Alu i mataupu o loo iai

Alu i le lisi o mataupu

Toto: Filifiliga a Ai ma o le Loto Fuatia Ifo o Ai?

Toto: Filifiliga a Ai ma o le Loto Fuatia Ifo o Ai?

 Faaopoopoga

Toto: Filifiliga a Ai ma o le Loto Fuatia Ifo o Ai?

Faamatalaina e J. Lowell Dixon, M.D.

Toe lomia i le faatagaga a le New York State Journal of Medicine, 1988; 88:463-464, aiā e lomia ai, e mai le Medical Society of the State of New York.

O FOMA‘I ua faatuatuaina i le faatatauina o lo latou poto, atamai, ma le poto masani i le teteeina o faama‘i ma le oti. Peitai, ae faapefea pe afai e teena e se gasegase se togafitiga ua fautuaina? E ono tupu lenei mea pe afai o le gasegase o se Molimau a Ieova ma o le togafitiga e aofia ai le toto atoa, se potopotoga o sela mūmū o le toto, le vaega faasuavaia sasama o le toto (plasma), po o sela faato‘a toto (platelets).

Pe a oo i le faaaogaina o le toto, atonu e manatu se foma‘i e faapea, o le filifiliga a se gasegase ina ia faaaogaina togafitiga e lē faaaogā ai le toto, o le a taofia ai le sa‘olotoga a le foma‘i ua tuutoina. Ae aua foi ne‘i galo ia te ia, e iai nisi gasegase e lē o ni Molimau a Ieova e masani foi ona latou filifili ina ia lē faaaogaina fautuaga a a latou foma‘i. Ua ta‘ua e Appelbauma ma Roth1 e faapea, e 19 pasene o gasegase i falema‘i, latou te teena a lē itiiti mai e tasi lava se togafitiga po o se auala e faia ai se togafitiga, e ui lava o le 15 pasene o na tetee “sa mautinoa le lamatia ai o ola.”

O le manatu lautele e faapea e “sili atu le iloa o foma‘i” ua pogai ai i le tele o gasegase ona latou mulimuli atu i le poto ma le atamai o a latou foma‘i. Ae pagā le matautia o le a iai pe afai o le a gaoioi se foma‘i e peiseai o lenei faamatalaga ua o se mea moni faasaienitisi, ma latou togafitia ai le gasegase e tusa ma lea manatu. E moni, o la tatou a‘oa‘oga faafoma‘i, o o tatou laisene faamaonia, ma lo tatou poto masani, e aumai ai ia i tatou faaeaga ua matauina lona aogā i le faiva faafoma‘i. Peitai ane, e iai foi i a tatou gasegase a latou aiā tatau. Ma, e pei foi ona atonu ua tatou iloa, e sili atu ona faatāua e le tulafono (e oo lava i Tulafono Faavae) aiā tatau.

I luga o puipui i le tele o falema‘i, e iloa atu ai e se tasi se faaaliga e faapea, “Tulafono o Aiā Tatau a Gasegase.” O se tasi o nei aiā tatau, o le maliega lea atonu e manino lelei pe a ta‘ua o le filifiliga ua malamalama lelei. A uma loa ona faailoa atu i le gasegase iuga mautinoa o togafitiga eseese, (po o le lē togafitia), o lana filifiliga o le mea lea o le a gauai i ai. I le Falema‘i o Albert Einstein i le Bronx, New York, ua fai mai faapea se tulafono o upufai i tuigā toto ma Molimau a Ieova: “So o se gasegase o se tagata matua o lē e leai sona faaletonu, ua ia te ia le aiā tatau e teena ai togafitiga e tusa lava po o ā leaga o sea teena ia te ia i lona soifua mālōlōina.”2

A o manatu mamafa foma‘i e uiga i mataupu faavae po o tuua‘iga, ua faamamafaina lava e faamasinoga le silisili o le filifiliga a le gasegase.3 Ua faamatala mai e le Faamasinoga o Talosaga a Niu Ioka e faapea: “O le aiā tatau a le gasegase e filifili ai e ia le auala e fai ai lona togafitiga [e] sili atu ona maualuga . . . E lē mafai e [se] foma‘i ona faapea mai ua na solia ona tiute tauave faaletulafono pe faapolofesa pe afai na te faaaloalogia le aiā tatau a se gasegase matua e teena ai se togafitiga faafoma‘i.”4 Ua matauina foi e lena faamasinoga e faapea “o le faamaoni o mataupu faavae o le tomai faapolofesa faafoma‘i, e ui ina tāua, ae lē mafai ona aveesea ai le aiā tatau faavae a le tagata lava ia e pei ona faamamafaina i inei. O le manao ma le faanaunauga o le tagata e tatau ona faamuamua, ae lē o le manaoga o le falema‘i.”5

Pe afai e teena e se Molimau le toto, atonu e lagona e foma‘i se loto tiga ona o le a lē faia le mea e sili, ae o se mea e foliga mai ua itiiti ifo. E ui i lea, o le mea o loo talosaga atu le Molimau ina ia faia e foma‘i magafagafa, o le saunia lea o se tausiga sili ona lelei e sui ai le toto, i lalo o tulaga ua iai. E masani lava ona tatou suia a tatou togafitiga ina ia talafeagai ma tulaga ua aliali mai, e pei o le toto maualuga (hypertension), o le teena e le tino o fualaau o le antibiotic po o le lē maua foi o mea faigaluega iloga ona e taugata. I se gasegase o se Molimau, ua talosagaina ai foma‘i ina ia latou faafoeina togafitiga po o taotoga ia ogatasi ma le filifiliga a le gasegase ina ia alofia le toto, e tusa ai ma lona loto fuatia ifo, o lona tulaga faalelotu, ma tulaga tau amio.

