Alu i mataupu o loo iai

Alu i le lisi o mataupu

Togafitiga Aogā e Sui ai Tuigā Toto

Togafitiga Aogā e Sui ai Tuigā Toto

 Togafitiga Aogā e Sui ai Tuigā Toto

Atonu e te mafaufau, ‘O tuigā toto e lamatia ai, peitai pe iai ea nisi togafitiga e sili atu ona aogā e sui ai?’ O se fesili lelei lea, ma mātau mai le upu “aogā.”

O tagata uma taitoatasi, e aofia ai ma Molimau a Ieova, e mananao i se tausiga faafoma‘i e sili ona aogā. Sa matauina e Dr. Grant E. Steffen mea autū e lua e fai ma ki: “O le tausiga faafoma‘i e sili ona aogā, o le mafai lea e tulaga o lena tausiga ona ausia ni sini i faiga faafoma‘i ma sini e lē faafoma‘i e tatau i ai.” (The Journal of the American Medical Association, Iulai 1, 1988) O “sini e lē faafoma‘i” o le a aofia ai le lē solia o faatulagaga o amioga tatau po o le loto fuatia ifo o lē ua gasegase e faavae i le Tusi Paia.—Galuega 15:28, 29.

Pe iai ni auala tatau ma aogā e faafoe ai faafitauli ogaoga faafoma‘i e aunoa ma le faaaogā o le toto? O se mea e faafiafia loto, auā o le tali o le ioe.

E ui ina faapea mai le toatele o foma‘i tipitipi e faapea, e na o le pau lava le taimi latou te tuiina ai le toto pe afai e matuā manaomia moni lava, ae ina ua mapuna a‘e le pepesi o le AIDS, sa vave tele ona faaitiitia lo latou faaaogaina o le toto. Sa faapea mai se faatonu i le Mayo Clinic Proceedings (Setema 1988), “o se tasi o aogā o le pepesi o le faama‘i” o le “iu ai i ni fuafuaga eseese a tagata mama‘i ma foma‘i ina ia alofia tuigā toto.” Ua faamatalaina e se ofisa o se fale suetoto e faapea: “O le mea ua suia, o le tāua o le feau, o le taliaina e foma‘i o loo galulue i le falema‘i o le feau (ona o se tulaga faateleina o le malamalamaga i lamatiaga), ma le pulunaunau e iloiloina isi togafitiga manaomia e sui ai.”—Transfusion Medicine Reviews, Oketopa 1989.

Mātau mai, o loo iai togafitiga manaomia e sui ai le toto! O le a oo ina malamalamagofie lenei itu pe a toe iloiloina le pogai e ala ai ona tui le toto.

O le hemoglobin (vaega faalanu mūmū) i sela mūmū, na te tauavea le okesene e manaomia mo le tino mālōlōina lelei ma le ola. O lea, afai e alu ese se vaega tele o le toto o se tagata, atonu o le a foliga mai e tatau lava ona toe faatumu atu. O le tulaga masani, pe tusa ma le 14 i le 15 kalama o le hemoglobin i totonu o le 100 kupita o senitimita taitasi uma o le toto. (O le isi fua o le malosi o le tele o iai o le hematocrit, e masani ona 45 pasene.) O le “tulafono” e masani ona taliaina, o le tuiina lea o le toto i se gasegase a o lei faia le taotoga pe a maualalo le hemoglobin i le 10 (po o le 30 pasene hematocrit). Sa lipotia mai e le mekasini o le Vox Sanguinis (Mati 1987) i Suisilani e faapea, e “65 pasene o [foma‘i o loo faamoeina ma‘i i vaigase (anesthesiologists)] ua latou manaomia tagata mama‘i ina ia oo atu le hemoglobin i le 10 gm/dl a o lei taooto mo o latou taotoga ua filifili i ai.”

