Skip to content

Skip to table of contents

 MATAUPU 38

Le Māfuaaga e ao ai Ona Tatou Alolofa iā Iesu

Le Māfuaaga e ao ai Ona Tatou Alolofa iā Iesu

SEʻI faapea o loo e i totonu o se vaa ua toeitiiti lava goto. Pe e te manaʻo e alu atu se tagata e laveaʻi mai oe?— E faapefea pe a oti se tasi ona o le laveaʻiina mai o oe?— O le mea tonu lava lenā na fai e Iesu Keriso. E pei ona tatou aʻoaʻoina i le Mataupu e 37, na foaʻi e Iesu lona ola e fai ma togiola ina ia laveaʻi ai i tatou.

O le mea moni lava ia, e lē laveaʻia i tatou e Iesu pe a tatou malelemo. Peitaʻi, o le ā le tulaga e laveaʻi mai ai i tatou e Iesu? E te manatua?— O le agasala ma le oti lea na maua mai iā Atamu. E ui e matuā amio leaga isi tagata, ae na maliu foʻi Iesu mo i latou. Pe e mafai ona tuu lou ola i se tulaga lamatia, ina ia faasao ai tagata faapena?—

O loo faapea mai le Tusi Paia: “E toe ina lē mafai ona oti o se tasi e sui aʻi lē ua amiotonu; a o lē ua agalelei, atonu pe faamalosi se tasi ona oti e sui aʻi o ia.” Ae, o loo taʻua e le Tusi Paia e faapea na ʻmaliu Keriso e sui aʻi tagata amio leaga.’ E aofia ai ma tagata e lē auauna i le Atua! Na toe faapea mai le Tusi Paia: “Ua maliu Keriso ma sui o i tatou, a o tatou agasala pea [fai pea le amio leaga].”​—Roma 5:6-8.

Po o e manatua se aposetolo na faia ni mea leaga i se taimi muamua?— Na tusi mai le aposetolo lenā: “Na maliu mai Keriso Iesu i le lalolagi, na te faaolaina o ē agasala; ua sili musa aʻu nei iā i latou.” O le tala lenā a le aposetolo o Paulo. Na faapea mai Paulo, “sa valea” o ia ma na faaauau ona ia ʻfai le mea leaga.’​—1 Timoteo 1:15; Tito 3:3.

Seʻi mafaufau i le maoaʻe o le alofa o le Atua i le auina mai o lona Alo e maliu mo tagata amio leaga faapena! Faamolemole aumai lau  Tusi Paia ma faitau i le manatu lenā i le Ioane 3:16 e faapea: “Ua faapea lava ona alofa mai o le Atua i le lalolagi [o lona uiga, o tagata o nonofo i le lalolagi], ua ia au mai ai lona Atalii e toʻatasi, ina ia lē fano se tasi e faatuatua iā te ia, a ia maua e ia le ola faavavau.”

O ā mea na mafatia ai Iesu ina ua foaʻi lona ola mo i tatou?

Na faamaonia e Iesu lona alofa iā i tatou e pei o lona Tamā. Atonu e te manatua i le Mataupu e 30 o le tusi lenei, na tatou faitau ai i mea tigā na oo iā Iesu i le pō na puʻeina ai o ia. Na ave Iesu i le fale o le Ositaulaga Sili o Kaiafa, lea na faia ai Lona faamasinoga. Na ave ifo molimau pepelo o ē na tala pepelo e uiga iā Iesu, ma na tatuʻi ai e tagata Iesu. O le taimi lenā na faafiti ai Peteru e faapea e na te lē iloaina Iesu. Seʻi faapea la o loo tatou iai i lenā taimi ma o loo mafai ona tatou vāai atu i mea o tutupu.

Ua aulia nei le taeao. E leʻi moe lava Iesu. Talu ai e faapiʻopiʻo le faamasinoga muamua, na aami vave ai e ositaulaga tagata o le Saniterini, po o le faamasinoga sili a Iutaia, ma toe fai ai le isi faamasinoga. Ua toe tuuaʻia foʻi Iesu i le solitulafono e faasaga i le Atua.

Na faatonuina e ositaulaga e saisai lima o Iesu ma avatu iā Pilato, le kovana o Roma. Ua latou taʻu atu iā Pilato: ʻE tetee Iesu i le malo. E tatau ona fasioti.’ Peitaʻi, o loo malamalama Pilato e faapea e pepelo le ʻauositaulaga. Na fai atu Pilato iā i latou: ʻE leai se mea ou te maua i lenei tamāloa. O le a ou tuu saʻoloto le tamāloa e alu.’ Ae na feʻei atu le ʻauositaulaga ma isi tagata e faapea: ʻAua! Ia fasioti iā te ia!’

