Skip to content

Skip to table of contents

 MATAUPU 17

Ia Tumau i le Alofa o le Atua

Ia Tumau i le Alofa o le Atua

“Ia atiaʻe iā te outou i lo outou faatuatua e sili ona paia . . . Ia outou faatumau iā te outou i le alofa o le Atua.”​—IUTA 20, 21.

1, 2. O le ā e tatou te faia ina ia atili faamalosia ai la tatou faiā ma Ieova?

E TATOU te mananaʻo uma lava ia malolosi ma ola mālōlōina. O lea e tatou te taumafai ai e aai i meaʻai paleni, faamalositino e lē aunoa, ma tausi lelei o tatou tino. E ui lava o le faia faapea e manaʻomia ai ni taumafaiga, ae e tatou te lē faavaivai ona e iai iʻuga lelei. Peitaʻi, e iai foʻi se isi itu e manaʻomia ona tatou malolosi ma ola mālōlōina ai.

2 E tusa lava pe na lelei le amataga o lo tatou iloaina o Ieova, ae e manaʻomia ona faamalosia atili pea la tatou faiā ma ia. Ina ua faalaeiau e Iuta Kerisiano “ia outou faatumau iā te outou i le alofa o le Atua,” sa ia faamatala auala e mafai ona latou faia ai faapea. Na faapea atu o ia: “Ia atiaʻe iā te outou i lo outou faatuatua e sili ona paia.” (Iuta 20, 21) E faapefea la ona tatou atiaʻe le faatuatua malosi ma faatumau ai i tatou i le alofa o le Atua?

IA FAAAUAU ONA ATIAʻE LOU FAATUATUA

3-5. (a) O le ā le manatu e manaʻo Satani e iā te oe e faatatau i tapulaa a Ieova? (e) O le ā sou manatu i tulafono ma mataupu silisili a Ieova?

3 E tāua ona e faamaonia e oe lava e sili atu ona lelei ala o Ieova. E manaʻo Satani ia e manatu e faapea, e faigatā  tele ona tausia tapulaa a le Atua ma o le a sili atu ona e fiafia pe a filifili e oe lava le mea e saʻo ma le mea sesē. Talu mai le taimi i le faatoʻaga i Etena, ua taumafai Satani e faatalitonu tagata i lenei manatu. (Kenese 3:1-6) O loo ia taumafai malosi pea i aso nei.

4 Pe e saʻo Satani? Po ua faasāsā naʻuā tapulaa a Ieova? E leai. O se faataʻitaʻiga, seʻi faapea o loo e savali i se paka matagofie. Ua e iloa atu se pā maualuga o loo poloka mai ai se vaega o le paka. Atonu e te mafaufau, ʻMatuā faalavelave tele lenei pā!’ Ae e faalogoina loa i le taimi lenā le tagi a se leona mai i le isi itu o le pā. O le ā sou manatu i le pā i le taimi lenā? Ua e lotofaafetai ona ua puipuia ai oe mai i le leona. Ua faatusaina tapulaa a Ieova i lenā pā, ae ua faatusa le Tiapolo i le leona. Ua lapataʻia i tatou i le Afioga a le Atua: “Ia faaauau ona outou mafaufau lelei ma ia mataala. O loo fealuaʻi lo outou fili, o le Tiapolo lea, e pei o se leona o loo tagi leotele, e saʻili se tasi e na te ʻaina.”​—1 Peteru 5:8.

5 E finagalo Ieova ia tatou maua se olaga e sili ona lelei. E lē finagalo o ia e faasesēina i tatou e Satani. O le māfuaaga lenā ua ia saunia mai ai tulafono ma mataupu silisili, ina ia puipuia ai i tatou ma maua le fiafia. (Efeso 6:11) Na tusi Iakopo: “O lē e vaavaai totoʻa i le tulafono lelei atoatoa o le saʻolotoga, ma tausisi i ai . . . o le a fiafia ai o ia ona o lona faia o lea galuega.”​—Iakopo 1:25.

