Skip to content

Skip to table of contents

 MATAUPU 10

E Malosi Atu Iesu na i lo Temoni

E Malosi Atu Iesu na i lo Temoni

ETE manatua le māfuaaga na avea ai se tasi o agelu a le Atua ma Satani le Tiapolo?— O le manatu faamaualuga o le agelu lenā ina ia tapuaʻi atu tagata iā te ia, na ala ai ona tetee i le Atua. Pe na mulimuli atu isi agelu iā Satani?— Ioe. Ua taʻua i latou e le Tusi Paia o ʻagelu a Satani,’ po o temoni.​—Faaaliga 12:9.

Pe e talitonu agelu leaga nei po o temoni, i le Atua?— Ua faapea mai le Tusi Paia e ʻtalitonu temoni, o loo soifua le Atua.’ (Iakopo 2:19) Ae i le taimi lenei, ua latou fefefe ai. Auā ua latou iloa o le a faasala i latou e le Atua ona o mea leaga na latou faia. O ā mea leaga na latou faia?—

Ua fai mai le Tusi Paia na tuua e agelu nei lo latou nofoaga i le lagi ma ō mai i le lalolagi e nonofo ai o ni tagata. O le māfuaaga na latou tuua ai le lagi, ona ua mananaʻo e feusuaʻi ma fafine aulelei i le lalolagi. (Kenese 6:1, 2; Iuta 6) E te iloa lea mea e taʻu o feusuaʻiga?—

 O feusuaʻiga, o le taimi lenā e faatasi ai se tamāloa ma se fafine i se auala faapitoa. Mulimuli ane, ona tuputupu aʻe lea o se pepe i totonu o le tinā. Ae e sesē pe a faia e agelu feusuaʻiga. E finagalo le Atua e na o le tamāloa ma le fafine ua uma ona faaipoipo, la te faia feusuaʻiga. Talu ai, afai e fanau mai se pepe, e mafai e le tane ma lana avā ona tausia.

O le ā le mea leaga na faia e agelu nei?

Ina ua liu tino tagata agelu ma latou feusuaʻi ma fafine i le lalolagi, na matutua aʻe a latou fanau ma avea ma tagata tinoeese. E ese le leaga o a latou fanau, ma sa faasauā i tagata. O le iʻuga la, na aumai ai e le Atua se lolo tele e faaumatia ai tagata tinoeese nei, faapea ma tagata leaga uma. Ae na faatonu e le Atua Noa ina ia fau se vaa e faasao ai tagata amio lelei. Na fetalai mai le Faiaʻoga Sili, e tāua le manatua pea o mea na tutupu i le taimi o le Lolo.​—Kenese 6:3, 4, 13, 14; Luka 17:26, 27.

E te iloa le mea na tupu i agelu leaga i le taimi na sau ai le Lolo?— Na toe liu agelu, ma toe foʻi atu i le lagi. Ae ua lē mafai ona toe avea i latou ma agelu a le Atua, o le mea lea ua avea ai i latou  ma agelu a Satani, po o temoni. Ae o le ā le mea na tupu i a latou fanau, tinoeese?— Na feoti i le Lolo, ma na feoti uma foʻi tagata e leʻi usiusitai i le Atua.

Aiseā ua matuā tele ai faafitauli i le lalolagi i le taimi nei?

Talu mai le taimi o le Lolo, e leʻi toe faatagaina e le Atua ni temoni e toe liu tino tagata. E ui lava tatou te lē o vaai i temoni, ae o loo latou taumafai pea e uunaʻia tagata ia faia mea leaga. Ua mataʻutia a latou taumafaiga ina ia faateleina faafitauli. O le māfuaaga, auā ua tuli ese i latou i le lagi ma lafo mai i le lalolagi.

E te iloa le māfuaaga e lē mafai ai ona vaai i temoni?— Auā e lē vaaia i latou. Ae e mafai ona tatou mautinoa, o loo iai moni lava temoni. Ua faapea mai le Tusi Paia ua ʻfaasesē e Satani le lalolagi atoa,’ ma o loo fesoasoani i ai ana temoni.​—Faaaliga 12:9, 12.

Faamata e mafai foʻi ona taʻitaʻi sesē pe faasesē i tatou e Satani ma ana temoni?— Ioe e mafai, pe a lē faaeteete. Ae aua neʻi o tatou fefefe. Na fetalai mai le Faiaʻoga Sili: ʻE lē maua e le Tiapolo se mea iā te aʻu.’ Afai tatou te faauō ma le Atua, o le a puipuia i tatou e le Atua mai le Tiapolo ma ana temoni.​—Ioane 14:30.

