupegaina e toʻa 400, e siitaua mai iā Napalu “ma lona aiga uma.” Aiseā? Na talosaga Tavita iā Napalu mo ni meaʻai, ma e leʻi faapea na tagisā Tavita. Sa pei Tavita ma ona tagata o se pā na siʻosiʻomia ai le tagata mauʻoa o Napalu, o ana leoleo mamoe, ma le tele o ana lafu manu. Na puipuia ma le faamaoni e Tavita Isaraelu ma ona tagata mai i osofaʻiga a fili ma le ʻaufaomea, e ui o loo fesolasolataʻi ma sauāina Tavita e le tupu o Saulo e aunoa ma se māfuaaga. Na aauina atu e Tavita ni tagata iā Napalu e talosaga i ai ma le faautauta mo ni meaʻai, ae na tali mai ma le ʻinaʻinā Napalu ma taʻua Tavita o sē ua sola ese mai i lona matai.

Na iloa e le auauna a Napalu, e leai se aogā e faailoa ai fua i lona matai le mea o loo tupu. Na fai atu saʻo le auauna iā Apikaila: “O [Napalu] o le tagata e lē aogā, e maʻimau le taimi e talanoa atu i ai.” Sa mautinoa e le auauna o le a faalogo Apikaila ma gaoioi ma le atamai. O le ā nei o le a faia e Apikaila?

E leʻi popolevale o ia. Ae sa tatau ona vave gaoioi. Sa ia saunia le tele o meaʻai e fai ma meaalofa mo Tavita ma ona tagata, ma faaee i luga o asini ma aauina atu auauna e muamua atu iā te ia faatasi ma meaalofa. Na tiʻetiʻe foʻi o ia i le asini ma mulimuli atu iā i latou. Peitaʻi, e na te leʻi taʻuina atu se mea iā Napalu. Atonu na iloa e Apikaila o le a taumafai Napalu e vavao o ia mai i le faia o le mea saʻo.

A o tiʻetiʻe Apikaila i le asini ma alu ifo faalilolilo i le mauga, na latou fetaiaʻi ma Tavita ma ona tagata. Ua alu ifo faatopetope o ia mai i le asini ma savali atu i le taʻitaʻiʻau ua lotoa. Ua faapaʻū faō i le eleele i luma o Tavita, ma ʻaiʻoi e tuu atu se avanoa e tautala ai. O lona lotomaulalo na faatoʻafilemu ai Tavita.

 Na faatoese atu Apikaila ona o le faafitauli ua tupu ma faapea atu ua talafeagai le ita o Tavita i lana tane, o le tagata lē aogā ma valea. Na iloa e Apikaila e malosi le faatuatua o Tavita iā Ieova le Atua. Sa ia faamanatu atu e lē finagalo Ieova e nofosala Tavita i le toto ma salamō ona o le fasiotia o tagata e lē sala. Na faapea atili atu Apikaila o le a faatumauina e Ieova le aiga o Tavita ma fai o ia ma tupu, ae faatoʻilalo fili o Tavita. E manino mai na iloa e Apikaila ua uma ona faauuina e Ieova Tavita e fai ma tupu e sosoo ai o Isaraelu.

O upu agalelei ma atamai a Apikaila na toʻafilemu ai le ita o Tavita. Na faapea atu Tavita: “Ia viia Ieova le Atua o Isaraelu, o lē na auina mai oe i le aso nei e faafetaiaʻi iā te aʻu!” Na ia faamanuia atu iā Apikaila mo lona mafaufau lelei, ma talia ma le lotomaulalo lana fautuaga atamai. Na ia faapea atu: “Vaai, ua ou faalogo atu i au upu, ma o le a ou faia e tusa ma lau talosaga.”

E leai ma se tasi o nei mea na iloa e Napalu. Sa faia e Napalu se faigaʻai i lenā pō ma ua “matuā onā” o ia. Na faatali Apikaila seʻia oo i le taeao ma ua teʻa le onā o Napalu, ona faamatala atu lea o mea uma iā te ia. E lē taumatea e leʻi suia lava uiga sauā o Napalu. Atonu na manatu Apikaila o le a ia avaavau atu ma fasi o ia. Ae e lē o le mea lenā na tupu. Aiseā? O le tala lea a le Tusi Paia e faatatau iā Napalu: “Ona tau pē ai lea o lona fatu, ma ua pei ai o ia o se maa. . . . Ina ua mavae le pe ā ma le sefulu aso, ona taia lea e Ieova o Napalu ma ua oti ai.” O lea, na faasala e le Atua Napalu ona o le agaleaga iā Tavita, o Lana auauna na ia faauuina. Na faamanuia foʻi e Ieova Apikaila e ala i le tuusaʻoloto o ia mai i le pule a se tane e matuā leaga.

Na toe faamanuia e Ieova Apikaila i se isi auala. Ina ua iloa e Tavita ua oti Napalu, na ia valaaulia Apikaila e fai ma ana avā ma na talia e Apikaila. I se tasi aso, na ave faamalosi ai Apikaila e fili o tagata o le Atua, ae e leʻi umi ae laveaʻia o ia e lana tane lelei ma lototele. Na iʻu ina avea Tavita ma tupu. Na nofotupu muamua o ia i Iuta, ona sosoo ai lea ma Isaraelu atoa. Sa fanaua foʻi e Apikaila se la tama tama. O lea, na faamanuia e Ieova Apikaila ona o lona atamai ma lona lototele.

Faitau le tala i le Tusi Paia:

• 1 Samuelu 25:​1-43; 30:​1-6, 16-20

Mo talanoaga:

O ā auala na faaalia ai e Apikaila le lototele?

1. 3. Aiseā na tatau ai ona talisapaia e Napalu le fesoasoani a fitafita a Tavita? (ia 77-78 ¶9-10) E

   Tali

   Hanan Isachar/Alamy Stock Photo

2. 4. O le ā na uiga i ai upu a Apikaila e faapea o le ola o Tavita o le a ʻpuipuia lava e Ieova, e pei ona puipuia e se tasi o mea tāua i se ato?’ (1 Samu. 25:29; it “Ola” ¶45)

   Tali

 Manatunatu i ni Lesona

• O le ā e aʻoaʻoina e tane mai iā Tavita, o lē na faalogo iā Apikaila? I

  Tali

• O le ā e aʻoaʻoina e tuafāfine e lē talitonu a latou tane mai iā Apikaila?

  Tali

• E faapefea ona e faaaʻoaʻo iā Apikaila i le faaalia o le lototele i lou olaga?

  Tali

Manatunatu iā Ieova ma Lona Finagalo

• O le ā ua ou aʻoaʻoina mai i lenei tala e faatatau iā Ieova?

  Tali

• O le ā le fesootaʻiga o lenei tala ma le finagalo o Ieova?

  Tali

• O ā ni mea ou te fia fesili ai iā Apikaila pe a toetū mai?

  Tali