6. E mafai faapefea ona faatalitonuina i tatou e sili atu ona lelei ala o le Atua?

6 Pe a tatou mulimuli i le taʻitaʻiga a Ieova, o le a faaleleia o tatou olaga ma atili ai ona māfana la tatou faauōga ma ia. O se faataʻitaʻiga, e tatou te maua aogā pe a talia lana valaaulia ia tatalo atu e lē aunoa iā te ia. (Mataio 6:5-8; 1 Tesalonia 5:17) E tatou te fiafia pe a usiusitaʻi i  lana poloaʻiga ia faapotopoto e tapuaʻi atu iā te ia ma fefaalaeiauaʻi, ma faia se sao atoatoa i le galuega talaʻi ma le aʻoaʻo atu. (Mataio 28:19, 20; Kalatia 6:2; Eperu 10:24, 25) A o tatou mafaufau i auala ua fesoasoani ai nei vala ina ia malosi pea lo tatou faatuatua, ua atili ai ona faatalitonuina i tatou e sili atu ona lelei ala o Ieova.

7, 8. O le ā e fesoasoani iā i tatou e ʻalofia ai le popole i tofotofoga e ono tulaʻi mai i le lumanaʻi?

7 E tatou te ono popole o le a faigatā tele tofotofoga o lo tatou faatuatua i le lumanaʻi ma o le a tatou lē taulau. Pe afai e iā te oe lenā lagona, ia manatua fetalaiga nei a Ieova: “O aʻu o Ieova, lou Atua, o Lē o loo aʻoaʻo oe i mea e aogā iā te oe, o Lē e taʻitaʻiina oe i le ala e ao ona e ui ai. E lelei pe a e faalogo mai i aʻu poloaʻiga! Ona pei ai lea o se vaitafe lou filemu, ma lau amiotonu e pei o galu o le sami.”​—Isaia 48:17, 18.

 8 Pe a tatou usiusitaʻi iā Ieova, o le a pei lo tatou filemu o se vaitafe e tafe pea. O le a pei lo tatou amiotonu o galu o le sami e fafati pea i le matafaga. E mafai ona tatou faamaoni e faavavau iā te ia! Po o ā lava mea e tutupu i o tatou olaga, ua folafola mai i le Salamo 55:22: “Ia tuuina atu iā Ieova ou popolega uma, o ia lava e na te tausia oe. E na te lē tuua lava le tagata amiotonu ia tautevateva.”

ʻFINAFINAU INA IA AVEA MA TAGATA MATUTUA’

9, 10. O le ā le uiga o le avea ma tagata matua?

9 A o e faamalosia la oulua faiā ma Ieova, o le a e ʻfinafinau ina ia avea ma tagata matua.’ (Eperu 6:1) O le ā le uiga o le avea ma tagata matua?

10 E lē tau manaʻomia ona tatou matutua ina ia avea ai ma Kerisiano taʻumatuaina. Ina ia taʻumatuaina, e tatau ona avea Ieova ma a tatou Uō sili ma taumafai ia vaai i mea e pei ona silasila i ai o ia. (Ioane 4:23) Na tusi Paulo: “O i latou e naunau i le tino, e taulaʻi atu o latou manatu i mea a le tino, a o ē e naunau i le agaga, e taulaʻi atu i mea a le agaga.” (Roma 8:5) O le tagata e taʻumatuaina e lē taulaʻi atu lona olaga i mea faafiafia po o meafaitino. Nai lo o lea, e taulaʻi atu o ia e auauna iā Ieova ma faia filifiliga atamai i lona olaga. (Faataoto 27:11; faitau le Iakopo 1:2, 3.) E lē taaʻina o ia e fai le mea sesē. O le tagata e taʻumatuaina e na te iloa le mea e saʻo ma maumauaʻi e fai.

11, 12. (a) O le ā na taʻua e Paulo e faatatau i se Kerisiano e ʻfaaaogā lona mafaufau’? (e) E faapefea i le avea ma sē e taʻumatuaina ona talitutusa ma le avea ma se tagata taalo?

11 E manaʻomia taumafaiga ina ia avea ai ma tagata taʻumatuaina. Na tusi le aposetolo o Paulo: “O meaʻai  aano e mo tagata matutua ia, o ē ua faaaogā o latou mafaufau e iloa le mea saʻo ma le mea sesē ina ua aʻoaʻoina.” (Eperu 5:14) O le upu “aʻoaʻoina” e tatou te ono mafaufau ai i le toleniina o se tagata taalo.