E tele lipoti o taotoga tetele o gasegase o Molimau ua faaali mai ai e mafai e le tele o foma‘i, i le loto fuatia ifo lelei ma iuga manuia, ona faafoeina le talosaga ina ia lē faaaogaina le toto. E pei o se faaaoaoga, i le 1981, na toe iloiloina ai e Cooley taotoga o le fatu ma alatoto e 1,026, e 22 pasene na taotoga na faia i tamaiti laiti. Na ia mautinoa ai “o lamatiaga o taotoga i gasegase o Molimau a Ieova, sa leai lava se eseesega ma lamatiaga o taotoga o isi.”6 Na lipotia mai e Kambouris7 i taotoga tetele o Molimau, o nisi o i latou na latou “faafitia ni taotoga faatopetope na manaomia, talu ai lo latou teena o le tuigā toto.” Na fai mai a ia: “O gasegase uma lava na latou mauaina faamaoniga a o lei togafitia e faapea o o latou talitonuga faalotu o le a faaaloalogia e tusa lava po o ā ni tulaga o le a iai i totonu o potu o taotoga. Sa leai lava se āuga na aliali mai i lea fuafuaga.”

Pe afai o se gasegase o se Molimau a Ieova, e lē gata i le faia o le filifiliga, ae aofia ai foi le loto fuatia ifo. E lē mafai ona manatu se tasi tau o le loto fuatia ifo o le foma‘i. Ae faapefea le loto fuatia ifo o le gasegase? E  manatu Molimau a Ieova i le ola, o le meaalofa lea mai le Atua ua suitulaga mai ai le toto. Latou te talitonu i le poloaiga a le Tusi Paia e faapea e ao i Kerisiano ona “faamamao mai le toto” (Galuega 15:28, 29).8 O lea, pe afai e fai ma masani a se foma‘i lona solia o na talitonuga faalelotu maumaua‘i o gasegase ua leva ona talitonu i ai, e matautia lona iuga e oo i ai. Sa matauina foi e Pope Ioane II e faapea, o le faamalosia o se tasi na te solia lona loto fuatia ifo “o se ta sili lea ona tiga e taia ai le mamalu faaletagata. O se tasi o uiga, e sili atu le leaga nai lo le ta e oti ai le tino, po o le fasiotia.”9

A o teena la e Molimau a Ieova le toto ona o mafuaaga faalelotu, ua faapea ai ona toatele gasegase e lē ni Molimau ua latou filifili e aloese mai le toto ona o lamatiaga e pei o le AIDS, ate fefete o le ituaiga o le A ma le B, ma āuga o faiga tau puipuiga. E mafai ona tatou faapupula ia i latou a tatou vaaiga e tusa ai ma na lamatiaga, pe faamata e faatauvaa pe a faatusatusa i aogā. Peitai, e pei lava ona faasino mai e le American Medical Association, o le gasegase o le “tagata lava lea o le a filifilia pe na te talia le avanoa o le togafitiga, po o le taotoga ua fautuaina e le foma‘i po o le lamatiaga foi e ola ai pe a aunoa ma se togafiti e faia. O le aiā tatau faalenatura lena a le tagata, ua amanaia e le tulafono.”10

I le tali tutusa ma lenei itu, na aumaia ai e Macklin11 le mataupu e uiga i le fuafuaina o lamatiaga ma aogā e faatatau i se Molimau “o lē na tuu pea e alu lona toto ma na toetoe a maliu ai e aunoa ma se tuigā toto na faia.” Sa faapea mai se tagata a‘oga faafoma‘i: “Sa lelei pea lona mafaufau. O le ā sau mea e fai pe a tetee talitonuga faalelotu i se togafitiga e tasi lava e foia ai?” Sa fetuutuunai e Macklin e faapea: “Atonu tatou te talitonu a‘ia‘i o le tagata lea ua na faia se mea sese. Peitai, e talitonu Molimau a Ieova e faapea, pe a fai le tuigā toto . . . [e ono] iu i le faaumatiaga e faavavau. Ua a‘oa‘oina i tatou ina ia tatou faia se iloiloga i le va o lamatiaga ma aogā e maua mai i togafitiga faafoma‘i i vailaau, peitai, afai e te mafaufau i le faaumatiaga e faavavau ma faatusatusa atu i le tumau i le ola i luga o le lalolagi, ona aliali ai lea e ese le manatu o loo mafaufauina i le iloiloga.”11

