Skip to content

Skip to table of contents

 MATAUPU 2

Se Tusi Mai se Atua Alofa

Se Tusi Mai se Atua Alofa

SEʻI taʻu mai iā te aʻu, o le ā le tusi e sili ona e fiafia i ai?— O isi tamaiti e fiafia i tusi i manu. O isi tamaiti e fiafia i tusi e tele ai ata. O le manaia ia o le faitau i na tusi.

O tusi e pito i sili lava i le lalolagi lenei, o tusi ia e iai tala moni e uiga i le Atua. E iai se tasi o nei tusi e sili atu lona tāua, na i lo isi tusi uma e uiga i le Atua. E te iloa le tusi lenā?— O le Tusi Paia.

Aiseā e tāua tele ai le Tusi Paia?— Talu ai o se tusi mai le Atua. Ua taʻu mai e le Tusi Paia tala e uiga i le Atua, ma mea lelei o le a ia faia mo i tatou. Ua taʻu mai ai foʻi mea e tatau ona tatou fai e faafiafia ai le Atua. O le Tusi Paia, ua pei o se tusi mai le Atua.

Sa ono mafai lava e le Atua ona tusi le Tusi Paia i le lagi, ona aumai ai lea i tagata. Ae e lē o le mea lenā na fai e le Atua. E ui lava o manatu o le Atua o loo i le Tusi Paia atoa, ae na ia faaaogāina ana auauna i le lalolagi e tusiaina toetoe lava o le Tusi Paia atoa.

O le ā le auala na fai ai e le Atua lenā mea?— Ina ia malamalama i le tali, seʻi mafaufau i le mea lenei. Afai tatou te faalogo i se leo i le leitiō, o le leo lenā o se tagata atonu e mamao le mea o iai. Pe a tatou matamata i le televise, e mafai ona tatou vāai ai i ata o tagata e oo lava i tagata i isi atunuu o le lalolagi, ma faalogo atu i a latou tala.

E mafai foʻi e tagata ona ō atu i le masina i vaa o le vateatea, ma toe auina mai ai ni feʻau i tagata i le lalolagi. Na e iloaina lenā mea?— Afai e mafai e tagata ona fai le mea lenā, pe mafai la e le Atua ona auina mai ni feʻau mai le lagi?— Ioe, e mafai! O lana mea lenā na fai i se taimi ua leva lava, a o leʻi taitai maua ni leitiō po o ni televise.

E iloa faapefea e mafai ona fetalai mai le Atua iā i tatou i se mea mamao?

 Na faalogo Mose i le Atua i le taimi na fetalai mai ai. E leʻi iloa atu e Mose le Atua, ae na mafai ona lagona atu le leo o le Atua. E toʻatele tagata na iai i le taimi na tupu ai lenā mea. I le aso lava lenā, na lūlū ai e le Atua le mauga ma na pāpā ai foʻi faititili ma emo uila. Na iloa e tagata ua fetalai mai le Atua, ma na latou fefefe ai. O lea, na fai atu ai tagata iā Mose: “Aua le fetalai mai le Atua iā te i matou, neʻi matou oti.” Mulimuli ane, na tusia e Mose tala na faia e le Atua. E maua i le Tusi Paia le tala na tusia e Mose.​—Esoto 20:18-21.

Na tusia e Mose tusi muamua e lima o le Tusi Paia. Ae na iai foʻi isi tagata na tusia isi tusi o le Tusi Paia. Na faaaogā e le Atua pe tusa ma le 40 ni tagata, e tusiaina tusi o le Tusi Paia. Na ola nei tagata i  le tele o tausaga ua mavae, ma e tele foʻi tausaga na alu i le tusiaina o le Tusi Paia atoa. Ioe, pe tusa o le 1,600 tausaga le umi na tusia ai! O le mea e ofo ai, e leʻi feiloaʻi muamua nisi o nei tamāloloa na tusiaina le Tusi Paia, ae e tutusa uma o latou manatu o loo iai.

O ai igoa o tusitala nei o le Tusi Paia?

Na lauiloa nisi o tagata na faaaogāina e le Atua e tusia le Tusi Paia. Sa avea muamua Mose o se leoleo mamoe, ae mulimuli ane avea ma taʻitaʻi o le nuu o Isaraelu. Sa avea Solomona o se tupu, ma o se tagata e sili ona atamai ma le mauoloa i le lalolagi. Ae peitaʻi, e lē lauiloa faapena isi tamāloloa. Sa leoleo e Amosa se faatoʻaga na totō ai le laau e taʻua o le mati.