Peitai, i se fonotaga i le 1988 e faatatau i tuigā toto, na fesili ai le polofesa o Howard L. Zauder, “Pe na Faapefea ona Tatou Mauaina Lenei ‘Numera Filifilia’?” Sa ia faamatala manino mai e faapea: “O le mafuaaga faasaienisi o le manaoga e faapea, e tatau ona iai le 10 kalama o le hemoglobin (Hgb) i se gasegase a o lei tuiina i ai se vaigase, ua fafau a‘e i uputuu, ua lē manino, ma e lē faamautuina e faamaoniga faafalema‘i ma suesuega ua faamaonia.” Manatu i le faitau afe o gasegase o o latou tuigā toto na pogai i se manaoga sa ‘lē manino, e lē faamautuina!’

Atonu o le a tau mānatu faapea nisi, ‘Pe aisea e avea ai pea le 14 ma fua masani o le hemoglobin, pe afai e mafai lava ona togafitia oe i se isi fua e maulalo teisi?’ Ioe, o loo iai pea lava se malosi tele e faaleoleo e tauaveina ai le okesene e te mafai ai ona nofo sauni mo le faia o se faamalositino po o se galuega mamafa. I suesuega o gasegase e lē lava le hemoglobin, na faaalia ai foi, “e faigata ona vailia mai se tulaga faapea e lē lava le malosi e galue ai pe a oo atu le hemoglobin e tusa le maulalo ma le  7 g/dl. Na maua e isi ni faamaoniga e faapea, sa na o ni nai tulaga faaletonu itiiti lava na iai.”—Contemporary Transfusion Practice, 1987.

A o mafai ona gafatia e tagata matutua se fua maualalo o le hemoglobin, peitai, e faapefea i tamaiti? Fai mai Dr. James A. Stockman III: “I le tele o taimi, o pepe e fananau lē au mai, o le a latou oo i se tulaga e pa‘ū ai i lalo le hemoglobin i le masina muamua e oo i le tolu masina . . . E lē o matuā faamaninoina lelei mai faailoga mo tuigā toto i totonu o faatulagaga o fale failele. O le mea moni, e toatele tama meamea e foliga mai latou te lavatia tulaga maulalo tele o le malosi o le hemoglobin e aunoa ma ni faigata faafoma‘i e aliali mai.”—Pediatric Clinics of North America, Fepuari 1986.

O na faamatalaga, e lē o lona uiga ua leai lava se mea e tatau ona fai pe afai ua alu se vaega tele o le toto o se tagata i se faalavelave faafuasei, po o le taimi o se taotoga. Afai e saoasaoa ma tele le toto e alu, o le a pa‘ū loa i lalo le gasologa masani o le fetafeai o le toto o se tagata, ma e mafai ona matapogia ai. O le mea autū lava e manaomia, o le taofia lea o le tafe mai o le toto, ma ia toe faatumuina le avanoa (volume) lea sa iai le toto i lona taamilosaga. O le a avea lena ma mea e puipuia mai ai le lē fegasoloai lelei o le toto, ma tumau ai ona gaoioi sela mūmū o loo totoe ma isi vaega o le toto i lana faataamilosaga.

O le toe faatumuina o le avanoa e mafai ona faataulauina e aunoa ma le faaaogā ai o le toto po o le vaega faasuavaia o le toto (plasma). * O vailaau eseese e lē ni toto, e aogā e faatumu atili ai le avanoa o le toto lea ua alu ese. O le vailaau e sili ona faigofie o le saline solution lea e lē taugata, ma e fetaui lelei ma o tatou toto. O loo iai foi suavai e iai o latou aogā faapitoa, e pei o le dextran, Haemaccel, ma le lactated Ringer’s solution. O le Hetastarch (HES) o se vailaau fou e faatumu ai avanoa sa iai le toto, ma e mafai “ona fautuaina ma le saogalemu mo i latou o ē e gasegase [i le mu] o ē e lē talia vaega o le toto.” (Journal of Burn Care & Rehabilitation, Ianuari/Fepuari 1989) O na vailaau e iai o latou aogā mautinoa. O Crystalloid solutions [e pei o le saline solution ma le lactated Ringer’s solution], o le Dextran ma le HES, e tutusa lelei lava, e lē oona ma e lē taugata, e mauagofie, e mafai ona teuina i se vevela e pei ona iai i le potu, e lē manaomia se suesuega e tau faafetaui ai, ma e lē maua ai i ni lamatiaga o faama‘i, ia e feaveai ona o tuigā toto.”—Blood Transfusion Therapy—A Physician’s Handbook, 1989.

