Alu i mataupu o loo iai

Alu i le lisi o mataupu

Le Toto e Faasaoina Moni ai Ola

Le Toto e Faasaoina Moni ai Ola

 Le Toto e Faasaoina Moni ai Ola

E iai manatu mautinoa ua manino mai i faamatalaga ua muamua atu. E ui ina toatele tagata e manatu i tuigā toto faapea e faasaoola, ae o tuigā toto e tumu i lamatiaga. E faitau afe i latou ua maliliu i tausaga taitasi ona o tuigā toto; e anoanoai ē ua mama‘i tigaina ma feagai ma āuga faaumiumi. O lea, e oo lava i le itu faaletino, o loo iai le atamai i le utagiaina o poloaiga a le Tusi Paia ina ia ‘taumamao mai le toto.’—Galuega 15:28, 29.

E puipuia gasegase mai lamatiaga e tele, pe afai latou te talia faiga faafoma‘i e lē faaaogaina ai le toto. O foma‘i atamamai o ē e taliaina le lu‘i o le faia o ia togafitiga i Molimau a Ieova, ua latou  atiina a‘e se faiga e saogalemu ma aogā, e pei lava ona faamaonia i le tele o lipoti faafoma‘i. O foma‘i o ē saunia tausiga lelei e aunoa ma le toto, latou te lē o faagutugutulua i mataupu silisili tāua faafoma‘i. Nai lo lena, ua latou faaalia le faaaloalo mo aiā tatau a se gasegase, ia iloa lamatiaga ma aogā, ona faato‘ā fai ai lea o se faaiuga aloaia i mea o le a fai i lona tino ma le ola.

Matou te lē o nonofo pogisa i lenei mea, auā ua matou iloa e lē talia e tagata uma lenei faiga. E eseese tagata i o latou loto fuatia ifo, o a latou aiā tatau tau filifiliga, ma o latou vaaiga faafoma‘i. O lea, o isi e aofia ai nisi foma‘i, atonu o le a faigata ona taliaina se filifiliga a se gasegase ina ia taumamao mai le toto. Na tusi mai se tasi foma‘i o taotoga i Niu Ioka e faapea: “O le a lē mafai ona ou faagaloina le 15 tausaga ua alu, o a‘u o se talavou faato‘ā iu a‘u a‘oa‘oga ma faata‘ita‘iga faafoma‘i i le iunivesite, a o o‘u tu i tafatafa o le moega o se Molimau a Ieova o lē na alu le palapala mai le pitoputa (duodenal ulcer) seia oo lava ina oti ai. Sa talia le manaoga o le gasegase ma sa leai se tuigā toto na faia i ai, peitai o loo o‘u manatuaina pea lo‘u loto tiga tele ona o lo‘u tulaga faafoma‘i.”

E leai se faaletonu sa talitonu o ia, o le toto na semanū e faasaoina ai le ola. Peitai, o le tausaga na sosoo ai talu ona ia tusi lena mea, sa lipotia mai e le British Journal of Surgery (Oketopa 1986) e faapea, a o lei oo ina a‘e mai le faaaogaina o tuigā toto, “sa na o le 2.5 pasene le saoasaoa o le faatatau o ē na maliliu ai” ona o le alu o le toto mai le gaau (gastrointestinal hemorrhage). Talu ona avea tuigā toto ma faiga masani i lenei vaitaimi, ‘o le tele lava o suesuega tetele ua lipotia mai ai e 10 pasene o le faitau aofai o ē maliliu.’ Aisea ua faafāina ai le faatatau maualuga o ē maliliu? Sa fautuaina mai e ē suesue e faapea: “O le vave faia o se tuigā toto, e foliga mai o le a toe suia ai le tulaga masani ia to‘a le toto pe a alu le palapala ma lē alu tele ai le palapala.” O lea la, pe a teena le toto e se Molimau o loo ulu le palapala i se matapalapala o le puta (bleeding ulcer), atonu o lana filifiliga na faateleina ai lona avanoa mo le faasaoina.

