Skip to content

Skip to table of contents

 MATAUPU 9

E Manaʻomia Ona Tatou Tetee Atu i Faaosoosoga

E Manaʻomia Ona Tatou Tetee Atu i Faaosoosoga

SA IAI ea se taimi na fai atu ai se tasi e te faia se mea sesē?— Pe na ia faaosoosoina oe e te faia le mea lenā? Pe na fai atu o se mea e fiafia ai, ma e lē o se mea e leaga tele?— A fai mai e se tasi ni tala faapena iā i tatou, o lona uiga ua faaosoosoina i tatou e le tagata lenā.

O le ā se mea tatou te faia pe afai e faaosoosoina i tatou? Pe tatou te lolo atu i faaosoosoga na, ma fai ai le mea sesē?— O le a lē fiafia Ieova i le mea lenā. Ae e te iloa o ai o le a fiafia ai?— Ioe, o le a fiafia ai Satani le Tiapolo.

O Satani o le fili o le Atua, ma o ia foʻi o lo tatou fili. E lē mafai ona tatou vaai iā Satani, auā o ia o se agaga. Ae e mafai ona vaai mai Satani iā i tatou. I se tasi aso, na talanoa ai le Tiapolo ma Iesu le Faiaʻoga Sili, ma na taumafai e faaosooso iā Iesu. Seʻi o tatou vaai la po o le ā le mea na fai e Iesu. Ona iloa ai lea o le mea saʻo e tatou te faia, pe a faaosoosoina i tatou.

O le ā atonu na amata ona manatua e Iesu i le taimi na papatiso ai?

E manaʻo Iesu e fai le finagalo o le Atua i taimi uma. Na manaʻo Iesu e iloa uma e tagata le mea lenā, ma o le māfuaaga lea na papatiso ai i le vaitafe o Ioritana. O le taimi lava na faatoʻā uma ona papatiso ai Iesu, na faaosooso ai loa e Satani. Ua faapea mai le Tusi Paia “ua faaavanoaina le lagi” iā Iesu. (Mataio 3:16)  Atonu o le uiga o le mea lenei, na amata ona toe manatua e Iesu le taimi na iai i le lagi ma le Atua.

Ina ua uma lona papatisoga, na alu ai Iesu i le vaomatua e manatunatu loloto ai i mea na amata ona ia toe manatua. E 40 aso na iai i inā. E leai ma se mea na taumafa e Iesu i le taimi atoa lenā, ma o le taimi lea ua fia taumafa lava. O le taimi lenā na taumafai ai loa Satani e faaosooso Iesu.

Na faapefea ona faaaogā e le Tiapolo ni maa, e faaosooso ai Iesu?

Na fai atu Satani: ʻAfai o oe o le Alo o le Atua, inā fai atu i maa e liu falaoa.’ Ioe, e tatou te fiafia uma lava e aai i le falaoa. Ae faamata na ono mafai ona liua e Iesu maa i falaoa?— Ioe, e mafai. Aiseā? Auā sa iā Iesu, le Alo o le Atua, se mana faapitoa.

Pe e te liua se maa e avea ma falaoa, pe ana fai atu le Tiapolo iā te oe e fai?— Na fia taumafa Iesu. Pe e lē o se mea saʻo le liua o se maa, tau lava o sina taimi seʻi ʻai ai?— Na silafia e Iesu, e sesē pe a faaaogā lona mana i se auala faapena. Na ave e le Atua le mana iā Iesu e fesoasoani ai i tagata ia latou iloa lelei le Atua, na i lo le faamalie ai o Iesu.

O lea la, na faapea atu Iesu iā Satani e pei ona tusia i le Tusi Paia: ʻE lē na o mea e ʻai e ola ai le tagata, a o upu uma lava ua fetalai mai ai le Atua.’ Na silafia e Iesu, e sili atu le tāua o le faafiafiaina o Ieova na i lo le maua o sana mea taumafa.

 Ae na toe taumafai foʻi le Tiapolo. Na ave e le Tiapolo Iesu i se vaega maualuga lava o le malumalu i Ierusalema. Ona fai lea o Satani iā Iesu: ʻAfai o oe o le Alo o le Atua, oso ia i lalō. Auā ua tusia, e laveaʻi oe e agelu a le Atua, e te lē lavea ai.’

Aiseā na fai ai e Satani lenei tala?— Na ia fai atu faapena ina ia faaosooso ai Iesu e fai se mea valea. Ae e leʻi faalogo Iesu iā Satani. Na faapea atu Iesu iā Satani: “Ua tusia, . . . Aua e te tofotofo i le Alii lou Atua.” Na silafia e Iesu, e sesē pe a tofotofo iā Ieova e ala i lona oso ifo i lalo mai le malumalu.