E ui i lea, atonu e te fesili faapea, ‘Pe aisea e aogā ai vailaau e lē o ni toto ia e faatumu ai avanoa sa iai le toto, ae o loo o‘u manaomia sela mūmū e maua mai ai le okesene mo lo‘u tino atoa?’ E pei ona ta‘ua, o loo ia te oe le okesene faaleoleo o loo teuina i lou tino. Afai e alu ese lou toto, ona amata loa lea o se gaoioiga ofoofogia e toe sui a‘i le toto ua alu. E pamuina e lou fatu se vaega tele o le toto i taimi taitasi e tātā ai. Talu ai ona o le toto lea na alu ese ua toe suia e se vailaau faasuavaia e talafeagai, ua tafegofie ai nei la le toto ua suia e oo lava i alatoto laiti. Ona o suiga tau vailaau, ua tele ai le okesene e faamatuu atu i tisu (tissues) o le tino. O nei fetuutuunaiga e matuā aogā tele e tusa lava pe na o le ‘afa o ou sela mūmū o loo totoe, ae pe ā ma le 75 pasene o le okesene o loo tuuina atu pea e tai pei o le tulaga e masani ai. O se gasegase o loo mālōlō lelei, o loo ia faaaogaina na o le 25 pasene o le okesene o loo iai i lona toto. Ma o le tele o faiga o vaigase e masani ai, e faaitiitia ai le manaoga o le tino mo le okesene.

PE MAFAI FAAPEFEA ONA FESOASOANI FOMA‘I?

O foma‘i atamamai e mafai ona fesoasoani i se tasi ua alu lona toto ma ua faaitiitia ai sela mūmū. O le taimi lava e toe faatumu ai le avanoa lea sa iai le toto, ona mafai loa lea e foma‘i ona tuuina atu  i ai le okesene i se malosi e maualuga. O le a fai lenei ma mea e sili atu ai le okesene e maua pea mo le tino ma ua masani lava ona iai taunuuga e sili ona lelei. Sa faaaogaina e foma‘i i Peretania lea faiga i se fafine o lē na alu se vaega tele o lona toto ma faapea ona “pa‘ū ai le haemoglobin e oo atu i le 1.8 g/dlitre. Sa togafitia ma le manuia o ia . . . [i le] malosi ma le maualuga o le okesene e mānava ai ma le tuiina i ai o le tele o le gelatin solution [Haemaccel].” (Anaesthesia, Ianuari 1987) Na fai mai foi le lipoti e faapea, o isi sa matuā tele naua le toto na alu sa togafitia ma le manuia i totonu o masini hyperbaric oxygen chambers.

E mafai foi ona fesoasoani foma‘i i a latou tagata mama‘i ina ia faatupuina le tele o sela mūmū. E faapefea? I le tuuina atu lea ia i latou o ni mea na sauniunia o iai le iron (i musele po o alatoto), lea e mafai ona fesoasoani i le tino i le gaosiga o sela mūmū e faatolu pe faafā ona saoasaoa atu nai lo le tulaga e masani ai. Talu ai nei lava ua iai se isi fesoasoani e mafai ona maua. E saunia e ou fatugao ia se homone ua ta‘ua o le erythropoietin (EPO), na te uunaia le gaosiga o sela mūmū i mea lololo o ponaivi. O lenei la ua gaosia se vailaau (recombinant) e pei o le EPO. E mafai ona tuuina e foma‘i lenei vailaau i nisi ua gasegase i le totovaivai e fesoasoani ai ia i latou ia vave ona gaosia o latou sela mūmū.

E oo lava i taimi o taotoga, e mafai ona fesoasoani foma‘i tipitipi atamamai ma magafagafa, ma foma‘i popoto faapitoa i vaigase, e ala i le faaaogaina o faiga fou e sili ona lelei ina ia aua ne‘i alu ese le tele o le toto. O togafitiga faafoma‘i o taotoga e fai ma le faaeteete, e pei o le faamimigi o alatoto e faaitiitia ai le alu o le toto i se uamea e alu i le uila, ua matuā lē mafaatusalia lona aogā. O nisi taimi, o le toto e tafe atu i se manu‘a, e mafai ona mimiti ese, faamamā, ma toe faatafe sa‘o atu i le taamilosaga o le toto. *

O gasegase o loo faaaogā ai masini e sui ai le fatu ma le māmā e faaola muamua i se vailaau ae lē o se toto, e mafai ona maua ai aogā talu ai le faaitiitia o sela mūmū e maumau.