Sa faaopoopo mai lenei lava foma‘i o taotoga e faapea: “A o faagasolo le taimi ma le togafitiga o le tele o gasegase, e tauau ina suia ai le vaaiga faalemafaufau a se tasi, ma o aso nei ua ou mauaina, o le fetalitonuai i le va o le gasegase ma lana foma‘i, ma le tiute e faaaloalo ai i se manaoga o se gasegase, e sili mamao atu lona tāua nai lo le faiga fou faafoma‘i ua siomia ai i tatou. . . . O se mea faatupu naunau ona o le lagona atuatuvale ua suia nei i se lagona o le āva ma le migao mo le faatuatua mausalī o lena gasegase.” Na faaiu mai le faamatalaga a le foma‘i: ‘Ua faamanatu mai ai ia te au, e ao ona ou faaaloalo pea i manaoga totino ma manaoga faalelotu o le gasegase, e tusa lava po o ā o‘u faalogona po o le mea foi e tupu mai ai.’

Atonu pe ua e iloa se mea ua oo ina talisapaia e le toatele o foma‘i “a o faagasolo le taimi ma le togafitiga o le tele o gasegase.” E oo lava i tausiga sili faafoma‘i i falema‘i e sili ona lelei, e iai lava taimi e maliliu ai tagata. Pe tui le toto po o le lē tuiina, latou te maliliu uma lava. Ua tatou faasolo atu uma lava ina matutua ma aga‘i atu ai ina fetaiai ma le oti. E lē o se talafatu. O le mea moni. O le oti o se mea o loo tupu moni i le olaga.

Ua faaalia e mea moni e faapea, o tagata o ē e lē amanaia le tulafono a le Atua i le toto, e masani ona vave oo ia i latou āuga faaletonu po o le tupu mulimuli ane i se taimi; o nisi e maliliu ona  o tuigā toto. E oo lava ia i latou o ē faasaoina latou te lē ola ai pea e faavavau. O lea la, o tuigā toto e lē tumau ona faasaoina ai e faavavau le ola.

O le toatele o tagata, ona o mafuaaga faalelotu pe faafoma‘i foi, latou te teena ai le toto; peitai ane, latou te taliaina isi togafitiga faafoma‘i ma o loo solosolo lelei pea i latou. Atonu o le a mafai ona faaumiumi ai o latou ola mo ni tausaga. Ae peitai, e lē ola ai pea e faavavau.

O tagata uma e lē lelei atoatoa ma e faifai mālie ona oo ina maliliu, ma ta‘ita‘iina atu ai i tatou i le upu moni autū ua fai mai ai le Tusi Paia e uiga i le toto. Afai tatou te malamalama ma talisapaia lenei upu moni, o le a tatou vaai i le auala e mafai ai e le toto ona faasaoina moni ola—o lo tatou ola—e faavavau.

UA NA O LE PAU LEA O LE TOTO E FAASAOINA AI OLA

E pei ona matauina muamua, na fetalai le Atua i tagata e lē tatau ona latou aai i le toto. Aisea? Auā o le toto o le sui o le ola. (Kenese 9:3-6) Sa ia faamatala atili lenei mea i le Tulafono na tuuina ia Isaraelu. I le taimi na aloaia ai le Tulafono, o le toto o manu na osi ai taulaga, sa faaaogā i luga o se fata faitaulaga. (Esoto 24:3-8) O Tulafono i lena tusi na ta‘ua ai le mea moni e faapea, o tagata uma e lē lelei atoatoa; ua tumu i latou i le agasala, e pei ona faaupu mai e le Tusi Paia. Na fetalai le Atua i le fanauga a Isaraelu, e ala i taulaga na osia i manu na ofoina atu ia te ia, sa latou iloa lelei ai le manaoga mo le faamamāina o a latou agasala. (Levitiko 4:4-7, 13-18, 22-30) E moni, o le mea lena sa manaomia mai ia i latou e le Atua i lena taimi, ae lē o le mea lena ua ia finagalo ai mai tagata tapuai moni i aso nei. Peitai, e iai lona tāua mo i tatou i aso nei.