E lē gata i lea, o le isi tusitala o le Tusi Paia, o se fomaʻi. E te iloa lona igoa?— O Luka. O le isi tusitala, na avea muamua o se aolafoga. O lona igoa o Mataio. O le isi tusitala o se lōia, ma e ese le poto i tulafono faalotu a Iutaia. E pito i tele lava tusi o le Tusi Paia na tusia e le tusitala lenei. E te iloa lona igoa?— O Paulo. Na tusia foʻi e soo o Iesu, o Peteru ma Ioane isi tusi o le Tusi Paia, ma na avea muamua i laʻua o ni tagata faifaiva.

O le tele o nei tusitala o le Tusi Paia, na latou tusia mea o le a faia e le Atua i le lumanaʻi. Na faapefea ona latou iloa nei mea, ae e leʻi oo i le taimi e faataunuu ai?— Na faailoa mai e le Atua iā i latou. Na taʻu mai e le Atua iā i latou mea o le a tutupu i le lumanaʻi.

I le taimi na soifua ai Iesu i le lalolagi, ua uma ona tusia le tele o tusi o le Tusi Paia. Ia manatua foʻi, na soifua muamua le Faiaʻoga Sili i lugā i le lagi. Na silafia e Iesu mea na faia e le Atua. Pe na talitonu Iesu o le Tusi Paia e mai i le Atua?— Ioe.

A o taʻu atu e Iesu galuega a le Atua i tagata, na ia faitau mai i le Tusi Paia. I nisi o taimi, na taʻu atu ai e Iesu mea na ia manatuaina, mai le Tusi Paia. Ua aumaia foʻi e Iesu mo i tatou isi faamatalaga e uiga i le Atua. Na faapea mai Iesu: “O mea ua ou faalogo ai iā te ia,  o mea ia ou te fai atu ai i le lalolagi.” (Ioane 8:26) E tele mea na iloa e Iesu i lona faalogo atu i le Atua, auā na la nonofo faatasi. O fea e mafai ona faitau ai i mea na fai mai ai Iesu?— I le Tusi Paia. Ua tusia i se tusi ina ia tatou faitau i ai.

I le taimi na faaaogā ai e le Atua tagata e tusiaina le Tusi Paia, na latou tusia i gagana na malamalama ai tagata. O lea la, na tusia le tele o tusi o le Tusi Paia i le gagana Eperu, o isi tusi na tusia i le gagana Arama, ma o le tele foʻi o tusi na tusia i le gagana Eleni. Talu ai o le tele o tagata i aso nei ua lē o toe malamalama i na gagana, o lea ua faaliliu ai le Tusi Paia i isi gagana. I aso nei, ua silia i le 2,260 gagana ua faaliliu ai vaega o le Tusi Paia. Oka le tele o gagana, a ea! O le Tusi Paia, o le tusi lenā a le Atua mo tagata uma lava. E ui i le tele o taimi na fai ai kopi o le Tusi Paia, ae o le feʻau o iai e mai le Atua.

 O mea ua fai mai ai le Tusi Paia, e tāua mo i tatou. Ua leva ona tusia. Ae ua faamatala e le Tusi Paia mea o loo tutupu i aso nei. Ua taʻu mai ai foʻi mea o le a faia e le Atua i le lumanaʻi. O le manaia ia o tala na! Ua tatou maua ai foʻi se faamoemoe matagofie.

O ā mea e mafai ona e iloa mai le faitauina o le Tusi Paia?

Ua taʻu mai foʻi e le Tusi Paia, le auala e finagalo le Atua tatou te ola ai. Ua taʻu mai ai mea e saʻo ma mea e sesē. E tatau ona tatou iloa mea na. Ua taʻu mai ai tagata na faia mea leaga ma mea na oo iā i latou, ina ia tatou lē faia ai mea leaga na. O loo faamatala ai foʻi tagata na faia mea lelei, ma iʻuga lelei na oo iā i latou. O na tala uma, na tusia mo lo tatou lelei.

Ae, ina ia tatou maua aogā mai le Tusi Paia, e manaʻomia ona tatou iloa le tali i se fesili. O le fesili lenei: O fea na tatou maua mai ai le Tusi Paia? O le ā sau tali?— Ioe, o le Tusi Paia atoa e mai le Atua. O le ā la le auala e faaalia ai o i tatou o ni tamaiti popoto?— E ala i lo tatou faalogo atu i le Atua ma usitai i mea ua fetalai mai ai.

E tatau ona iai se taimi e tatou te faitau faatasi ai le Tusi Paia. Pe a maua se tusi mai se tagata tatou te alolofa lava i ai, tatou te faitau i lenā tusi i le tele o taimi. E tāua lenā tusi iā i tatou. E tatau la ona tāua le Tusi Paia iā i tatou, auā o se tusi mai Lē e pito i alofa lava iā i tatou. O se tusi mai se Atua alofa.

Seʻi faitau fuaiupu o le Tusi Paia e faaalia ai o le Tusi Paia o se tusi mai le Atua, ma na tusia mo lo tatou lelei: Roma 15:4; 2 Timoteo 3:16, 17; ma le 2 Peteru 1:20, 21.