Ma e iai foi isi auala e fesoasoani ai. E faamālūlūina le tino o le gasegase ina ia faaitiitia ai ona manaoga tau okesene i le taimi e taoto ai. O le faapa‘ū maualalo o le toto e faagase ai (hypotensive anesthesia). O le togafiti e faaleleia ai le toto ina ia to‘a. O le vailaau o le Desmopressin (DDAVP) e faapuupuu ai le taimi e alu ai le toto. O “naifi” e ta‘ua o le laser.  O le a e vaaia le faaumiumi o le lisi a o taumafai foma‘i ma gasegase e manatunatu mamafa, ina ia alofia tuigā toto. Matou te faamoemoe o le a lē taitai ona maumau se vaega tele o lou toto. Ae afai e faapena, e lē taumate lava o le a mafai e foma‘i atamamai ona tauaaoina le tausiga o oe e aunoa ma le faaaogaina o tuigā toto, lea e tele naua ona lamatiaga o loo iai.

E TALIA TAOTOGA—AE IA AUNOA MA SE TUIGĀ TOTO

E toatele tagata i aso nei o le a latou lē taliaina le toto. Ona o mafuaaga tau soifua mālōlōina, latou te talosagaina ai le mea o loo muamua sailia e Molimau ona o mafuaaga tau tapuaiga: le tausiga faafoma‘i talafeagai o loo faafoeina i le faaaogaina o isi vailaau e sui ai le toto. E pei ona tatou matauina, o taotoga tetele o loo mafai pea lava ona fai. Pe afai o loo iai pea ni ou manatu faaletonu, atonu la o le a mafai ona foia e nisi o faamaoniga mai tusi faafoma‘i.

O le mataupu “Sa Suia Sooga o Ponaivi e Fa o se Tagata Molimau a Ieova” (Orthopaedic Review, Aokuso 1986), na ta‘ua ai se gasegase e totovaivai na “matuiā le faaleagaina o ona tulivae uma ma sooga o ona suilapalapa.” O le vailaau o le iron dextran sa faaaogā a o lei faia ma ina ua uma foi le taotoga sa faatulagaina, lea na faamanuiaina. Na lipotia mai e le British Journal of Anaesthesia (1982) se Molimau e 52 ona tausaga, o le fua o le hemoglobin, na i lalo ifo o le 10. O le faaaogaina la o le hypotensive anesthesia ina ia faaitiitia ai le toto e alu, na mafai ai ona toe suia atoa le ivi o lona suilapalapa ma lona tau‘au. O se vaega o foma‘i tipitipi i le Iunivesite o Arkansas (i le Iunaite Setete o Amerika), na latou faaaogaina foi lenei faiga i suiga o ivi o suilapalapa mo le to‘a selau Molimau, ma sa toe malolosi uma lava na gasegase. Sa faapea mai le polofesa e ulu i lea matagaluega: “O mea ua matou a‘oa‘oina mai na gasegase (o ni Molimau), ua matou faia nei i a matou ma‘i uma lava matou te suia o latou ivi suilapalapa.”

O le loto fuatia ifo o nisi Molimau e faatagaina ai i latou e talia le suiga o totoga pe a faia e aunoa ma le toto. Na fai se lipoti i le suiga o fatugao o tagata e to‘a 13 e faapea: “O le iuga aoao ua ta‘u mai ai, o le suiga o fatugao ua mafai ona faia ma le saogalemu ma ua aogā i le toatele o Molimau a Ieova.” (Transplantation, Iuni 1988) E faapena foi ona avea le teena o le toto ma itu e lē faalavelavea ai e oo lava i suiga faamanuiaina o le fatu.