E tāua ona iloa mea leaga ia e taumafai temoni e uunaʻia i tatou e fai. Seʻi mafaufau i ai. O ā mea leaga na faia e temoni i le taimi na ō mai ai i le lalolagi?— A o leʻi tupu le Lolo, na latou feusuaʻi ai ma fafine, ma e lē tatau i agelu ona auai i feusuaʻiga. I aso nei, e fiafia tele agelu pe a lē usitai tagata i tulafono a le Atua e faatatau i feusuaʻiga. Seʻi oʻu fesili atu iā te oe, O ai e tatau ona faia feusuaʻiga?— Ioe, ua na o le tamāloa ma le fafine ua uma ona faaipoipo.

I aso nei, ua faia ai e nisi tama ma teine talavou feusuaʻiga, ae e sesē pe a latou faia mea na. O loo taʻua i le Tusi Paia na faia e le Atua totogasā o le tama ma le teine. Na faia e Ieova vaega nei o le tino mo se māfuaaga tāua, lea ua na o tagata faaipoipo e tatau  ona faia. E fiafia tele temoni pe a faia e tagata mea e faasā e Ieova. Mo se faataʻitaʻiga, e fiafia temoni pe a taaloalo se tama ma se teine i totogasā o le isi. Tatou te lē mananaʻo e faafiafia temoni, a ea?—

E iai foʻi se isi mea e fiafia i ai temoni, ae e ʻinoʻino i ai Ieova. E te iloa le mea lenā?— O faiga sauā. (Salamo 11:5) O le sauā e faasino atu i le agaleaga i se tagata po o le fasi o isi tagata. Ia manatua foʻi, o mea na sa faia e tagata tinoeese, po o atalii o temoni.

E fiafia foʻi temoni e faafefe i tagata. I isi taimi, latou te faatagā faafoliga atu ai i tagata ua feoti. Atonu latou te faataʻitaʻia leo ma le tautala a i latou ua feoti. I le faia faapea, ua faasesē ai e temoni le toʻatele o tagata ia talitonu e faapea, o loo ola pea tagata oti ma e mafai ona talanoa mai i ē o ola. Ioe, ua faapogaia e temoni le toʻatele o tagata e talitonu i aitu.

O lea la, e tatau ona tatou faaeteete ina neʻi ʻolegia i tatou e Satani ma ana temoni. Ua lapataʻi mai le Tusi Paia: ʻUa taumafai  Satani e foliga mai o se agelu lelei, ma e faapena foʻi i latou e mulimuli iā te ia.’ (2 Korinito 11:14, 15) Ae o le mea moni, e matuā leaga lava temoni. Seʻi o tatou vaai i auala ua taumafai ai temoni e uunaʻia i tatou, e faataʻitaʻi iā i latou.

O fea e iloa ai e tagata le tele o mea e uiga i faiga sauā, o feusuaʻiga lē mamā, o agaga ma aitu?— Pe lē o le matamata i nisi o polokalame o le televise ma ata tifaga, po o le faauō i tamaiti leaga i le aʻoga ma tamaiti e leaga a latou amio? A tatou faia mea nei, o ai la ua avea ma a tatou uō, o le Atua po o Satani ma ana temoni? O le ā sou manatu?—

O le ā e ono tupu pe a tatou matamata i ata sauā?

O le ā sou manatu, o ai e manaʻo tatou te faalogo ma matamata i mea leaga?— Ioe, o Satani ma ana temoni. O lea la, o ā mea e ao ona tatou faia?— E manaʻomia ona tatou faitau, faalogo ma matamata i mea e lelei ma e fesoasoani ai iā i tatou e auauna iā Ieova. Pe e mafai ona e mafaufau i nisi o mea lelei e mafai ona tatou faia?—

O le ā se mea aogā e ao ona tatou faia?

A tatou faia mea lelei, e leai la se mea o le a fefefe ai fua i temoni. E malosi atu Iesu iā i latou, ma e fefefe temoni iā Iesu. Na alalaga atu temoni iā Iesu i se tasi aso: ʻUa e maliu mai ea e faaumatia i matou?’ (Mareko 1:24) Pe o le a tatou fiafia ea i le taimi o le a faaumatia ai e Iesu Satani ma ana temoni?— Ae i le taimi nei, e mafai ona mautinoa o le a puipuia i tatou e Iesu mai temoni, pe afai tatou te faauō iā Iesu ma lona Tamā i le lagi.

Seʻi o tatou faitau i le mea e tatau ona tatou faia, i le 1 Peteru 5:8, 9 ma le Iakopo 4:7, 8.