12 Pe a tatou vāai o taalo se tagata tomai i taaloga, e tatou te iloa sa alu le taimi ma fai ni toleniga ina ia atiaʻe ai lona tomai. E leʻi fanau mai o ia o se tagata taalo. Ina ua fanau mai se pepe, e na te leʻi iloa le auala e faaaogā ai ona lima ma vae. Ae a o faagasolo taimi, sa ia aʻoaʻoina le auala e uu ai mea ma le auala e savali ai. Pe a toleni, e mafai ona avea o ia ma tagata taalo. I se tulaga talitutusa, e manaʻomia le taimi ma toleniga ina ia avea ai i tatou ma Kerisiano taʻumatuaina.

13. O le ā e fesoasoani iā i tatou ina ia mafaufau e pei o Ieova?

13 Na tatou iloiloina i lenei tusi auala e mafai ona tatou mafaufau ai e pei o Ieova, ma vaai i mea e pei ona silasila i ai o ia. Ua aʻoaʻoina i tatou ia talisapaia ma naunau i tapulaa a Ieova. Ia fesili ifo iā i tatou lava pe a faia ni filifiliga: ʻO ā tulafono po o mataupu silisili o le Tusi Paia e faatatau i lenei tulaga? E faapefea ona ou faatatauina? O le ā e finagalo Ieova ia ou faia?’​—Faitau le Faataoto 3:5, 6; Iakopo 1:5.

14. O le ā e manaʻomia ona tatou fai pe a mananaʻo e atiaʻe lo tatou faatuatua?

14 E faaauau pea ona tatou atiaʻe le faatuatua iā Ieova. E pei ona malosi o le tino pe a taumafa i meaʻai paleni, e faapena foʻi ona fesoasoani le aʻoaʻoina e faatatau iā Ieova e tatou te atiaʻe ai le faatuatua malosi. Pe a amata ona tatou suʻesuʻeina le Tusi Paia, e tatou te aʻoaʻoina upu moni faavae e faatatau iā Ieova ma ona ala. Ae a o faagasolo taimi, e manaʻomia ona tatou malamalama i  mea loloto. O le mea lenā sa uiga i ai Paulo ina ua faapea mai: “O meaʻai aano e mo tagata matutua ia.” E tatou te maua le atamai e ala i le faatatau o mea ua tatou aʻoaʻoina. Ua faapea mai le Tusi Paia: “O le atamai o le mea sili lea.”​—Faataoto 4:5-7; 1 Peteru 2:2.

15. Aiseā e tāua ai ona tatou alolofa moni iā Ieova ma o tatou uso ma tuafāfine?

15 Atonu e malosi ma mālōlōina se tasi, ae ina ia tumau i lenā tulaga, e tatau ona faaauau ona tausia lelei o ia. I se tulaga talitutusa, o le tagata taʻumatuaina e na te iloa e manaʻomia ona ia galue malosi ina ia malosi pea la laʻua faiā ma Ieova. Ua faamanatu mai e Paulo e faapea: “Ia tofotofo pea iā te outou po o outou iai i le faatuatua, ia suʻesuʻe ifo pea iā te outou po o faapeʻī outou.” (2 Korinito 13:5) Ae e tele isi mea e manaʻomia i lo o le tau ina faatuatua malosi. E tatau ona faaauau ona tuputupu aʻe lo tatou alofa mo Ieova ma o tatou uso ma tuafāfine. Na faapea mai Paulo: “Afai foʻi ua iā te aʻu . . . le poto uma lava, ma pe a iā te aʻu foʻi le faatuatua e siitia ai mauga, ae e leai soʻu alofa, ua ou lē aogā.”​—1 Korinito 13:1-3.

IA TAULAʻI ATU I LOU FAAMOEMOE

16. O ā manatu e manaʻo Satani ia iā i tatou?

16 E manaʻo Satani ia tatou mafaufau e faapea, e tusa lava po o ā a tatou taumafaiga e fai ae e lē mafai lava ona tatou faafiafiaina ai Ieova. E manaʻo ia tatou lotovaivai ma mafaufau e leai se vaifofō i o tatou faafitauli. E lē manaʻo o ia e tatou te maufaatuatuaina o tatou uso Kerisiano, ma e lē manaʻo foʻi e tatou te fiafia. (Efeso 2:2) Ua iloa e Satani o mafaufauga lē saʻo e mafai ona faaleagaina ai i tatou faapea la tatou faiā ma le Atua. Ae ua  tuuina mai e Ieova le fesoasoani iā i tatou e tau faasaga ai i mafaufauga lē saʻo. Ua ia tuuina mai iā i tatou le faamoemoe.