Atonu o le a e tau mānatu, ‘Ae faapefea isi ituaiga o taotoga e faia e aunoa ma le toto?’ Na ta‘u mai e le Medical Hotline (Aperila ma Me 1983) e faatatau i taotoga o “Molimau a Ieova o ē sa faia taotoga faigata o gasegase e patino i fafine, taotoga o maitaga o tinā ma taotoga fanau o tinā [i le Iunivesite o le Setete o Wayne i le Iunaite Setete o Amerika] e aunoa ma ni tuigā toto.” Na lipotia mai e le tusi e faapea: “Sa lē sili atu ni oti ma ni tulaga lavelave i fafine o ē sa faia taotoga faapena ae lei faaaogaina ai le toto nai lo ē na taooto foi faapea, ae na tui i ai le toto.” Ona faapea mai lea o le tusi: “O iuga o lenei suesuega atonu ua lelei ona faia i ai se iloiloga fou e tusa ai ma le faaaogaina o le toto mo fafine uma o loo uia taotoga o gasegase patino i fafine, ma taotoga o maitaga o tinā ma taotoga fanau.”

I le falema‘i i le Iunivesite i Göttingen (i Siamani), e to‘a 30 gasegase o ē na teena le toto na faia taotoga e masani ai. “Sa leai ni faalavelave na tulai mai e ese mai faalavelave na tutupu i gasegase o ē na talia tuigā toto. . . . E lē tatau ona faamamafaina le lē taliaina o le toto, e lē tatau ona manatu faatauvaa i ai, ma e lē tatau foi ona faapogaia ai le lē faia o se taotoga ua manaomia ma se taotoga ua tatau ona fai.”—Risiko in der Chirurgie, 1987.

E oo foi i taotoga o fai‘ai e aunoa ma le faaaogaina o le toto na faia i le toatele o tagata matutua ma tamaiti, mo se faata‘ita‘iga, e pei ona iai i le Falema‘i Tutotonu i le Iunivesite i Niu Ioka. I le 1989, na tusi mai ai Dr. Joseph Ransohoff, o le ulu o taotoga o neura e faapea: “Ua matuā manino lava, i  le tele o tulaga faapenei, o le lē faaaogaina o vaega o le toto e mafai ona iu manuia, ma e itiiti se lamatiaga i gasegase o ē e iai a‘oa‘oga faalelotu e teena ai le faaaogaina o nei vaega o le toto, ae maise pe afai o le taotoga e mafai ona faia faavavevave ma le atamai. O le mea e mālie ai, e galo ia te au o le gasegase o se Molimau se‘iloga lava ua oo i le taimi ua te‘a ai ma le falema‘i, ae faafetai mai ia te au mo le faaaloalo i o latou talitonuga faalelotu.”

O le manatu mulimuli, pe mafai e taotoga faigata o le fatu ma alatoto ona faia e aunoa ma le toto i tagata matutua ma tamaiti? Sa avea Dr. Denton A. Cooley ma tagata muamua i le faia o lena lava mea. E pei ona mafai ona e iloa i le mataupu faafoma‘i na toe lomia i le Faaopoopoga, i le itulau e 27-29, sa faavae i se iloiloga na faia muamua, o le faaiuga a Dr. Cooley e faapea, “o le lamatiaga i taotoga i Molimau a Ieova, sa lē matuā maualuga naua i lo isi.” Ae nei la, ina ua uma ona fai le 1,106 o nei taotoga, na tusi mai o ia e faapea: “I tulaga uma lava taitasi, ou te faapea atu ai, o la‘u ioega po o le feagaiga ma gasegase ua tausisia pea,” o lona uiga e lē faaaogaina le toto.

Sa matauina e foma‘i o taotoga e faapea, o uiga lelei o se isi lea mea moni i Molimau a Ieova. Na tusia e Dr. Cooley ia Oketopa 1989 e faapea: “O uiga lelei o nei gasegase sa fai ma faaaoaoga lelei. E lē ia i latou le fefe e tusa i faigata e ono tulai mai, po o le fefe foi i le oti e pei ona iai i le toatele o gasegase. E ia i latou le faatuatua loloto ma le tutumau i lo latou talitonuga i lo latou Atua.”