 O le Atua lava ia na faamatalaina le mataupu silisili e autū i ai na taulaga e faapea: “Auā o i le toto le ola o le tino; ua ou tuuina atu ai foi ia te outou e fai a‘i le togiola mo outou i luga o le fata faitaulaga, auā o le toto o le mea lava lea e fai a‘i le togiola mo le tagata. O le mea lava lea na ou fai atu ai i le fanauga a Isaraelu, Aua le ‘aina ni toto e so outou.”—Levitiko 17:11, 12.

I le tausamiga anamua sa ta‘ua o le Aso o le Togiola, sa ave ai e le ositaulaga sili o Isaraelu le toto o manu sa fai ai le taulaga i totonu o le vaega o le mea e sili ona paia o le malumalu, le vaega autū o le tapuaiga a le Atua. O le faia o lena mea o se auala faafaatusa lena o le talosaga atu i le Atua ina ia faamamāina agasala a tagata. (Levitiko 16:3-6, 11-16) O na taulaga sa lē aveesea ai agasala uma, o lea sa tatau ona faia pea lava pea i tausaga taitasi. O loo iai pea i lea faaaogaina o le toto se ata uigā na faatulagaina.

O le a‘oa‘oga autū i le Tusi Paia e faapea, e mulimuli ane, ona saunia ai lea e le Atua se taulaga lelei atoatoa e tasi, lea o le a mafai ai ona togiolaina atoatoa agasala a tagata talitonu uma lava. Ua ta‘ua lea o le togiola, ma sa taulai atu i le taulaga a le Mesia po o le Keriso na uluai folafolaina.

Ua faatusatusa e le Tusi Paia le tulaga a le Mesia i le mea sa faia i le Aso o le Togiola: “A o Keriso ua maliu mai, o le faitaulaga sili i mea lelei atali, ua ui ane i le fale fetafai e sili ona lelei ma ona atoatoa, e le faia e lima, . . . ona ulu faatasi lava lea o ia i totonu o le mea paia, e le ma le toto o ‘oti ma tamai povi, a o lona lava toto, ua na maua le togiola e faavavau mo i tatou. Na toe ina uma foi o mea uma ona faamamāina i le toto e tusa ma le tulafono; a le o i ai foi se faamaligiina o le toto, ua leai foi se faamagaloina.”—Eperu 9:11, 12, 22.

O lea la, ua oo ina manino mai pe aisea tatou te manaomia ai ona maua le silafaga a le Atua i le toto. E tusa ai ma le aiā tatau a Lē na Foafoaina Mea, na ia filifilia lava lona aogā tutasi. O tagata Isaraelu o aso anamua, atonu sa latou seleseleina aogā o le soifua lelei ona o lo latou lē ‘aiina o le toto o manu po o tagata, peitai ane, sa lē o le mea tāua lena. (Isaia 48:17) Sa tatau ona aua ne‘i faatumauina o latou ola e ala i le faaaogaina o le toto, e lē ona e mama‘i ai, peitai, ona o lea faiga o se mea sa lē paia i le Atua. Sa tatau ona latou taumamao mai le toto, e lē ona ua faaleagaina, ae ona o lona tāua tele i le mauaina o le faamagaloga.

O le aposetolo o Paulo na ia faamatalaina e uiga i le togiola e faapea: “O ia [Keriso] foi ua tatou maua ai le togiola i lona toto o le faamagaloina o agasala, e tusa ma le oloa faulai o lona alofa tunoa.” (Efeso 1:7) O le uluai upu Eleni o loo maua i inā, ua faaliliu sa‘o i le “toto,” peitai i le tele o faaliliuga o isi Tusi Paia, ua sese i le suitulaga ai o le upu “oti” mo le “toto.” O lea atonu o le a misia e tagata faitau le faamamafaga i le silafaga a Lē na Foafoaina Mea i le toto ma lona aogā faatogiola ua ia faafesootaia i ai.

