Alu i mataupu o loo iai

Alu i le lisi o mataupu

E Faapefea Ona Avea Aʻu ma Uō a le Atua?

E Faapefea Ona Avea Aʻu ma Uō a le Atua?

MATAUPU 35

E Faapefea Ona Avea Aʻu ma Uō a le Atua?

Na iai se mea na tupu iā Jeremy, na ia iloa ai le tāua o le iai o se faauōga ma le Atua. Na ia faapea mai: “Ina ua 12 oʻu tausaga, na tuua e loʻu tamā lo matou aiga. I se tasi po ae ou te leʻi moe, na ou tatalo faatauanau atu iā Ieova ina ia toe foʻi mai loʻu tamā.”

A o mafatia Jeremy, na amata ai loa ona ia faitauina le Tusi Paia. Ina ua ia faitauina le Salamo 10:14, na matuā pāʻia ai lona loto. Ua faapea mai lenā mau e faatatau iā Ieova: “Ua tuuina atu e lē ua lē mafesoasoania, o le tama lea ua leai se tamā o ia lava iā te oe. O oe lava ua avea ma ona fesoasoani.” Na faapea mai Jeremy: “Na ou lagona e peiseaʻī o loo talanoa mai Ieova iā te aʻu, ma faailoa mai, o ia o loʻu fesoasoani ma o ia o loʻu tamā. E leai se isi tamā e sili atu ona lelei nai lo ia.”

E TUSA pe na e tofo i le tulaga na oo iā Jeremy pe leai, ae ua faailoa mai e le Tusi Paia, e finagalo Ieova ia avea oe ma ana uō. Ua faapea mai le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iakopo 4:8) Seʻi mafaufau i le uiga o na upu. E ui lava e te lē vaai iā te ia, ma e lē tutusa foʻi oulua tulaga, ae o loo valaaulia pea oe e Ieova le Atua e avea ma ana uō!

Ae o le faauōga ma le Atua, o le a manaʻomia ai ni au taumafaiga. Mo se faataʻitaʻiga: Pe afai e iai sau laau totō i le fale, e lē mafai e le laau ona ola a ia. E tatau ona fui i aso uma, ma tuu i se vaega o le fale e ola lelei ai. E faapena foʻi au taumafaiga e manaʻomia ona fai, ina ia iai sau faauōga ma le Atua. O ā mea e manaʻomia ona e faia, ina ia atiaʻe ai le lua faauōga?

Le Tāua o le Suʻesuʻe o le Tusi Paia

O so o se faauōga e manaʻomia ai ni fesootaʻiga lelei, e ala i le faalogo lelei ma talanoa atu. E faapena foʻi le faauōga ma le Atua. O le faitau ma le suʻesuʻeina o le Tusi Paia, o le auala lea e tatou te faalogo atu ai i mea o loo fetalai mai ai le Atua iā i tatou.​—Salamo 1:​2, 3.

Ae atonu e te lē fiafia e suʻesuʻe. O le toʻatele o talavou e fiafia e matamata i le TV, taaalo pe tafafao foʻi ma a latou uō. Ae pe a e manaʻo e atiaʻe se lua faauōga ma le Atua, e manaʻomia ona e mulimuli i auala ua ia faatulaga mai. E manaʻomia ona e faalogo atu iā te ia, e ala i le suʻesuʻeina o lana Afioga.

Ae aua e te popole. E lē tatau ona avea le suʻesuʻeina o le Tusi Paia, o se avega mamafa. E mafai lava ona avea o sau masaniga fiafia, e tusa lava po o oe o se tagata e lē fiafia e suʻesuʻe. O le mea muamua lava e tatau ona e faia, o le faatulaga o se taimi e suʻesuʻe ai le Tusi Paia. Na faapea mai se tuafafine talavou e igoa iā Lais: “E iai laʻu faasologa. Ou te faitauina se mataupu se tasi o le Tusi Paia i taeao uma.” E ese foʻi le faasologa a Maria e 15 tausaga. Na ia faapea mai: “Ou te faitauina se vaega o le Tusi Paia i po uma, ae ou te leʻi moe.”

Ina ia amata se faasologa o au oe lava suʻesuʻega, tagaʻi i le  pusa i le itulau e 292. Pe a uma, tusi i lalo le taimi e fai ai au suʻesuʻega i le Afioga a le Atua, e faaalu ai se 30 minute pe sili atu.

․․․․․

O le faatulagaina o le taimi ua na o se amataga. Ae pe a amata loa au suʻesuʻega, o le mea moni o le a e mātauina ai e lē o taimi uma e faigofie ai ona faitau le Tusi Paia. Atonu e te ioe i le manatu o Jezreel e 11 tausaga. Na ia faapea mai: “O isi vaega o le Tusi Paia e faigatā ona e malamalama ai, ma e lē oso ai sou fia faitau.” Pe afai o ou faalogona na, aua e te faavaivai. Ia vaai pea i au suʻesuʻega o le Tusi Paia, o se avanoa e te faalogo atu ai iā Ieova le Atua, o lau uō. O le iʻuga, o le a e fiafia ai pea e suʻesuʻe le Tusi Paia ma maua ai le tele o aogā.