Sa faasino atu e Vercillo ma Duprey12 i le finauga lena i le Journal i le In re Osborne e faatāuaina ai le naunau ina ia faamautinoaina le malupuipuia o tamaiti, peitai, pe sa faapefea ona faaiuina lenei mataupu? O le tulaga e faatatau i se tamā na matuā manu‘a leaga, o lē sa iai sana fanau laiti e toalua. Sa faia e le faamasinoga le faaiuga, pe afai e maliu o ia, ona tausia lea e ona tauaiga lana fanau i mea faitino ma le faaleagaga. O lea la, e pei ona sa iai i ni gasegase talu ai,13 na iloa ai e le faamasinoga, e leai se faamatalaga malosi e tausa‘oina ai se tulaga pulepule tutū e faia i le filifiliga a le gasegase e tusa ai o ona togafitiga; sa lē faamaonia foi le aiā ane a le faamasinoga ina ia faataga le faia o togafitiga sa sili ona tetee i ai le tamaloa.14 Ina ua faaaogā la isi togafitiga e sui ai le tuigā toto, sa toe faafoisia loa le malosi o le gasegase ma faaauau ai lana tausiga i lona aiga.

Pe lē moni ea, o le toatele lava o gasegase sa feagai ma foma‘i, pe foliga mai foi o le a latou faafeagai, e mafai lava ona togafitia e aunoa ma le toto? O mea ua tatou suesueina ma ua iloa lelei, o ni mea e fitoitonu i mataupu faafoma‘i, peitai, o gasegase foi latou o ni tagata soifua, o ē e iai a latou filifiliga tāua ma o latou sini e lē mafai ona lē amanaiaina. E sili atu lo latou iloa lelei o mea latou te faamuamuaina, o o latou lava tulaga tau amioga ma o latou loto fuatia ifo, lea e aumaia ai se faamoemoega o le olaga mo i latou.

O le faaaloalo la i loto fuatia ifo faalelotu o gasegase Molimau atonu e lu‘ia ai o tatou tomai. Peitai a o tatou faafetaiaia nei lu‘i, ua tatou faamamafaina ai sa‘olotoga tāua ia e faapelepeleina e i tatou uma. E pei ona tusia e John Stuart Mill: “So o se sosaiete lava e faapea mai e sa‘oloto, ae latou te lē o tuuina atu nei sa‘olotoga, o lona uiga e lē o se sosaiete o sa‘oloto moni lena, e tusa lava po o le ā lana faiga malo . . . O tagata uma lava taitoatasi ua avea ma leoleo talafeagai o lona lava soifua mālōlōina, pe i la le tino, po o le mafaufau ma le faaleagaga. E avea tagata o ni ē ua sili mea latou te maua, e ala i le faatagaina e le tasi o le isi e ola e tusa ai o mea o loo lelei ia i latou lava, nai lo le uunaia faamalosi o tagata taitoatasi e ola e tusa ai o mea o loo lelei i isi.”15

[NISI TUSI]

1. Appelbaum PS, Roth LH: Patients who refuse treatment in medical hospitals. JAMA 1983; 250:1296-1301.

2. Macklin R: The inner workings of an ethics committee: Latest battle over Jehovah’s Witnesses. Hastings Cent Rep 1988; 18(1):15-20.

3. Bouvia v Superior Court, 179 Cal App 3d 1127, 225 Cal Rptr 297 (1986); In re Brown, 478 So 2d 1033 (Miss 1985).

4. In re Storar, 438 NYS 2d 266, 273, 420 NE 2d 64, 71 (NY 1981).

5. Rivers v Katz, 504 NYS 2d 74, 80 n 6, 495 NE 2d 337, 343 n 6 (NY 1986).

6. Dixon JL, Smalley MG: Molimau a Ieova. Le tofotofoga i taotoga ma mataupu faavae tau amio. JAMA 1981; 246:2471-2472.

7. Kambouris AA: Major abdominal operations on Jehovah’s Witnesses. Am Surg 1987; 53:350-356.

8. Jehovah’s Witnesses and the Question of Blood. Brooklyn, NY, Watchtower Bible and Tract Society, 1977, pp 1-64.

9. Pope denounces Polish crackdown. NY Times, January 11, 1982, p A9.

10. Office of the General Counsel: Medicolegal Forms with Legal Analysis. Chicago, American Medical Association, 1973, p 24.

11. Kleiman D: Hospital philosopher confronts decisions of life. NY Times, January 23, 1984, pp B1, B3.

12. Vercillo AP, Duprey SV: Jehovah’s Witnesses and the transfusion of blood products. NY State J Med 1988; 88:493-494.

13. Wons v Public Health Trust, 500 So 2d 679 (Fla Dist Ct App) (1987); Randolph v City of New York, 117 AD 2d 44, 501 NYS 2d 837 (1986); Taft v Taft, 383 Mass 331, 446 NE 2d 395 (1983).

14. In re Osborne, 294 A 2d 372 (DC Ct App 1972).

15. Mill JS: On liberty, in Adler MJ (ed): Great Books of the Western World. Chicago, Encyclopaedia Britannica, Inc, 1952, vol 43, p 273.