O le matua o le Tusi Paia ua faaautū i lena mea moni e faapea, na maliu Keriso o se togiola lelei atoatoa, peitai ane, sa lē tumau ai i le oti. I le mulimuli i le faavae na faataatia e le Atua i le Aso o le Togiola, na toe faatūina ai Iesu i le lagi “ina ia iloa ai nei o ia i luma o le Atua mo i tatou.” Na ia tuuina atu ai i inā le aogā o lona toto faataulagaina. (Eperu 9:24) Ua faamamafa e le Tusi Paia e faapea, ia tatou aloese i so o se laasaga e ono avea ma mea e ‘soli ai le Alo o le Atua ma lē faapaiaina ai lona toto.’ Ua na o lena le auala e mafai ai ona tatou tausia se faiā lelei ma le filemu ma le Atua.—Eperu 10:29; Kolose 1:20.

OLIOLI I LE OLA UA FAASAOINA E ALA I LE TOTO

Pe a oo ina tatou malamalama i le mea ua fetalai mai ai le Atua e uiga i le toto, ona tatou matuā faaaloalo ai lea i lona aogā faasaoola. Ua faamatala e le Tusi Paia Keriso e faapea, o lē na “alofa mai ia te i tatou, na ia laveai mai foi ia te i tatou i a tatou agasala i lona lava toto.” (Faaaliga 1:5;  Ioane 3:16) Ioe, e ala i le toto o Iesu, e mafai ai ona tatou maua atoatoa le faamagaloga tumau o a tatou agasala. Na tusi mai le aposetolo o Paulo e faapea: “Ua ta‘uamiotonuina nei i tatou i lona toto, e le faaolaina ea i tatou e ia ai le toasa i se a?” O le auala lena e faasaoina ai e le toto le ola e tumau pea.—Roma 5:9; Eperu 9:14.

Ua leva ona aumaia ai e Ieova le Atua faamautinoaga e faapea, e ala ia Keriso, ‘o le a manuia ai aiga uma i le lalolagi.’ (Kenese 22:18) O na faamanuiaga e aofia ai le toe faafoisiaina mai o le laueleele i se parataiso. O tagata talitonu o le a lē toe taia i faama‘i, le olaga matua, ma oo ai i le oti; o le a latou olioli i faamanuiaga e sili mamao atu nai lo le fesoasoani lē tumau e mafai ona ofoina mai ia i tatou e tagata galulue faafoma‘i. Ua ia i tatou lenei folafolaga ofoofogia e faapea: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:4.

O lea la, maeu le atamai mo i tatou ona aveina i fale o mea uma e manaomia e le Atua! E aofia i lena le usiusitai i ana poloaiga e uiga i le toto, ia aua ne‘i faaaogaseseina e tusa lava po o tulaga faafoma‘i. Ona tatou lē ola lea mo na o sina taimi. Nai lo lena, o le a tatou faaalia lo tatou manatu maualuga mo le ola, e aofia ai o tatou faamoemoega i le lumanai i le ola e faavavau i le ola lelei atoatoa faaletagata.

[Pusa i le itulau 25]

Sa teena e tagata o le Atua le faatumauina o o latou ola i le faaaogaina ai o le toto, e lē faapea ona e lē o maloloina, peitai ane, ona sa lē paia, e lē faapea ona ua lē mamā le toto, peitai, ona sa sili ona tautele.

[Ata i le itulau 24]

“O ia [Iesu] foi ua tatou maua ai le togiola i lona toto, o le faamagaloina o agasala.”—Efeso 1:7

[Ata i le itulau 26]

O le faasaoina o le ola i le toto o Iesu, ua avanoa ai le ala i le ola mālōlōina e lē uma i le parataiso i le lalolagi