Mulimuli ane, na toe fai atu ai Pilato o le a tuu saʻoloto Iesu. Ae na faaoso e ositaulaga le motu o tagata e feʻei atu faapea: ʻAfai e te tuu saʻoloto iā te ia, ua e tetee foʻi i le malo! Ia fasioti iā te ia!’ Ua pisapisaō le motu o tagata. E te iloa le mea na fai e Pilato?—

Na fai e Pilato le mea na mananaʻo ai tagata. Muamua lava, na faatonuina e Pilato e matuā sasa Iesu. Ona tuuina atu lea e Pilato, Iesu i fitafita ina ia fasiotia. Na latou tuu se pale matuitui i lona ulu ma  latou tauemu iā te ia, e ala i le ifo i ona luma. Ona latou tuuina atu lea o se laau telē e amo e Iesu, ma ave o ia i fafo o le aai i le mea o iai le ulupoo. Na latou tuʻituʻiina vae ma lima o Iesu i fao i luga o le laau. Ona latou faatūina lea o le laau i luga ina ia tautau ai Iesu. O loo maligi lona toto. Ua matuā tigāina.

E leʻi maliu Iesu i le taimi lenā. Na tautau pea i le laau. Ua ula atu i ai le ʻauositaulaga sili. Ua faapea atu tagata na asiasi atu: ʻAfai o oe le Alo o le Atua, inā alu ifo ia i lalo mai le satauro.’ Peitaʻi, na silafia e Iesu le māfuaaga na auina mai ai o ia e lona Tamā. Ua silafia e Iesu, e tatau ona foaʻi lona soifua lelei atoatoa ina ia mafai ona tatou maua le avanoa e ola ai e faavavau. Ina ua tā le tolu i le aoauli, ona alaga atu lea o  Iesu i lona Tamā, ma maliu ai loa.​—Mataio 26:36–27:50; Mareko 15:1; Luka 22:39–23:46; Ioane 18:1–19:30.

E matuā eseese lava Iesu ma Atamu! E leʻi alofa Atamu i le Atua. E leʻi usitai i le Atua. E leʻi alofa foʻi Atamu iā i tatou. Ona na agasala Atamu, ua tatou fananau uma ai ma le agasala. Peitaʻi, na faaalia e Iesu lona alofa i le Atua ma i tatou foʻi. Na usitai Iesu i taimi uma lava i le Atua. Na foaʻiina e Iesu lona soifua, ina ia mafai ona aveesea ai aafiaga leaga ua aumaia e Atamu iā i tatou.

O ā mea tatou te faia, e faaalia ai lo tatou alofa iā Iesu?

Pe e te loto faafetai i le mea matagofie na faia e Iesu?— Afai e te tatalo i le Atua, pe e te faafetai atu iā te ia mo le foaʻiina mai o lona Alo mo i tatou?— Na talisapaia e le aposetolo o Paulo le mea na faia e Keriso mo ia. Na tusia e Paulo e faapea o le Alo o le Atua “na alofa mai iā te aʻu, ma foaʻiina mai o ia e ia mo aʻu.” (Kalatia 2:20) Na maliu foʻi Iesu mo oe ma aʻu. Na foaʻi e Iesu lona ola lelei atoatoa ina ia mafai ona tatou maua ai le ola e faavavau! O se māfuaaga lelei lenā e tatau ai ona tatou alolofa iā Iesu.

Na tusi atu le aposetolo o Paulo i Kerisiano i le aai o Korinito: “Ua uunaʻia i tatou e le alofa o Keriso ina ia gaoioi.” O le ā le gaoioiga tatou te faia, ona o le alofa o Keriso? O le ā sou manatu?— Ia mātau le tali a Paulo: “Na maliu Iesu mo tagata uma ina ia latou ola mo Ia. E lē tatau ona latou ola tau lava o le faafiafiaina o i latou lava.”​—O upu faasisipa o a matou; 2 Korinito 5:14, 15, New Life Version.

 Pe e mafai ona e mafaufau i ni auala e te faaalia ai o loo e ola i se olaga e faafiafia ai Keriso?— O se tasi o auala, ia taʻu atu i isi mea ua e aʻoaʻoina e uiga iā Iesu. Pe mafaufau foʻi i lenei manatu: Atonu e na o oe ma e lē o iloa atu e lou tinā, o lou tamā po o se isi lava tagata, au mea o fai. Pe e tatau ona e matamata i polokalame o le televise pe tilotilo foʻi i le Initineti, i mea ua e iloa e lē fiafia i ai Iesu?— Ia manatua o loo soifua Iesu, ma e na te silafia mai a tatou mea uma o fai!

O ai o mafai ona silafia mai a tatou mea uma o fai?

O se isi māfuaaga e tatau ai ona tatou alolofa iā Iesu, ona tatou te mananaʻo e faataʻitaʻi atu iā Ieova. Na faapea mai Iesu: ʻE alofa le Tamā iā te aʻu.’ E te iloa le māfuaaga e alofa ai Ieova iā Iesu, ma e ao ai foʻi ona tatou alolofa iā Iesu?— Ona na loto malie Iesu e maliu auā le faataunuuina o le finagalo o le Atua. (Ioane 10:17) Seʻi o tatou faia la le mea o fai mai ai le Tusi Paia: “O lenei, ia faaaʻoaʻo outou i le Atua, faapei o le fanau pele; ma ia savavali i le alofa, faapei o Keriso foʻi na ia alofa mai iā i tatou, ua na foaʻi mai foʻi e ia iā te ia mo i tatou.”​—Efeso 5:1, 2.

Ina ia tupu aʻe lo tatou loto faafetai iā Iesu ma mea ua ia faia mo i tatou, faamolemole faitau le Ioane 3:35; 15:9, 10; ma le 1 Ioane 5:11, 12.