Peitaʻi, e leʻi faavaivai ai le Tiapolo. Na sosoo ai ma le ave e Satani o Iesu i luga o se mauga maualuga. I inā, na faaali atu ai e Satani malo uma o le lalolagi ma o latou mamalu, iā Iesu. Ona fai atu lea o Satani iā Iesu: “Ou te avatua nei mea uma iā te oe, pe afai e te faapaʻū ma ifo mai iā te aʻu.”

Seʻi mafaufau i le folafolaga a le Tiapolo. Pe sa pule ea Satani i malo uma nei?— E leʻi faapea atu Iesu e lē pule Satani i malo nei. Semanū e fai atu i ai pe ana faapea e lē pule ai Satani. Ioe, o Satani o le pule moni lava o malo o le lalolagi. Ua taʻua Satani e le Tusi Paia o “le alii o lenei lalolagi.”​—Ioane 12:31.

Aiseā na mafai ai ona ofo e Satani malo uma nei iā Iesu?

O le ā lau mea e fai pe ana folafola atu e le Tiapolo e maua sau meaalofa pe a e ifo atu iā te ia?— Na silafia e Iesu, e sesē le ifo atu i le Tiapolo e tusa lava po o le ā lana mea e maua ai. O lea na fetalai atu ai Iesu: ʻInā alu ese ia oe Satani! Auā ua tusia i le Tusi Paia, e te ifo atu i le Alii lou Atua, ua na o ia lava e te auauna i ai.’​—Mataio 4:1-10; Luka 4:1-13.

O le ā se mea e te faia pe a faaosoosoina oe?

E oo foʻi faaosoosoga iā i tatou. E te iloa nisi o na faaosoosoga?— O se faataʻitaʻiga lenei. Atonu ua fai e lou tinā se keke po o se pai manaia lava. E ono fai atu lou tinā e faasā ona e ʻai ai seʻi oo i le taimi e aai ai le aiga. Ae ua mole lava lou manava, ma ua oso lou fia  ʻai. Po o le a e usitai ea i lou tinā?— E manaʻo Satani ia aua neʻi e faalogo i lou tinā.

Ia manatua Iesu. Na oso foʻi lona fia ʻai. Ae na silafia e Iesu, e sili atu le tāua o le faafiafiaina o le Atua na i lo le ʻai. Afai e te usitai i le mea ua fai mai ai lou tinā, ua e faaalia ai e pei oe o Iesu.

Atonu e fai atu ni tamaiti e te tago e folo ni fualaau. E ono faapea atu e matuā uiga ese ou faalogona pe a e tofo i nei fualaau. Ae atonu o  nei fualaau, o ni fualaau faasāina, ma e mafai ona e matuā maʻi ai, pe e te oti ai foʻi. Pe avatu foʻi e se isi se sikaleti, lea e iai foʻi se vailaau malosi, ma faaosooso oe e te ulaina. O le ā lau mea e fai?—

Ia manatua Iesu. Na fai atu Satani iā Iesu e aua le popole fua i lona ola, ae oso ifo i lalo mai le malumalu. Ae e leʻi faalogo i ai Iesu. Ae ā pe a faaosooso oe e se tagata, e te tago e fai se mea e afāina ai lou ola?— E leʻi faalogo Iesu iā Satani. E lē tatau foʻi la ona e faalogo i se tasi e taumafai e faamalosia oe e faia ni mea sesē.

Aiseā e sesē ai le faaaogāina o faatusa i la tatou tapuaʻiga?

E ono fai atu se tasi e te faia se gaoioiga e tai tutusa ma le ifo i tupua, lea e faasā e le Tusi Paia. (Esoto 20:4, 5) Atonu o se sauniga faapitoa e fai i le aʻoga. Atonu foʻi e faapea atu e lē mafai ona e toe aʻoga pe a e lē faia le mea lenā. O le ā se mea e te faia?—

E faigofie ona tatou faia le mea saʻo, pe a faapea o fai uma e tagata le mea saʻo. Ae e faigatā tele ona tatou faia le mea saʻo, pe a faapea o loo taumafai isi tagata e faaosooso i tatou ia faia le mea sesē. Atonu latou te fai mai, e lē o leaga tele a latou mea o fai. Ae o se fesili tāua, O le ā ua fetalai mai ai le Atua e faatatau i lenā mea? E pito i sili le atamai o le Atua.

E tusa lava po o ā tala a tagata, ae e lē tatau ona tatou faia mea ua fetalai mai le Atua e sesē. A tatou tetee i mea sesē, o le a fiafia ai le Atua, ma tatou te lē faia ai se mea e fiafia i ai le Tiapolo.

E maua isi faamatalaga i le auala e tetee ai i faaosoosoga i le faia o mea sesē i le Salamo 1:1, 2; Faataoto 1:10, 11; Mataio 26:41; ma le 2 Timoteo 2:22.