E lē o le uiga o lenei mea e faapea, ua latou faailoa sa latou aiā tatau e filifili ai i le oti. Latou te matuā sailia ma le mataalia togafitiga e sili ona lelei auā latou te mananao ina ia maua le soifua laulelei. Ua latou talitonu o le usitaia o tulafono a le Atua e faatatau i le toto o se mea poto, o le vaaiga lea ua iai sana taa‘iga mautinoa i taotoga e lē faaaogaina ai le toto.

O le polofesa o Dr. V. Schlosser, i le falema‘i o taotoga i le Iunivesite o Freiburg (i Siamani), na ia matauina e faapea: “Ia i latou o lenei vaega o gasegase, o le tele o le alu o le toto a o faagasolo le taotoga sa lē maualuga; atonu sa itiiti lava ni lavelave na tutupu ai. O se vaaiga faapitoa i le ma‘i, e pei ona masani ai Molimau a Ieova, sa iai se taa‘iga mautinoa i taimi o le gasologa o taotoga.”—Herz Kreislauf, Aokuso 1987.

[Faaopoopoga i lalo]

^ pala. 12 E lē taliaina e Molimau tuigā o le toto atoa, o sela mūmū, sela papae, vaega e taulamua i le faato‘aina o le toto (platelets), po o le vaega faasuavai o le toto (plasma). Ae mo vaega laiti, e pei o le immune globulin (polotini e tetee ai i faama‘i), tagai i le Watchtower o Iuni 1, 1990, itulau 30-31.

^ pala. 17 Ua talanoaina e le Watchtower o Mati 1, 1989, itulau e 30-31, mataupu silisili faale-Tusi Paia e faatatau i faiga e toe faaaogā ai le toto ma i masini o loo faataamilo ai le toto i fafo o le tino (extracorporeal).

[Pusa i le itulau 13]

‘‘E tatau ona tatou ioe e faapea, i le taimi nei, e toatele gasegase ua latou mauaina ni vaega o le toto, ae e lē taitai iai se avanoa e maua ai se aogā mai tuigā toto, (e lē manaomia le toto) ae peitai, o loo iai pea lamatiaga mata‘ina o aafiaga lē manaomia. E leai se foma‘i na te tuuina atu ma lona iloa i se gasegase se togafitiga e lē mafai ona maua ai se fesoasoani, ae na ona mafatia ai, peitai o le mea tonu lena e tupu pe a tuiina le toto ma le faalētatau.”—“Transfusion-Transmitted Viral Diseases,” 1987.

[Pusa i le itulau 14]

‘‘O nisi tusitala ua latou faamatalaina mai e faapea, e ono mafai ona talia se vaega maulalo o le hemoglobin e tusa ma le 2 i le 2.5 gm./100ml. . . . O se tagata tino malosi atonu na te lavatia le 50 pasene o sela mūmū ua alu, ma toetoe lava leai se faailoga pe afai e alu le toto i sina taimi umi.”—“Techniques of Blood Transfusion,” 1982.

[Pusa i le itulau 15]“O manatu tuai e uiga i le feaveaiina o le okesene i tisu, faapepēina o manuʻa ma ‘aogā’ o le fafagaina o le toto, ua lē toe faaaogaina. O le poto masani sa maua ona o gasegase o Molimau a Ieova, ua faataʻitaʻia mai ai e faapea, o le tagata e matuā lē lava lona toto e mafai ona ia lavatia lea taotoga.”—“The Annals of Thoracic Surgery,” Mati 1989.

[Pusa i le itulau 16]

Ae ā tamaiti laiti? E “fa sefulu valu taualumaga o taotoga i fatu o tamaiti na faia e lē faaaogaina se toto e ui lava i lavelave i itu tau taotoga.” O tamaiti sa laiti e oo i le 10.3 pauna (4.7 kg). “Ona o le faamanuiaina pea lava pea i Molimau a Ieova ma le mea moni e faapea, e tauavea e le tuigā toto lamatiaga o lavelave matuiā, o lea o loo matou faia ai nei le tele o a matou taotoga tau i le fatu o tamaiti e aunoa ma le tuigā toto.”—“Circulation,” Setema 1984.

[Ata i le itulau 15]

Sa tele se fesoasoani a le masini e su‘i ai le fatu ma le māmā i taotoga o fatu i gasegase o ē e lē taliaina le toto