17. Aiseā e tāua ai le faamoemoe?

17 I le 1 Tesalonia 5:8, ua faatusa e le Tusi Paia lo tatou faamoemoe i le puloutau lea e puipuia ai le ulu o se fitafita i le taimi o le taua, e taʻua “o le faamoemoe o le faaolataga.” O le faamoemoe i folafolaga a Ieova e mafai ona puipuia ai o tatou mafaufau, ma fesoasoani e teena ai mafaufauga lē saʻo.

18, 19. Na faapefea i le faamoemoe ona faamalosia ai Iesu?

18 Na faamalosia Iesu ona o lona faamoemoe. Sa feagai o ia ma tulaga faigatā i le pō mulimuli na soifua ai i le lalolagi. Na faalata o ia e sana uō vavalalata. Na faafiti se tasi o ana uō e na te lē iloaina o ia. Na tuua o ia e isi ma sosola. Na tetee tagata o lona nuu ma alalaga atu ia  fasiotia o ia i luga o le laau e faapuapuagatia ai. O le ā na fesoasoani iā te ia e tumau ai i nei mea tigā? “O le olioli sa i ona luma, na tumau ai o ia e ui ina faapuapuagatia i le laau, na lē amanaʻia e ia le mā, ma nofo o ia i le itu taumatau o le nofoālii o le Atua.”​—Eperu 12:2.

19 Na iloa e Iesu o le a ia faamamaluina lona Tamā ma faamaonia le pepelo o Satani, pe afai e tumau faamaoni. Na matuā olioli o ia ona o lenā faamoemoe. Sa ia iloa ua lē o toe umi ona la toe faatasi lea ma lona Tamā i le lagi. Sa fesoasoani lenei faamoemoe iā te ia e tumau ai. I le pei o Iesu, e tatau ona tatou taulaʻi atu i lo tatou faamoemoe. O le a fesoasoani e tatou te tumau ai e tusa lava po o le ā e tupu.

20. O le ā e fesoasoani iā te oe ina ia maua se vaaiga saʻo?

20 E silafia e Ieova lou faatuatua ma le tumau. (Isaia 30:18; faitau le Malaki 3:10.) Ua ia folafola mai e “foaʻi  mai . . . mea e manaʻo i ai lou loto.” (Salamo 37:4) O lea, ia taulaʻi atu pea lou mafaufau i lou faamoemoe. E manaʻo Satani ia mou atu lou faamoemoe ma ia e manatu o le a lē faataunuuina folafolaga a Ieova. Peitaʻi, e lē tatau ona e lolo atu i mafaufauga lē saʻo! Pe afai e te mātauina ua tau mou atu lou faamoemoe, ia tatalo iā Ieova mo le fesoasoani. Ia manatua upu o loo i le Filipi 4:6, 7: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai, e ala iā Keriso Iesu.”

21, 22. (a) O le ā lou faamoemoe? (e) O le ā ua e filifili e fai?

21 Ia faaalu e lē aunoa se taimi e manatunatu loloto ai i mea matagofie o le a tutupu i le lumanaʻi. Ua lē o toe umi ona tapuaʻi atu lea o tagata uma iā Ieova. (Faaaliga 7:9, 14) Seʻi mafaufau i le olaga i le lalolagi fou. O le a sili atu nai lo o so o se mea e tatou te mafaufau i ai! O le a tafiesea Satani, ana temoni, ma mea leaga uma. E lē oo iā te oe le maʻi ma le oti. O le a e ala aʻe i aso uma e atoatoa lou malosi ma fiafia. O le a galulue tagata uma e galueaʻiina le lalolagi e avea ma parataiso. O le a maua e tagata uma meaʻai lelei ma se nofoaga saogalemu e nofo ai. O le a lē sauā tagata ae o le a agalelei ma le faamaoni le tasi i le isi. Mulimuli ane o le a olioli tagata uma i le lalolagi i le “saʻolotoga mamalu o le fanau a le Atua.”​—Roma 8:21.

22 E finagalo Ieova e avea o ia ma au Uō sili. O lea, ia faia mea uma e te mafaia ina ia usiusitaʻi ai iā Ieova ma mafuta vavalalata atu ai iā te ia i aso uma. Ioe, tau ina ia tatou tumau uma i le alofa o le Atua e faavavau!​—Iuta 21.