E Tāua le Tatalo

O le tatalo o le auala lea e talanoa atu ai iā Ieova. Seʻi mafaufau la i le tāua o lenei meaalofa o le tatalo. E mafai ona e fesootaʻi iā Ieova le Atua, i so o se taimi o le aso po o le po. E nofosauni o ia e faafofoga mai, ma e naunau foʻi e faafofoga mai i mea o loo tatou tatalo atu ai. O le māfuaaga lenā ua taʻua ai i le Filipi 4:6: “Ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai.”

Ua faailoa mai i lenei mau, e tele lava mea e mafai ona tatou talanoa atu ai iā Ieova. E mafai ona faaaofia ai ou faafitauli ma popolega. E mafai foʻi ona faailoa atu mea e te fia faafetai ai. E masani ona e faafetai i au uō pe a latou faia se mea lelei mo oe. E mafai foʻi ona e faia faapena iā Ieova, auā ua ia faia mea sili atu nai lo mea e mafai ona faia e se isi au uō iā te oe.​—Salamo 106:1

Tusi i lalo ni mea e te fia faafetai atu ai iā Ieova.

․․․․․

E mautinoa lava e iai mea e te fefe ma popole ai, ma e mamafa i lou mafaufau mai lea taimi i lea taimi. Ua faapea mai le Salamo 55:22: “Ia tuuina atu iā Ieova ou popolega uma, o ia lava e na te tausia oe. E na te lē tuua lava le tagata amiotonu ia tautevateva.”

Tusi i lalo ni mea o e popole ai, e te manaʻo e faaaofia i au tatalo.

․․․․․

Mea e Tutupu i le Olaga

E iai se isi vala o le lua faauōga ma le Atua e lē tatau ona e faalēano i ai. Na tusi le faisalamo o Tavita: “Inā outou tofotofo ia ma iloa ai e lelei Ieova.” (Salamo 34:8) Ina ua fatu e Tavita le Salamo lona 34, o le taimi lea faatoʻa uma lava ona ia fesagaʻia ni mea na tutupu i lona olaga na fefe ai. Na ia fesolasolataʻi mai taumafaiga a le tupu o Saulo e fasiotia o ia, o se mea na matuā faateʻia ai. Ae na ia manaʻomia foʻi se sulufaʻiga mai i ona fili, le ʻau Filisitia. Ina ua ia fesagaʻia le oti, na gaoioi o ia ma le atamai, ma faafoliga atu o se tagata valea, ma mafai ona faasaoina mai ai.​—1 Samuelu 21:10-​15

E leʻi manatu Tavita o lona lava atamai na faasaoina ai o ia mai le oti. Ae na ia faafetai iā Ieova. Na ia tusi i le amataga o le salamo: “Na ou fesili atu iā Ieova, ona tali mai lea o ia iā te aʻu, na ia laveaʻiina foʻi aʻu mai i mea uma na ou fefe ai.” (Salamo 34:4) Ona o se mea na tupu moni lava i le olaga o Tavita, ua ia augani mai ai i isi ina ʻia tofotofo ma iloa e lelei Ieova.’ *

Po o e manatua se mea na tupu i lou olaga e faamaonia ai le tausiga a Ieova? Pe afai e iai, tusi i lalo. Mātau: E lē na o se mea mataʻina na tupu, ae taumafai e mafaufau i faamanuiaga lāiti i aso taʻitasi, ia e te ono manatu māmā i ai.

․․․․․

Atonu na aʻoaʻo oe e ou mātua i le Tusi Paia. Pe afai o lea, tasi lenā faamanuiaga. E tusa lava pe na la faia faapea, ae manaʻomia ona atiaʻe sau oe lava faauōga ma le Atua. Pe afai e te leʻi faia faapea, e manaʻomia la ona e faaaogā lenei mataupu e fesoasoani e amata ai. O le a faamanuia e Ieova au taumafaiga. Ua faapea mai le Tusi Paia: “Ia talosaga atu pea, ona foaʻiina mai ai lea iā te outou. Ia saʻili atu pea, ona outou maua ai lea.”​—Mataio 7:7.

FAITAU ATILI I LENEI MATAUPU I LE TUSI 1, MATAUPU E 38 MA LE 39

I LE ISI MATAUPU

Pe e faigatā ona e talanoa i isi e faatatau i le Atua? Iloilo pe faapefea ona e puipuia ou talitonuga.

[Faaopoopoga i lalo]

^ pala. 24 E faaliliuina i nisi Tusi Paia le faaupuga “tofotofo ma iloa” i le “saʻiliʻili ma iloa ai e oe lava,” po o le “tofo ma iloa ai.”​—Contemporary English Version, Today’s English Version, and The Bible in Basic English.

MAU AUTŪ

“E fiafia o ē e naunau i mea faaleagaga.”​—Mataio 5:3.

FESOASOANI

Faitau ni itulau se fa o le Tusi Paia i aso taʻitasi, ma mafai ai ona e faitauina le Tusi Paia atoa i le pe ā ma le tausaga.

E TE SILAFIA . . ?

O lou faitauina o lenei tusi ma faatatauina mataupu silisili faale-Tusi Paia o loo iai, e iloa ai o loo naunau mai Ieova iā te oe.​—Ioane 6:​44.

MEA UA OU FUAFUA E FAI!

Ina ia maua atili aogā mai i aʻu lava suʻesuʻega faale-Tusi Paia, o le a ou ․․․․․

Ina ia ou tatalo e lē aunoa, o le a ou ․․․․․

O le ā se mea ou te fia fesili ai i oʻu mātua e faatatau i lenei mataupu? ․․․․․

O LE Ā SOU MANATU?

● E faapefea ona avea le suʻesuʻeina o le Tusi Paia o se mea e te fiafia ai?

● Aiseā e faafofoga ai Ieova i tatalo a tagata lē lelei atoatoa?

● E faapefea ona faaleleia au tatalo?

[Faamatalaga faaopoopo]

A o oʻu laʻititi, ou te tautū a i upu masani pe a ou tatalo. Ae i le taimi lenei, ou te taumafai e tatalo i mea lelei ma mea lē lelei e tutupu i aso taʻitasi. E lē tutusa mea e tutupu i ni aso se lua, ma ua ou ʻalofia ai le toe taʻua o se mataupu se tasi i aʻu tatalo.”​—Eve

[Pusa/Ata]

 Faitau Lau Tusi Paia

1. Filifili se tala o le Tusi Paia e te fia faitau ai. Ia tatalo mo le atamai ina ia malamalama ai lenā mataupu.

2. Faitau ma le faaeteete le tala. Aua le faatopelauina lau faitau. Taumafai e faaāta mea o loo e faitau i ai: Ia faaāta a latou gaoioiga, leo, manogi, tofo o meaʻai ma isi mea. Ia pei lava o loo e iai moni i le nofoaga o loo tupu ai le tala!

3. Mafaufau i mea sa e faitauina. Ia fesili ifo iā te oe lava i fesili nei:

● Aiseā na faaaofia ai e Ieova lenei tala i lana Afioga?

● O ai tagata e manaʻomia ona tatou faaaʻoaʻo i ai, ae o ai foʻi o loo fai ma faaaʻoaʻoga lapataʻi?

● O ā ni lesona aogā e mafai ona ou aʻoaʻoina mai lenei mataupu?

● O le ā ou te aʻoaʻoina mai lenei tala e faatatau iā Ieova, ma le auala e gaioi ai o ia?

4. Fai se tatalo puupuu iā Ieova. Taʻu atu iā te ia mea na e aʻoaʻoina mai au suʻesuʻega o le Tusi Paia, ma le auala o le a e faatatauina ai lenei mataupu i lou olaga. Aua neʻi galo ona faafetai atu i lana meaalofa ua e maua, o lana Afioga le Tusi Paia!

[Ata]

“O lau afioga o le sulu lea i oʻu vae, ma le malamalama i loʻu ala.”​—Salamo 119:105.

[Pusa/Ata]

Faamuamua Mea e Sili Ona Tāua

Pe ua e pisi tele ma leai ai se taimi e te tatalo ma suʻesuʻe ai le Tusi Paia? E faalagolago i le auala e te faatulaga ai mea e tāua iā te oe.

Faataʻitaʻi le mea lenei: Ia aumai se fagu, ma tuu i ai ni maa lapopoʻa i totonu, ona faatumu lea o le fagu i oneone. O lea ua tumu le fagu i maa ma le oneone.

Sasaa ese maa ma le oneone mai le fagu, ona toe tuu lea i totonu, ae faamuamua i ai le oneone: Faatumu le fagu i le oneone, ona tuu lea i totonu ma maa. O toe ofi maa i totonu? O le māfuaaga, ona o lea ua tumu le fagu i le oneone.

O le ā le lesona? Ua faapea mai le Tusi Paia: “Ia outou faamautinoa o mea e sili ona tāua.” (Filipi 1:​10) Pe a e faamuamua mea lāiti e pei o faafiafiaga, o le a lē taitai ona maua ai sou taimi mo mea e sili ona tāua po o mea faaleagaga. Ae pe a e mulimuli i le faatonuga a le Tusi Paia, o le a e maua ai le taimi mo manaʻoga o le Malo, ma le taimi mo faafiafiaga. E faalagolago lava i mea o le a e tuuina muamua i totonu o le fagu!

[Ata]

O lau faauōga ma le Atua,e manaʻomia ai le tausiga faapelepele ina ia tuputupu aʻe ai, e pei lava o lau laau totō i le fale.